ट्राफिक प्रहरीले भन्यो - 'लगानी सम्मेलनभरी ट्राफिक जाम हुँदैन'
काठमाडौँ — महानगरीय ट्राफिक महाशाखाले लगानी सम्मेलनका लागि सम्पूर्ण ट्राफिक व्यवस्थापनको तयारी पूरा भएको जनाएको छ । महाशाखा प्रमुख वसन्तकुमार पन्तका अनुसार त्रिभुवन अन्तराष्ट्रिय विमानस्थलदेखि सम्मेलनस्थल र बस्ने होटलसम्मको सम्पूर्ण ट्राफिक व्यवस्थापन पूरा भएको छ ।
‘अरु दिनजस्तै सर्वसाधारणले आवतजावत गर्न सक्छन्’ उनले भने, ‘कतै पनि सवारी आवागमनमा बाधा पुग्दैन ।’ सम्मेलनस्थल सोल्टीमा भएको भन्दै उनले सबै सडकमा सजिलै सवारी व्यवस्थापन गरिने बताए ।
प्रहरीका अनुसार सम्मेलनमा ६ सय १९ जना भिआईपी अर्थात विशिष्ठ अतिथीहरुको सहभागीता हुनेछ । लगानी सम्मेलनका बेला काठमाडौंको सवारी व्यवस्थापनमा नियमित ट्राफिक प्रहरीका अलवा प्रहरी वरिष्ठ उपरिक्षकको कमाण्डमा बनेको टिममा १ प्रहरी उपरिक्षक, ४ प्रहरी नायव निरिक्षक, २२ इन्सपेक्टर, १६८ असई सहित ७ सय ९० जना खटिनेछन् । नियमित खटिने सात सय सहित विशेष थपिने गरी झण्डै १५ सय हाराहारीमा ट्राफिक प्रहरी सवारी व्यवस्थापनमा खटिनेछन् ।
सम्मेलनमा आएका पाहुनाहरु रिफ्रेसमेन्टका लागि भन्दै भक्तपुर र पाटन दरबार स्क्वायरका अलवा चन्द्रागिरी, स्वयम्भू र पशुपतिनाथ जाने कार्यक्रम रहेको छ । प्रहरीले विशिष्ट पाहुनाहरुको भ्रमण हुने ति स्थानहरुमा पनि सवारी व्यवस्थापनको योजना बनाएको छ ।
प्रहरी प्रधान कार्यालयका अनुसार यसअघिको विमस्टेक सम्मेलनको जस्तो विशेष सुरक्षा योजना बनाइएको छैन् । प्रहरीले वाक थ्रु गेट, ब्यागेज एक्सरे मेसिन, भेहिकल स्क्यानर र मेटल डिटेक्टरको प्रयोग गर्नेछ । कार्यक्रमस्थल र आवासस्थलमा यस्ता सुरक्षा उपकरणहरुको प्रयोग गरिनेछ । सम्मेलन शुक्रबार ११ बजे प्रधानमन्त्री केपी ओलीले उद्घाटन गर्नेछन् ।
प्रकाशित : चैत्र १४, २०७५ १९:२०