टीकापुर घटनाका दोषी रेशम चौधरीसहित ११ जनालाई २० वर्ष कैद

अर्जुन शाह

काठमाडौँ — जिल्ला अदालत कैलालीले बुधबार टीकापुर हत्या घटनाको फैसला गरेको छ । फैसलाअनुसार रेशमलाल चौधरीसहित ११ जनालाई जन्मकैद तोकेको छ ।

जन्मकैद तोकिएकाहरुमा
  • हरिनारायण चौधरी
  • राजकुमार कठरिया
  • सुन्दरलाल कठरिया
  • वृज मोहन डगौरा
  • राजेश चौधरी
  • विरबहादुर चौधरी
  • प्रदीप चौधरी
  • सिताराम चौधरी
  • श्रवण चैधरी
  • गंगाराम डगौरा चौधरी
  • रेशमलाल चौधरी

उनीहरुलाई मुलुकी ऐन ज्यानसम्बन्धी महलको दफा १३, ३ अनुसार जन्म कैद हुने फैसला गरिएको अदालतको फैसलामा उल्लेख छ। श्रवण चौधरी नाबालक भएकाले बालबालिका ऐनअनुरुप उनलाई १० वर्ष मात्रै कैद हुने फैसला सुनाइएको हो।
३ वर्ष कैद सजाय पाएकाहरु
  • लक्ष्मण थारु
  • लाहुराम चौधरी
  • राजकुमार कठरिया
  • सन्तराम चौधरी
  • जीतबहादुर डगौरा
  • प्रेमबहादुर चौधरी
  • किसनलाल चौधरी
  • दिलबहादुर चौधरी
  • सन्तोष थारु चौधरी
  • विश्राम चौधरी
  • रामप्रसाद चौधरी
  • चुन्नराम चौधरी

उनीहरु बुधबार नै रिहा भएका छन्। उनीहरुलाई तोकिएको कैद जरिवाना यसअघि नै पुगिसकेकाले कारागारको कागजी प्रकृयापछि बुधबार अपरान्ह रिहा हुने जनाइएको छ। चुन्नीराम चौधरी यही फागुन ३० गते छुट्ने छन्।

६ महिना कैद सजाय
  • करन चौधरी
नाबालक रहेका उनलेसमेत कैद भूक्तान गरिसकेकाले बुधबार नै रिहा हुनेछन्। तीन जनाले सफाइ पाएका छन्।

सफाई पाउनेहरुमा
  • तहाँवर अलि जागा
  • विषराम चौधरी (कुष्मी)
  • रामनरेश चौधरी

५८ जनाविरुद्ध मुद्दा भए पनि फरार सूचीमा रहेका ३१ जनाको मुद्दा भने मुल्तवीमा राखिएको जिल्ला अदालतले जनाएको छ। दुवै पक्षबाट ६ दिनसम्म चलेको बहस मंगलबार सकिएको थियो।

यो पनि :

कैलालीको टीकापुरमा २०७२ भदौ ७ गते प्रहरीका एसएसपी र एक नाबालकसहित ९ जनाको हत्या भएको थियो। घटनामा मुख्य योजनाकार भएको आरोप लागेका रेशम चौधरीले गत वर्षको फागुन १४ गते जिल्ला अदालतमा आत्मसमर्पण गरेका थिए। प्रतिवादीहरुका तर्फबाट विभिन्न प्रतिवादीहरुका लागि अधिवक्ताहरुले बेग्लाबेग्लै बहस गरेका छन्। काठमाण्डौंबाट आएका वरिष्ठ अधिवक्ता गोपालप्रसाद घिमिरे, पूर्वन्यायधिवक्ता हरि फुयाल र अधिवक्ता दीनमणि पोख्रेलले रेशम चौधरीका लागि मात्रै बहस गरेका छन्। यस्तै दीनमणि पोखरेलले रेशमसहित प्रतिवादीहरु लाहुराम चौधरी र लक्ष्मण थारुका पक्षमा समेत बहस गरेका हुन्।

कैलालीका अधिवक्ताहरु गंगाराम पाध्याय, गजेन्द्र केसी, गम्भीरसिंह ऐर, वीरबहादुर जेठारा, नाथुराम महता र जुहारीलाल चौधरीले रेशमसहित सबै २७ जना प्रतिवादीको पक्षमा बहस गरेको अधिवक्ता गंगाराम उपाध्यायले बताए। वादीहरुको पक्षमा भने जिल्ला न्यायधिवक्ता विष्णुप्रसाद पौडेलले बहस गरेका हुन्।
प्रतिक्रिया
पठाउनुहोस्
ADVERTISEMENT
ADVERTISEMENT

प्रधानमन्त्री ओली अस्पताल भर्ना

अतुल मिश्र

काठमाडौँ — स्वास्थ्यमा गडबड भएपछि प्रधानमन्त्री केपी शर्मा ओली बुधबार मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा भर्ना भई स्वास्थ्य परीक्षण गराएर राति डिस्चार्ज भएका छन् । प्रधानमन्त्रीको निजी सचिवालयका अनुसार उनलाई बिहान १० बजे स्वास्थ्य जाँचका लागि सेन्टरमा लगिएको थियो । 

फाइल तस्बिर

सेन्टरका कार्यकारी निर्देशक प्रा.डा. उत्तमकृष्ण श्रेष्ठका अनुसार मुटुको नियमित परीक्षण गर्न सेन्टर गएका प्रधानमन्त्री ओलीलाई थप केही परीक्षण गर्न अब्जरभेसन (अवलोकन) मा राखिएको थियो । स्रोतका अनुसार उनको एन्जियोग्राफी गर्ने तयारी गरिएको थियो ।

उनको क्रिएटिनिनको स्तर २ मिलिग्राम फ्रतिडेसिलिटर देखिएको थियो । सामान्य व्यक्तिमा सामान्य अवस्थामा त्रिएटिनिनको स्तर १.४ देखि तल रहने गरेको बायोकेमिस्टहरू बताउँछन् । ‘एन्जियोग्राफी गर्नुपरेन, अन्य जाँचसमेत सामान्य देखिएपछि डिस्चार्ज गरिएको हो,’ प्रधानमन्त्रीको उपचार, परीक्षणका संयोजक प्रा.डा. अरुण सायमिले बुधबार राति कान्तिपुरलाई भने ।

प्रधानमन्त्रीका निजी चिकित्सक प्रा.डा. दिव्या सिंह शाहका अनुसार एक वर्षअघि पनि प्रधानमन्त्रीको सम्पूर्ण शरीर परीक्षण गरिएको थियो । ‘बैंकक गएर चेकअप गरेको एक वर्षभन्दा बढी भइसकेको छ, त्यसैले एक पटक चेक गर्नैपर्छ । अहिले उहाँलाई अलि स्ट्रेस पनि छ । हामी सबै कुरा ठीक छ भन्ने निश्चित हुन चाहन्छौं,’ उनले भनिन्, ‘उहाँलाई धेरै समस्या छँदै छ, प्रत्यारोपण आफैंमा जोखिमको कारक हो ।’ प्रधानमन्त्री ओलीको ११ वर्षअघि दिल्लीको अपोलो अस्पतालमा मृगौला प्रत्यारोपण गरिएको थियो ।

गत कात्तिक १२ गते प्रधानमन्त्री ओलीलाई सास फेर्न असजिलो भएपछि मनमोहन कार्डियोथोरासिक भास्कुलर तथा ट्रान्सप्लान्ट सेन्टरमा भर्ना गरिएको थियो । प्रधानमन्क्रीको छातीमा संत्रमण देखिएको तथा शरीरमा चिनीको मात्रा असन्तुलित देखिएकाले सेन्टरमा उपचार गरेर पाँच दिनपछि डिस्चार्ज गरिएको थियो ।

केही चिकित्सकका अनुसार पाँच वर्षअघि प्रधानमन्त्री ओलीको हातमा भएको फरक प्रकारको संक्रमण पूर्ण रूपमा निको भएपछि कुनै ठूलो स्वास्थ्य समस्या देखिएको थिएन । बेलाबेला रुघाखोकी लाग्नेलगायत सामान्य स्वास्थ्य समस्या र ‘ग्यास्ट्रोइन्टराइटिस (ब्याक्टेरिया वा भाइरसले पेट र आन्द्रा सुन्निँदा पखाला, बान्ता आदि हुने) बाहेक अन्य ठूलो समस्या देखिएको थिएन ।

प्रधानमन्त्री पदको शपथ लिनुभन्दा केही दिनअघि मात्र उनले बैंककस्थित ब्रुमरुग्रान्ड इन्टरनेसनल हस्पिटलमा नियमित स्वास्थ्य परीक्षण गराएका थिए ।

प्रकाशित : फाल्गुन २२, २०७५ १३:४३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT