रोजगार बैंकले उत्साह

घोषणाको भोलिपल्टै काठमाडौंदेखि प्लम्बर र हाउस वायरिङको माग आउँदा सञ्चालक उत्साहित बनेका छन् ।
तुलाराम पाण्डे

कालीकोट — रास्कोट नगरपालिकाले गत बुधबार श्रम रोजगार बैंक घोषणा ग¥यो । त्यसको भोलिपल्टै काठमाडौंबाट प्लम्बर र हाउस वायरिङका लागि युवाहरूको माग आयो । ‘बैंक घोषणा गरेको एक दिनमै जनशक्ति माग भएपछि हामी उत्साही छौं,’ नगर प्रमुख काशीचन्द्र बराल भन्छन्, ‘यसले हाम्रा युवालाई रोजगारीको मार्ग प्रशस्त गरेको छ ।’

नगरपालिकाले १० बुँदे कार्यविधि बनाई रोजगार बैंकमा आबद्ध युवा श्रमशक्तिलाई परिचालन गर्ने नीति तय गरेको छ । त्यसैले बाहिरबाट माग आए पनि सबै प्रक्रिया पु¥याएर द्विपक्षीय समझदारी (एमओयू) गरेर मात्र श्रमशक्ति परिचालन गरिने नगर प्रमुख बराल बताउँछन् । ‘मानव पुँजीको श्रमको बैंक भएकाले सबैको चासो बढेको छ,’ उनी भन्छन्, ‘आफ्नै गाउँघरमा बसेर रोजगारीको अवसर पाइने भएकाले युवा उत्साहित छन् ।’


श्रम रोजगार बैंकमा अहिले १८ देखि ४० वर्ष उमेरका २ सय ६० युवा छन् । कामको खोजीमा भौतारिने युवालाई नगरपालिकाले एकीकृत गरी बैंक स्थापना गरेको हो । युवालाई नगरपालिकाले नगरभित्रका विकास निर्माणका साथै बाहिर पनि एमओयू गरेर पठाउने नीति बनाएको छ । उनीहरूलाई व्यवस्थित रूपमा परिचालन गर्न पदमबहादुर खड्कालाई कमाण्ड र नरध्वज खड्का तथा अरुण शाहीलाई सहकमान्डरको जिम्मा दिइएको छ । उनीहरू सबै पूर्वलडाकु हुन् । ‘गाउँमा केही काम पाइँदैन भनेर युवामा चरम निराशा थियो,’ कमान्डर खड्काले भने, ‘नगरपालिकाको यस कार्यले हामी युवालाई उत्साही बनाएको छ, हामीमाथि ठूलो जिम्मेवारी थपिएको छ ।’ बैंकमा महिला पुरुष सबैलाई क्रमिक रूपमा अवसर दिँदै जाने उनले बताए ।

Citizen


कार्यान्वयन विधि
श्रम–रोजगार बैंक व्यवस्थित गर्न नगरपालिकाले १० पृष्ठको कार्यविधि पारित गरेको छ । कार्यविधिमा सरकारी रोजगारी नभएको, गरिब, विपन्न र दलितलाई प्राथमिकता दिइने र महिला संख्या ३० प्रतिशत हुने उल्लेख छ । यस वर्ष बैंक स्थापना तथा सञ्चालनका लागि २ करोड ५० लाख रुपैयाँ विनियोजन गरिएको छ । नगरभित्रका योजनाको प्राथमिकीकरण गरी सडक, भवन, विद्युत्, खानेपानीलगायत भौतिक पूर्वाधारका काममा युवा खटाइनेछ । सोहीअनुसार बिहीबार सबै सदस्यलाई आरसीपी बजारमा भेला गरेर समूहगत कार्यजिम्मेवारी र विवरणबारे अभिमुखीकरण गरिएको नगर प्रमुख बरालले बताए । प्रत्येक समूहमा २० सदस्य रहेको बैंकको कार्य सञ्चालनका लागि नगरपालिकामा एकजना अध्यक्ष र एकजना मुख्य व्यवस्थापक छन् । उनीहरूले नियमित रूपमा कामको अवस्था र प्रगति प्रतिवेदन नगरपालिकामा पेस गर्नेछन् ।


समूहमा व्यवस्थापक र प्राविधिकसहित दक्ष र अदक्ष जनशक्ति परिचालित हुनेछन् । हरेक दिन काम सुरु हुनुभन्दा आधा घण्टाअघि रोलकाल गरी समग्र टिमको अवस्थासहित दिनभर गर्ने कामबारे जानकारी दिएर फिल्डमा खटाइनेछ । दिनको १ देखि २ बजेसम्म खाजा र बेलुका ५ बजेसम्म काम गर्नेछन् । त्यसपछि बेलुकी आधा घण्टा रोलकालमा दिनभरिको कामको मूल्यांकन गरी प्राविधिकले प्रत्येक दिनको ज्याला निर्धारण गर्नेछन् । यसरी काम गर्दा प्रतिव्यक्ति मासिक २१ हजार आम्दानी हुने नगरपालिकाको भनाइ छ ।
नगरपालिकाले बैंकका सबै सदस्यलाई एकैखाले ड्रेस व्यवस्था गर्नुका साथै १० लाखको बिमा पनि गरिदिएको छ । उनीहरूलाई समूहगत रूपमा नगर कार्यपालिकाले छनोट गरिएका विभिन्न योजनामा खटाइनेछ । योजनाको कामको सुरुदेखि अन्त्यसम्म कामको परिमाणको आधारमा दिनको ज्याला निर्धारण हुने र रकम बैंकमार्फत प्रत्येक सदस्यको खातामार्फत भुक्तानी गर्ने नगरको योजना छ । रास्कोट नगरपालिकाले योजनामा गुणस्तरीय काम गर्न÷गराउन युवा परिचालन र अपनत्वसहितको दिगो विकासका लागि युवालाई संगठित गरिएको जनाएको छ ।


काम फालाफाल
रास्कोट नगरपालिकामा मात्र करिब २० करोडको निर्माण काम छ । केहीमा उपभोक्ताले काम गरे पनि अब अधिकांशमा बंैकका सदस्यले गर्नेछन् । यसले रोेगजारीका लागि कालापहाड (भारतीय श्रमबजार) गएका युवालाई पनि उत्साही बनाएको छ । उनीहरू आफ्नै गाउँमा फर्किएर बैंकमा आबद्ध भई रोजगारीमा सामेल हुने स्थानीयको आशा छ । ‘अर्काको देशमा गएर दुःख गरेपछि हुने कमाइ आफ्नै गाउँघरमा हुन्छ भने राम्रै होला,’ स्थानीय निर्मला बराल भन्छिन्। नगरले यस वर्ष मेलामाडु–बास्तोला हुँदै गाउँखेतसम्मको सडकमा २ करोड, बडिमालिकादेखि देउरापाटनसम्म सडकमा १ करोड, मोतीराम माविको भवन र फिल्ड निर्माणमा २५ लाख, बाइती–भात्तडी सडकमा १५ लाख, रास्कोट नगरको आवास निर्माणमा ५० लाख र कृषि उपजमा १५ लाख रुपैयाँ विनियोजन गरेको छ ।

यसका साथै पुच्छेगाउँ नदी नियन्त्रण, चुडीमूलमा वृक्षरोपण, धुवाने छहरामा ८ सय किलोवाट विद्युत् उत्पादनका लागि बजेट छुट्याइएको छ । त्यस्तै, अर्गानिक रास्कोट एकीकृत कृषि विकास कार्यक्रम, बृहत् रास्कोट बहुउद्देश्यीय जलउपयोग परियोजनाअन्तर्गत १९ वटा जलाशय निर्माण, मत्स्य पालन, विद्युत् तथा सिँचाइ योजना सञ्चालन, ५४ वटा एकीकृत बस्ती, आरसीपी बजारलाई स्मार्ट सिटी, ‘एक घर एक धारा’ निर्माणको योजना अघि सारिएका छन् । प्रदेश सरकारको तर्पmबाट पनि सिप्टीमा स्याउ जोन कार्यक्रम, डिजिटल विद्यालय, रंगशाला निर्माणलगायत योजना पाएको छ ।

प्रकाशित : फाल्गुन २९, २०७५ १०:२९
प्रतिक्रिया
पठाउनुहोस्
ADVERTISEMENT

दस महिनामै फर्किए जिदान

एएफपी

म्याड्रिड — जिनेदिन जिदानले २९ मिनेटसम्म विभिन्न प्रश्नको सामन गर्नुप¥यो । उपस्थित सबैको प्रश्नको सार दुईवटा थिए– अहिले किन ? र अब के ? सोमबार सान्टियागो वर्नबाउको खचाखचपूर्ण हलमा राउल र रोबर्टो कार्लोस अगाडिको सिटमा बसेका थिए । आधिकारिक घोषणाको डेढ घण्टापछि पत्रकारले प्रश्नका लागि पहुँच पाएका थिए ।

सान्टियागो सोलारीलाई रियल मड्रिडले प्रशिक्षक पदबाट बर्खास्त गरेको थियो र उनको स्थानमा २ सय ८४ दिनपछि जिनेदिन जिदानले पुनरागमन गरेका थिए । गत वर्ष मे ३१ मा क्लबका अध्यक्ष फ्लोरेन्टिनो पेरेजकै साथमा बसेर जिदानले भनेका थिए कि टोलीले उनको साथ जित हासिल गर्न सक्दैन । तर, उनीहरू जिदानबिना जित्न असफल भए । सुरुमा बर्खास्तीमा परेका स्पेनका प्रशिक्षक जुलियन लोपेटेगीको साथमा र, त्यसपछि अन्तरिम हुँदै स्थायी प्रशिक्षक बनेका सान्टियागो सोलारी, जसको नेतृत्वमा टोली ६ दिनको बीचमा मुख्य तीन प्रतिस्पर्धाबाट लगभग बाहिरिएको थियो ।


सोलारीको बहिर्गमन निश्चित थियो । तर ला लिगाको बाँकी ११ खेलका लागि उपयुक्त विकल्प आवश्यक बन्यो । मड्रिडको संकटपूर्ण समयमा कोही पनि त्यो जोखिम हासिल गर्न तयार देखिएका थिएनन् । परिस्थिति कसरी बदलियो त ? भन्ने प्रश्नको जवाफमा जिदानले भने, ‘जब अध्यक्षले मलाई बोलाउनुभयो र मलाई लाग्यो– जाउँm । जिदान स्पेनमै बस्छन् । उनले केही खेलहरू पनि हेरेका छन्, जबकि उनका तीन छोराहरू क्लबमै विभिन्न स्तरमा फुटबल खेलिरहेका छन् । बाहिरबाट देखिएजस्तै आफ्नो पुनरागमनलाई उनले पनि करिअरमा छलाङको रूपमा मान्न सक्दैनन् । तर पनि उनका लागि सबैभन्दा बढी लालच यो हुन सक्छ कि टोली आफ्नो स्वभाविक लय भेट्टाउन असफल छ । महान् प्रशिक्षक र खेलाडीमा हमेसा एक आत्मविश्वास हुन्छ । उनीहरूका लागि जुनसुकै समस्या पनि निकै ठूलो हुँदैन ।


जिदानलाई थाहा छ कि लगातार तीनपल्ट च्याम्पियन्स लिगको उपाधि जितेको भन्दा धेरै अधिकार लिएर उनी पुनरागमन गर्न पाउनेछन् । जसरी दुई प्रशिक्षक आए, गए । बर्नबाउको सीट खाली हुँदा र बार्सिलोनाले लगातार अंकतालिकामा अग्रता बढाइरहँदा जिदानको महत्व र मूल्य बढ्दै गयो । म फर्केर आएँ किनभने अध्यक्षले मलाई बोलाउनुभयो । म उहाँलाई सम्मान गर्छु, यो क्लबलाई सम्मान गर्छु,’ उनले भने, ‘अर्को वर्षसम्ममा निश्चित रूपले हामी हरेक कुरा परिवर्तन गर्नेछौं ।’ जिदानले सिजनको अन्त्यसम्म कुर्न सक्थे तर त्यतिबेलासम्म यो अवसर गुम्न सक्ने भय थियो । जोसे माउरिन्होले सार्वजनिक रूपमै आफ्नो इच्छा व्यक्त गरिसकेका थिए ।


अध्यक्ष पेरेजमाथि समर्थकसहितको चौतर्फी दबाब बढदो थियो । केही अखबारले मत सर्वेक्षणलाई आधार बनाउँदै मड्रिडको असफलतामा प्रशिक्षक सोलारीभन्दा बढी क्लब प्रशासन दोषी रहेको समाचार प्रकाशित गरेका थिए । कप्तान सर्जियो रामोसको नेतृत्वमा खेलाडीहरूले पनि आलोचना गर्न थालेका थिए ।


गएको साता आयाक्ससँगको पराजयपछि आक्रामक देखिएका कप्तान रामोसले क्लब प्रशासन र अध्यक्ष पेरेजप्रति लक्षित गरी भनेका थिए, ‘समस्याको कारक खराब योजना हो ।’ जिदानजस्ता प्रशिक्षकले यस समस्याको पूर्ण समाधानका लागि प्रयास गर्नुपर्छ ।


‘हामीलाई एक सानदास युगको सुरुआत गर्नुपर्ने आवश्यकता छ,’ पेरेजले भने, ‘यही कारणले हामीले जिनेदिन जिदानलाई स्वागत गरेका छौं ।’ जिदानले अबको तीन महिनामा क्लबमा गर्नुपर्ने परिवर्तनका बारेमा निर्णय गर्नुपर्नेछ । उनी प्रस्ट योजनाका साथ फर्किएका छन् । गत सिजन मड्रिडले लगातार तेस्रो वर्ष च्याम्पियन्स लिगको उपाधि जित्दै गर्दा ला लिगामा विजेता बार्सिलोनासँग १७ अंकले पछि थियो । अहिले १२ अंकले पछि छ ।


‘मैले यो भुल्दिन कि हामीले के–के जित्यो तर म ती खराब कुराहरू पनि कहिल्यै बिर्सने छैन कि गत सिजन हामीले के गर्न सकेनौं,’ उनले भने । अधिक खर्चका लागि उनले पर्याप्त अधिकार पाउन सक्छन् । तर जिदानका लागि सबैभन्दा ठूलो चुनौती भनेको सुधार र क्रान्तिको सन्तुलन मिलाउनु हो । नयाँ सुरुवातले त्यस्ता प्रतिभालाई असर पु¥याउन सक्छ जसले पछिल्लो समय आफ्नो स्तरमा व्यापक सुधार गरिरहेका छन् ।

युवा खेलाडीहरू भिनिसियर जुनियर, सर्जियो रेगुइलन, मार्कोर लोरेन्टेजस्ता खेलाडी प्रत्यक्ष मारमा पर्न सक्छन् । रोनाल्डो गए, यो कुरा कसैले लुकाउन सक्दैन कि टिमले उनलाई सम्झिरहेको छ । त्यो शून्यता भर्नका लागि मैदानमा अन्य खेलाडीहरू संघर्षरत छन् । ग्यारेथ बेल र जिदान गत सिजनको मध्यदेखि बोलचाल गरेको पनि नगण्य देखिएको थियो । फ्रान्सेली प्रशिक्षकको पुनरागमन निश्चित रूपमा उनका लागि उत्साहजनक छैन । उच्च सम्भावना यो छ कि उनले बिदाइ लिनेछन् ।


निर्णय मार्सेलो र इस्कोमाथि पनि गर्नुपर्ने आवश्यकता हुनेछ । किनभने दुवैको प्रदर्शन यो सिजन सुक्खा छ । केलर नाभास जिदानका मनपर्ने गोलरक्षक थिए, जो थियावट कोर्टवाका लागि समस्याको कारक बन्न सक्छ । लुका मोड्रिडले महसुस गर्न सक्नेछन् कि यो केही नयाँ गर्ने समय हो । जिदानको मुख्य हतियार भिनिसियस हुन्, जो गोलीगाँठाको चोटका कारण सायद यस सिजन खेल्न सक्दैनन् । उनी मड्रिडका चम्किला तारा हुन् । अग्रपंक्तिका तीनमध्ये बायाँ क्षेत्रबाट १८ वर्षीय ब्राजिलियन युवालाई जिम्मेवारी दिन सकिन्छ । जुन स्थानका लागि चेल्सीका इडेन हाजार्डलाई मड्रिडले आँखा लगाइरहेको छ । तत्कालका लागि रियल मड्रिडले अधिक आत्मविश्वासका साथ शनिबार सेल्टा डी भिगोसँग खेल्दै छ । यस खेलले प्रस्ट पार्नेछ कि जिदान कहिल्यै टाढा भएकै थिएनन् ।

प्रकाशित : फाल्गुन २९, २०७५ १०:२७
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT