गैंडाको काल सेफ्टी ट्यांकी

भरतपुर २३, जगतपुरमा रहेको होटल टाइगर ल्यान्डको ट्यांकीमा परेर गैंडा मरेको हो । 'गैंडा मरेपछि हामीले होटल सञ्चालकलाई पत्र काटेर सोधपुछका लागि बोलाउने भएका छौं,' उनले भने । होटलको सेफ्टी ट्यांकीमा गैंडा परेको यो नै पहिलो घटना भने होइन । अघिल्लो वर्ष सौराहामा पनि एउटा गैंडा सेफ्टी ट्यांकीमा परेको थियो । त्यसलाई भने जीवितै उद्धार गरिएको थियो ।

तर, शनिबार त्यसो हुन सकेन । सौराहा घटनापछि चितवन निकुञ्जको पूर्वी सेक्टर कार्यालयले गत वर्षको माघ २६ मा सूचना निकालेर सेफ्टी ट्यांकी र गोबर ग्यासको खाल्डो पुर्न वा सुरक्षित तरिकाले बनाउन अपिल गरेको थियो । यसलाई बेवास्ता गरी दुर्घटना भए खाल्डो बनाउने सम्बन्धित व्यक्ति, संघसंस्था वा कार्यालय जिम्मेवार हुने निकुञ्जले चेतावनी दिएको थियो ।

टाइगर ल्यान्ड होटल निकुञ्ज मुख्यालयबाट नजिकै राप्ती नदी किनारमा छ । जहाँ गैंडा र अन्य वन्यजन्तु ओहोरदोहोर गर्छन् । निकुञ्जमा यो वर्ष रोग वा अन्य कारणले गैंडा मर्ने दर निकै उच्च छ । घिमिरेका अनुसार चोरी सिकार नभए पनि यो वर्ष शनिबारको घटनासहित निकुञ्ज क्षेत्रमा मर्ने गैंडाको संख्या ३९ पुगेको छ ।

उनका अनुसार २ गैंडा निकुञ्जबाहिर चितवनका जंगल क्षेत्रमा मरेका छन् । अघिल्लो आवमा मर्ने गैंडाको संख्या २६ थियो । एकसिंगे गैंडा लोप हुने अवस्थामा पुगेको दुर्लभ वन्यजन्तु हो । ०७२ को गणनाअनुसार नेपालमा गैंडाको संख्या ६ सय ४५ छ । जसमध्ये चितवन निकुञ्ज र यस आसपासको वन क्षेत्रमा सबैभन्दा धेरै ६ सय ५ गैंडा छन् । तर पछिल्लो समय गैंडा मरेका कारण संख्या घटेको हुन सक्ने अनुमान छ ।