निर्मला हत्या प्रकरण : ६ प्रहरीलाई धरौटीमा छाड्न आदेश

जिल्ला अदालतले यातना र प्रमाण नष्ट गरेको (सार्वजनिक न्याय विरुद्धको कसुर) आरोप लागेका निलम्बित डिएसपी ज्ञानबहादुर सेठी र प्रहरी निरीक्षक एकिन्द्र खड्कालाई यातना कसुरमा ५ लाख र सार्वजनिक न्याय विरुद्धको कसुरमा ४ लाख गरी जनही ९/९ लाख धरौटीमा छाड्न आदेश दिएको हो । सार्वजनिक न्याय विरुद्धको कसुर लागेका तत्कालीन प्रहरी निरीक्षक जगदीश भट्टलाई ४ लाख धरौटीमा छाड्न आदेश दिएको जिल्ला अदालत कञ्चनपुरका श्रेस्तेदार हरिकृष्ण अवस्थीले बताए ।

यसैगरी सार्वजनिक न्याय विरुद्धको कसुरमा सईहरु हरिसिंह धामीलाई साढे ३ लाख र राम सिंह धामीलाई ३ लाख तथा प्रहरी हवल्दार चाँदनी साउदलाई २ लाख ५० हजार धरौटीमा छाड्न आदेश दिएको हो । उनीहरु तीनै जना निलम्बित हुन् । सोमबारदेखि तीन दिनसम्म चलेको थुनछेक बहसपछि अदालतको उक्त आदेश आएको हो ।