मलाई मार्न टिम खटाउने साथीहरु देखेर दया लाग्छ : दाहाल

टीकाराम तामाङ

काठमाडौँ — नेकपा अध्यक्ष एवं पूर्वप्रधानमन्त्री पुष्पकमल दाहालले आफूलाई मार्न नेत्रविक्रम चन्दले टोली खटाएको सूचना सरकारले दिएको भन्दै उनीहरुप्रति दया लागेको बताएका छन् । नेकपा कार्यालय पेरिसडाँडामा बिहीबार आयोजित सहिद, बेपत्ता परिवार अभिनन्दन कार्यक्रमलाई सम्बोधन गर्दै दाहालले आफूलाई पहिला मार्नुपर्ने भनेर चन्द समूहले माइन्यूट गरेको सूचना सरकारले दिएको खुलासा गरे ।

'सरकारबाटै जानकारी आयो प्रचण्डलाई नै पहिला मार्नुपर्छ भनेर माइन्यूट गर्नु भा'छ रे, टिम पनि खटाउनु छ रे !', चन्दलाई लक्षित गर्दै उनले भने, 'ती साथीहरुलाई देखेर मलाई साँच्चै दया, माया लागेको छ।' दाहालको प्रश्न थियो, 'मलाई मारेर संघीय लोकतान्त्रिक गणतन्त्र वा परिवर्तन बच्ने हो त?'

सरकारले ऐन कानुनअनुसार कारबाही गर्ने भन्दै उनले राम्रोसँग सोच्न सुझाव राखिरहेको बताए। 'राज्यले जे गर्नुपर्ने हो ऐन, कानुनअनुसार गर्छ, मुख्य कुरा परिस्थितिलाई सही ढंगले विश्लेषण, मूल्यांकन गरेर परिस्थितिअनुसार अघि बढ्ने हो' उनको भनाइ थियो। तत्कालीन नेकपा माओवादीले २०५२ सालमा थालेको 'जनयुद्ध' को परिस्थिति नभएको उनले ‍‌चन्दलाई सुझाए। '०५२ सालजस्तो परस्थिति नितान्त छैन, यो ०७५ साल हो' अध्यक्ष दाहालले भने, 'ठूलो राजनीतिक परिर्वतन हाम्रै कारणले आएको छ। यसलाई उल्ट्याउने भनेकै फेरि निरंकुशतातर्फ नेपाल लैजाने हो, विचार गर्न विशेष रुपले आग्रह गर्न चाहन्छ।' देशमा चन्दा, लुटपाट र आपराधिक गतिविधिमा लागेको भन्दै चन्द समूहको गतिविधिमा मंगलबार बसेको मन्त्रिपरिषद् बैठकले प्रतिबन्ध लगाउने निर्णय गरिसकेको छ।

अध्यक्ष दाहालले चन्द समूहलाई नक्कल, षड्यन्त्र तथा नाटक गरेर परीक्षामा पास नहुने समेत बताएका छन्। उनले भने, 'कुनै पनि आन्दोलनलाई सफल बनाउन त्यो समय, अवस्था तथा आवश्यकताअनुसारको सक्कलताबाट मात्रै सफल हुन्छ।' उनले कसैको नक्कल गर्दै धाँकधम्की दिँदै आफ्नो अधिपत्य देखाउँछु भन्ने कसैलाई सपना नदेख्न चेतावनी पनि दिए।

पार्टी एकीकरणबाट बलिदानको कृतिमानीलाई स्थापना गर्न सफल भएको बताउँदै उनले जनताको काम गर्दै जाँदा जनताले प्रचण्ड बनाएको हो, प्रचण्डको नक्कल गरेर वास्तविक प्रचण्ड हुन नसकिने धारणा राखे।

उनले जनताको त्याग र बलिदानीबाट नै समाजवादको आधार तयार भएको बताउँदै समाजवादको यात्रामा अघि बढेको तर त्यो रातारात आउन नसक्ने धारणा व्यक्त गरे। एकता र सहकार्यका साथ महान् समाजवादको उज्यालोमा पुग्न सकिने पनि उनले बताए। अध्यक्ष दाहालले शहीदहरु युगयुग बाँचेका हुन्छन् भन्दै जनयुद्ध र जनआन्दोलनका सबै शहीदको एकै ठाउँमा शहीदपार्क बनाउनेमा पार्टीमा सहमति भइसकेको जानकारी गराए।

भिडियो सौज्नय : अध्यक्ष दाहालको सचिवालय।

प्रकाशित : फाल्गुन ३०, २०७५ १६:२९
प्रतिक्रिया
पठाउनुहोस्
ADVERTISEMENT
ADVERTISEMENT

यो देश परेड खेल्ने मैदान होइन : सञ्चारमन्त्री

टीकाराम तामाङ

काठमाडौँ — सञ्चार तथा सूचना प्रविधिमन्त्री गोकुल बाँस्कोटाले सूचना प्रविधिसम्बन्धी विधेयकमाथि विभिन्न भ्रम र अफवाह फैलाइएको दाबी गर्दै सामाजिक सञ्जाल प्रयोगलाई व्यवस्थित गर्नमात्र कानुन बनाउन लागिएको बताएका छन् । सिंहदरबारमा बिहीबार आयोजित पत्रकार सम्मेलनमा मन्त्रिपरिषद्को निर्णय सार्वजनिक गर्दै बाँस्कोटाले सूचना प्रविधिको बढ्दो प्रयोगलाई रोक्ने वा नियन्त्रण गर्ने सरकारको उद्देश्य नरहेको स्पष्ट पारे ।


'निजी प्रयोजनबाहेक नेपालभित्र क्लाउड (सरभर) राख्नेले अनुमति लिनु पर्छ' सरकारका प्रवक्तासमेत रहेका बाँस्कोटाले भने, 'यो देश जहाँ जसले जे गर्दा पनि हुने, परेड खेल्ने मैदान होइन। तर, कुनै पनि सञ्जाल प्रतिबन्ध लगाउन खोजिएको होइन।'

उनले सामाजिक सञ्जालमा हुने असामाजिक र अनुशासनहीन गतिविधिलाई मात्र नियन्त्रण गर्न खोजिएको बताए। 'लेख्न, बोल्न पाउने अवस्था खत्तम हुने भयो भन्ने भ्रम फैलाइएको छ, त्यस्तो होइन। केही पनि रोकिंदैन' बाँस्कोटाले भने, 'तर बालबच्चा नै बिगार्ने, युवायुवती बिगार्ने, हिंसा भड्काउने, पोर्नोग्राफी बढी हुने खालका विषयवस्तुलाई कन्ट्रोल गर्न खोजिएको हो।' उनले सरकारले डिजिटल नेपालको परिकल्पना गरेको बताए।

सरकारले बुधबार संघीय संसद्‍मा पेस गरेको सूचना प्रविधिसम्बन्धी विधेयकमा सामाजिक सञ्जाल चलाउँदा दर्ता गर्नुपर्ने, सामाजिक सञ्जालमा गलत गतिविधि गरे ५ वर्ष जेल सजाय, १५ लाख रुपैयाँसम्मको जरिवानालगायतका प्रावधान प्रस्ताव गरिएकामा विरोध भइरहेको छ।

बाँस्कोटाले सूचना प्रविधि आविष्कार गर्ने र व्यापक प्रयोग भएका देशहरूमा समेत नियमन गर्ने कानुनी व्यवस्था रहेको बताए। 'बेलायतमा पनि यस्तो कानुन छ। त्यहाँ ६ महिनासम्म जेल सजाय, ५ हजार पाउन्ड जरिवाना छ' उनले भने। उनले त्यहाँ पनि सामाजिक सञ्जाल चलाउनासाथ थुन्ने नभइ कसैलाई अपमान हुने, क्षति पुग्ने काम गरेको भए उजुरीपछि मात्र कारबाही प्रक्रिया अगाडि बढाउने गरिएको बताए।

भारत, जर्मनी, अमेरिकासहित संसारका विभिन्न देशमा सूचना प्रविधिसम्बन्धी कानुनी व्यवस्था रहेको उल्लेख गर्दै उनले भने, 'प्रविधि प्रयोगलाई प्रोत्साहित गर्ने तर जथाभावी गर्नेलाई प्रोत्साहित गर्न सकिंदैन।' ती देशमा फेसबुक दर्ता गर्ने सिस्टम रहेको भन्दै नेपालमा पनि त्यस्तै गर्न खोजिएकोमा स्वतन्त्रता खोसिन लाग्यो भन्नु गलत हुने बाँस्कोटाको भनाइ थियो। 'अभिव्यक्ति स्वतन्त्रता हनन हुन लाग्यो भन्नु गम्भीर भूल हुनेछ।'

बाँस्कोटाले कुनै पनि नगारिकको अधिकार कुण्ठित हुने कानुन सरकारले नबनाउने उल्लेख गर्दै फेसबुक, ट्वीटरजस्ता सामाजिक सञ्जालमा फेक आईडी बनाएर भ्रम सिर्जना गर्ने, आत्महत्याको स्थिति आउन बाध्य पार्ने, जातीय सद्भाव, लैगिंक सद्भाव कायम हुन नदिने विषयमा कडाइ गर्न सरकारले विधेयक संसद्‍मा लगेको बताए।

उनले प्रविधिमा दिनहुँ क्रान्ति भइरहेको उल्लेख गर्दै त्यसको सदुपयोग गरेमा समाजको आधारशीला बन्न सक्ने र दुरुपयोग भए हाइड्रोजन बमभन्दा कम नहुने बताए।

प्रकाशित : फाल्गुन ९, २०७५ १७:२८
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT