चट्याङले २ को मृत्यु

मोरङको बुढीगंगा गाउँपालिका ३ की १० वर्षीया आराधना राजवंशीको चट्याङ लागेर मृत्यु भएको छ । पानी पर्न थालेपछि बाहिर रहेको गाईवस्तुलाई घर ल्याउन जाने क्रममा चट्याङ लागेर घाइते आराधनाको विराट मेडिकल अस्पतालमा उपचारको क्रममा मृत्यु भएको प्रहरीले जनायो ।

यस्तै, झापाको मेचीनगर नगरपालिका १५ ज्यामिरगढीका ४० वर्षीय प्रकाश राउतको चट्याङ लागेर मृत्यु भएको छ । उनकी पत्नी ३५ वर्षीया सुनिता राउत र भाउजु ३६ बर्षीया मञ्जु राउत घाइते भएको प्रहरीले जनायो ।

खेतमा काम गरिरहेको बेला चट्याङ लागेर उनीहरु घाइते भएका थिए । भद्रपुरस्थित ओमसाई पाथिभरा अस्पतालमा उपचारको क्रममा प्रकाशको मृत्यु भएको र उनकी पत्नी र भाउजुको उपचार भइरहेको प्रहरीले जनायो ।