शिक्षा उपसचिव १० घण्टा प्रहरी नियन्त्रणमा

निषेधित क्षेत्रमा धर्ना बसेकाले नियन्त्रणमा लिई सोधपुछ गरिएको हो : प्रहरी
सुदीप कैनी

काठमाडौँ — कर्मचारी समायोजनमा असन्तुष्टि जनाउँदै बिहीबार राजधानीको माइतीघर मण्डलमा धर्ना बसेका शिक्षा मन्त्रालयका उपसचिव ईश्वरीप्रसाद पोखरेललाई प्रहरीले १० घण्टा नियन्त्रणमा राखेर छाडेको छ । बिहान ८:३० बजे धर्ना बस्न माइतीघर पुगेका उनलाई महानगरीय प्रहरी वृत्त सिंहदबारको टोलीले नियन्त्रणमा लिएर साँझ ५:३० बजे मुक्त गरेको हो ।

Citizen

'धर्ना बस्ने तयारीमा माइतीघर मण्डल पुग्दै थिएँ,' उनले भने, 'यहाँ धर्ना बस्न पाउनुहुन्न भनेर उठाएर दिनभर प्रहरी कार्यालयमा लगेर राखे ।' उपसचिव पोखरेलले बुधबार साँझै धर्नाबारे मन्त्रालयका अधिकारी र पत्रकारलाई टेलिफोन गरी जानकारी गराएका थिए । उनले साताव्यापी धर्ना कार्यक्रम घोषणा गरेका छन् । दैनिक १० घण्टाका दरले माइतीघरमा धर्ना बस्ने कार्यक्रम थियो । शान्तिपूर्ण तरिकाले धर्ना बस्दा प्रहरीले हस्तक्षेप गरेको भन्दै उनले असन्तुष्टि जनाए ।

संघीय मामीला तथा सामान्य प्रशासन मन्त्रालयले अन्यायपूर्ण तरिकाले कर्मचारीको समायोजन गरेको उनको दाबी छ । 'प्रशासनका कर्मचारी मालिक र अन्य सेवाका कर्मचारी दास हुने गरी भएको समायोजन मान्य छैन', उनले भने, 'अन्यायपूर्ण समायोजनको विरोधमा दबाब दिन धर्ना कार्यक्रम तय गरेको हुँ ।'

शिक्षाका कर्मचारी समायोजनप्रति असन्तुष्ट छन् । पोखरेल अर्घाखाँचीको भूमिकास्थान नगरपालिकामा समायोजनमा परेका छन् । नीति र मापदण्डबिनै समायोजन गरिएको भन्दै उनले पत्र बुझेका छैनन् ।

प्रहरी वृत्त सिंहदबारले वहालवाल कर्मचारी निषेधित क्षेत्रमा धर्ना बसेकाले नियन्त्रणमा लिएको जनाएको छ । नियन्त्रणपछि सोधपुछ गरेर पोखरेललाई छाडिएको वृत्तका अधिकारीहरूले बताए । साँझ आफन्तको जिम्मा लगाएर उनलाई मुक्त गरिएको हो ।

उपसचिव पोखरेलेल शुक्रबार पनि धर्ना बस्ने जनाएका छन् । 'म शान्तिपूर्ण तरिकाले धर्ना बस्न गएको थिएँ, प्रहरीले व्यानर पनि जफत गरे,' उनले भने, 'भोलि -शुक्रबार) पनि जान्छु ।' संघीयताको मर्मविपरीत कर्मचारी समायोजन भएकाले नसच्याएसम्म आन्दोलन जारी राख्ने उनले चेतावनी दिए । 'केन्द्र सरकार हावी भएको छ, प्रदेश, स्थानीय सरकार र तल्लो तहका कर्मचारी मर्कामा परेका छन्,' उनले भने ।

यसअघि पनि असोजमा उनलाई शिक्षा मन्त्रालयले नवलपरासीको देवचुली नगरपालिकामा सरुवा गरेको थियो । उनी त्यहाँ हाजिर हुन गएनन् । कर्मचारी सरुवाको विषयमा सरकार र मन्त्रालयविरुद्ध टिकाटिप्पणी गरेको भन्दै उनीसँग शिक्षा सचिव खगराज बरालले स्पष्टीकरण सोधका थिए । पोखरेलले प्रधानमन्त्रीसहित १० निकायलाई स्पष्टीकरणको जवाफ लेखेका थिए ।

प्रकाशित : फाल्गुन ३०, २०७५ २०:३०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

२५ वर्षदेखिका अस्थायी शिक्षक स्थायी बन्दै, यसै वर्ष लाइसेन्स परीक्षा लिइने

कान्तिपुर संवाददाता

काठमाडौँ — अढाई दशकभन्दा बढी अस्थायी रूपमा कार्यरत शिक्षक स्थायी बन्ने भएका छन् । शिक्षक सेवा आयोगले तीनै तहमा कार्यरत अस्थायी शिक्षकलाई आन्तरिक प्रतिस्पर्धाबाट स्थायी गर्न सुरु गरेको छ । २०५६ सालमा स्थापना भएयता आयोगले यसपालि एकै वर्ष करिब २७ हजार शिक्षक पदपूर्ति प्रक्रिया अघि बढाएको छ ।

तीनवटै तहका गरी करिब १३ हजार अस्थायीका साथै १२ हजार ७ सय ३९ पदमा खुला प्रतिस्पर्धाबाट स्थायी हुँदै छन् ।

पदपूर्ति प्रक्रियालाई तहगत आधारमा २०४९ सालअघि, ०६१ सालअघि र २०७२ सालअघि गरी तीन फरक समूहमा अस्थायीलाई प्रतिस्पर्धा गराइएको छ । हालै मात्र प्रकाशित निम्न माध्यमिक तहको शिक्षक परीक्षामा १ हजार ९ सय ९ जना उत्तीर्ण भएका छन् । तीमध्ये ५१ जना २०४९ सालअघि र ८ सय ५९ जना ०६१ साल अघिदेखि अस्थायी छन् । उत्तीर्ण भएका शिक्षकहरू नेपाली, अंग्रेजी, गणित, विज्ञान, सामाजिक, गणित विज्ञान र कम्प्युटर विषयका हुन् ।

सबैभन्दा धेरै अस्थायी शिक्षक प्राथमिक तहमा छन् । प्राथमिक र माध्यमिक तहको नतिजा प्रकाशनक्रममा छ । 'आयोगले विभिन्न तह, खण्ड र विषयगत गरी दुई सयभन्दा बढी विज्ञापनको पदपूर्ति गर्दै छ,' आयोगका प्रशासकीय प्रमुख डा. तुलसी थपलियाले भने, 'मावि र प्राविको नतिजा प्रकाशन गर्न अझै केही समय लाग्छ ।'

लाइसेन्स यसै वर्ष
शिक्षक सेवा आयोगले यही आर्थिक वर्षभित्र अध्यापन अनुमतिपत्र (शिक्षक लाइसेन्स) को परीक्षा लिएर नतिजा प्रकाशन गर्ने तयारी गरेको छ । प्राविधिक कारणले २०६८ सालदेखि रोकिएको प्राथमिक तहको शिक्षक लाइसेन्ससमेत खुलाउने आयोगले जनाएको छ । शिक्षा ऐनमा विद्यालयलाई आधारभूत र माध्यमिक गरी दुई तह मात्र कायम गरिएपछि प्राथमिक शिक्षकका निम्ति लाइसेन्स रोकिएको थियो ।

'हामी चाँडै लाइसेन्स परीक्षा लिनेछौं,' प्रशासकीय प्रमुख थपलियाले भने, 'लाइसेन्स लिन योग्य उम्मेदवारले अनलाइनबाट फाराम भर्न पाउनेछन्, चाँडै जाँच लिइनेछ र असारभित्र नतिजा प्रकाशन भइसक्नेछ ।'

आयोगले नयाँ लाइसेन्स लिएका युवालाई लक्षित गरी खुला विज्ञापन आह्वान गर्ने थपलियाले बताए । मुलुकका ७७ वटै जिल्लाबाट लाइसेन्सको फाराम भरेर परीक्षा दिन पाउनेछन् । प्राथमिक तहका निम्ति विषय तोकिनेछैन भने कक्षा ६ देखि माथि अध्यापन गराउनेलाई विषयगत लाइसेन्स परीक्षा लिइनेछ ।

प्रकाशित : फाल्गुन ३०, २०७५ २०:२२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT