समाचार लेख्दा साइबर अपराधमा पत्रकार पक्राउ

कान्तिपुर संवाददाता

पोखरा — बतास अर्गनाइजेसनका सञ्चालक सदस्य वीपेन्द्रराज बतासका विरुद्ध समाचार लेखेको आरोपमा प्रहरीले सोमबार पोखराको ताण्डव साप्ताहिकका सम्पादक अर्जुन गिरीलाई पक्राउ गरेको छ । 

पत्रकार अर्जुन गिरी ।

साइबर अपराध मुद्दामा कारबाहीका लागि उजुरी आएकाले केन्द्रीय अनुसन्धान ब्युराको आग्रहमा गिरीलाई पक्राउ गरिएको कास्कीका प्रहरी नायव उपरीक्षक रवीन्द्रमान गुरुङले बताए। ‘हामीलाई पक्राउ गरेर पठाइदिनु भनेकाले पठाउन लागेका हौँ,’ उनले भने, ‘आरोप र कसुरको अनुसन्धान केन्द्रले नै गर्छ।’

गिरीले गत शुक्रवार आफ्नो अखबारको अनलाइनमा जिल्ला प्रहरी कार्यालयमा बतास विरुद्ध जाहेरी दिन पुगेका पोखरा–६ का व्यवसायी मनोज श्रेष्ठ र जनकराज पहारीलाई उद्धृत गर्दै समाचार लेखेका थिए। जाहेरीमा श्रेष्ठले आफ्नो १ करोड ९८ लाख र पहारीले २ करोड २५ लाख बतासले ठगी गरेको दाबी गरेका छन्।

पक्राउ गरिएका गिरीलाई कास्की प्रहरीले काठमाडौँ पठाउने तयारी गरेको छ। ‘समाचार लेख्दा साइबर क्राइममा कसरी पक्राउ गर्न मिल्छ?,’ पत्रकार महासङ्घ कास्की अध्यक्ष दीपेन्द्र श्रेष्ठले भने, ‘काठमाडौँ लगेपनि आजै छाड्ने प्रक्रिया मिलाउन हामीले महासङ्घको केन्द्र र प्रेस काउन्सिलमा खबर गरेका छौँ।’

प्रकाशित : वैशाख २, २०७६ १४:१९
प्रतिक्रिया
पठाउनुहोस्

भन्सार छलेर ल्याएको करोड बढीको कुर्तासहित ३ जना पक्राउ

कान्तिपुर संवाददाता

काठमाडौँ — चेकिङमा रहेका प्रहरीलाई घुस दिएर भारतबाट भन्सार नतिरी ल्याएको करोड बढीको सामान उम्काउन खोज्ने ३ जनालाई प्रहरीले पक्राउ गरेको छ । 

दिल्ली-काठमाडौं चल्ने बसको छतमा फल्स बटम बनाएर ४३४७ थान महिलाले लगाउने कुर्तासुरुवाल लुकाएर विभिन्न नाका पार गरेर काठमाडौंसम्म ल्याएका थिए ।

महानगरीय प्रहरी परिसर काठमाडौंका डिएसपी होविन्द्र बोगटीका अनुसार बा५ख ४८४२ नम्बरलाई कामनपा-१५, चमतीबाट प्रहरीले नियन्त्रणमा लिएको हो । उनीहरुले अबैध रुपमा ल्याएको लत्ताकपडाहरु बरामद गर्ने क्रममा डिउटीमा खटिएको प्रहरीलाई ३ लाख ५० हजार रुपैयाँ दिई आर्थिक प्रलोभनमा पार्न खोजेका थिए ।

पक्राउ पर्नेहरुमा बसका चालक काठमाडौं महानगरपालिका-१५ स्वयम्भू बस्ने सर्लाही घर भएका २६ वर्षीय श्याम विश्वकर्मा, काठमाडौं महानगरपालिका-१४ कलंकी बस्ने सुर्खेत घर भएका ३२ वर्षीय दिपा रानामगर र नुवाकोट ककनी गाउँपालिका-२ घर भएका २९ वर्षीय भरत तामाङ रहेका छन् ।

महानगरीय प्रहरी परिसरले यस विषयमा थप अनुसन्धान भइरहेको बताएको छ । यस सम्बन्धमा प्रहरीले आवश्यक अनुसन्धान गरिरहेको छ ।

प्रकाशित : वैशाख २, २०७६ १३:१२
पूरा पढ्नुहोस्
प्रतिक्रिया
पठाउनुहोस्