सिके राउतमा दाहालकाे जस्तै निर्णय क्षमता देखें– प्रधानमन्त्री
काठमाडौँ — प्रधामनन्त्री केपी ओलीले सिके राउतको प्रशंसा गरेका छन् । राउतले नेतृत्व गरेको स्वतन्त्र मधेस गठबन्धन र सरकारबीच शुक्रबार भएको राजनीतिक सहमति कार्यक्रममा बोल्दै प्रधानमन्त्री ओलीले राउतमा असाधारण निर्णय क्षमता देखेकाे भन्दै प्रशंसा गरेका हुन् । उनले राउतलाई पूर्वप्रधानमन्त्री पुष्पकमल दाहालसँग तुलना गरेका छन् ।
उनले संसद्मा सहभागी भएदेखि पार्टी एकतासम्म पुग्दा दाहालले यस्तै निर्णय क्षमता देखाएकाे बताए ।
'राउतमा असाधारण निर्णय क्षमता देखेँ । त्यस्तो निर्णय क्षमता पुष्पकमल दाहालमा मात्रै देखेको थिएँ,' प्रधानमन्त्री ओलीले भने, 'संसद्, सरकार, चुनावमा सहभागिता, पार्टी एकता गर्ने कुरामा जोसुकैले यस्तो गर्न सक्दैन, त्याे निर्णय क्षमताले हुन्छ । मैले सिके राउतजीमा पनि यस्तो छाँटकाँट देखेँ ।'
पृथकतावादी आन्दोलन त्यागेर राष्ट्रिय एकताको बाटोमा प्रवेशको घोषणा गर्दै सबैलाई सहयोगका लागि आग्रह गर्नेसम्मको राउतको निर्णय साधारण नभएको उनको भनाइ थियो ।
प्रधानमन्त्री ओलीले तराईमा सिके राउतलाई देखाएर स्वार्थको रोटी सेक्ने दिन पनि अब सकिने बताए । देश विखण्डन गर्ने कुरामा कसैसँग पनि सहमति हुन नसक्ने भन्दै उनले देश टुक्र्याउने कुरा आजबाट समाप्त भएको बताए ।
राजपा सांसद रेशम चौधरीलाई अदालतले जन्मकैदको फैसला सुनाएको प्रसंगमा ओलीले सरकारले अदालतलाई निर्देशन दिन नसक्ने बताए ।
प्रकाशित : फाल्गुन २४, २०७५ १४:४८
