रोल्पामा बन्दको प्रभाव : थवाङबाट हेलिकप्टरमा लिवाङ फर्किए मन्त्री पुन

काशीराम डाँगी

रोल्पा — सडकमार्गबाट जिल्ला आएका उर्जामन्त्री वर्षमान पुन नेत्रविक्रम चन्द समूहको बन्दमा परेपछि हेलिकप्टर मगाएर सदरमुकाम फर्केका छन् । जलजला क्षेत्रलाई 'पर्यटकीय स्थल' घोषणा गर्न सडक मार्गबाट बुधबार थबाङ पुगेका उर्जामन्त्री पुन बिहीबार सवा ९ बजेतिर हेलिकप्टरबाट सदरमुकाम आएका हुन् । 

बिहीबार बिहान साढे ९ बजे लिबाङमा मन्त्री पुनले तत्कालीन सशस्त्र द्वन्द्वमा मृत्यु भएका, घाइते, अपाङ्गता भएका व्यक्तिका परिवारलाई भेट्ने पूर्व निर्धारित कार्यक्रम आयोजना गरिएको छ।

Citizen

उक्त कार्यक्रम भेट्न मन्त्री पुन हेलिकप्टरबाटै आएका हुन्। उनी बुधबार थबाङमा आयोजित कार्यक्रमपछि त्यही बसेका थिए। थबाङमा बन्दको अघिल्लो रात चन्द समूहका कार्यकर्ताले नाराबाजी र राँके जुलुस निकालेका थिए।

थबाङमा प्रहरी खानतलासी
मन्त्री पुन थबाङ पुगेको साँझ गाउँ आसपासका डाँडाहरुमा चन्द समूहले राँके जुलुस र नाराबाजी गरेपछि प्रहरीले स्थानीयको घरमा खानतलासी गरेको थियो।

स्थानीयका अनुसार चन्दका कार्यकर्ता खोज्न गाउँ पसेको प्रहरीले स्थानीय महिला र बालबालिकालाई धम्क्याएको थियो। मन्त्रीको सुरक्षार्थ थबाङ पुगेको प्रहरीले स्थानीय चन्द समूहका नेता जयप्रकाश रोका प्रताप र युवा नेता अमित घर्तीमगरको घरमा जबर्जस्ती छिरेको र धम्क्याएको स्थानीयले बताएका छन्। 'प्रहरीले माथिको आदेश छ, तिमीहरुलाई ठिक पार्छौं भनेर धम्क्याए,' थबाङकी एक महिलाले भनिन्, 'प्रहरीले घरका ढोका समेत फुटाइदिएका छन्।'

मन्त्री पुनसँगै थबाङमा प्रमुख जिल्ला अधिकारी गञ्जबहादुर एमसी, प्रहरी नायब उपरीक्षक दीपक खड्का लगायतका सुरक्षा अधिकारी समेत उपस्थित थिए। उक्त टोलीका साथ थबाङमा प्रदेश सासद दीपकेन्द्र कुमार पुन र जिल्ला समन्वय समितिका प्रमुख राजबहादुर बुढा समेत पुगेका थिए।

बन्दको प्रभाव
आफूमाथिको प्रतिबन्ध फुकुवा र गिरफ्तार नेता कार्यकर्ता रिहाईको माग गर्दै चन्द समूहले बिहीबार आव्हान गरेको बन्दका कारण रोल्पामा जनजीवन प्रभावित भएको छ। बिहानैदेखि बजार, यातायातका साधन, शैक्षिक संस्था लगायत बन्द छन्।

कार्यकर्ता सडकमा नदेखिए पनि यातायातका साधन, शिक्षण संस्था तथा बजार बन्द छ। बन्दका कारण जिल्ला तथा ग्रामीण क्षेत्रबाट टाढा जान घरदेखि निस्केका यात्रुहरु अलपत्र परेका छन्। एम्बुलेन्स भने चल्न दिइएको छ।

बन्दको बढी प्रभाव यातायातका साधन र शिक्षण संस्थामा देखिएको जिल्ला प्रहरी कार्यालयका प्रवक्ता प्रहरी निरीक्षक लीलाराज आचार्यले बताए। उनका अनुसार जिल्लामा कुनै प्रकारको घटना भएको छैन। प्रहरीले रोल्पामा नेकपाका केही कार्यकर्ता र उक्त पार्टीमा आस्थावान शिक्षकलाई यस अघि नै नियन्त्रणमा लिइसकेको छ।

प्रकाशित : वैशाख ५, २०७६ १०:०७
प्रतिक्रिया
पठाउनुहोस्
ADVERTISEMENT
ADVERTISEMENT

बालिका बलात्कार आरोपमा पक्राउ 

माधव अर्याल

पाल्पा — गुल्मीमा १४ वर्षीया बालिका बलात्कार आरोपमा तानसेन नगरपालिका-५ का ४५ वर्षीय हनुमान भनिने समीर मियाँ पक्राउ परेका छन् ।

उनलाई गुल्मी छत्रकोट गाउँपालिकाकी १४ वर्षीया बालिकालाई बुधबार दिउँसो जर्बजस्ती करणी गरेको आरोपमा पक्राउ गरिएको जिल्ला प्रहरी कार्यालय गुल्मीले पक्राउ गरेको हो।

मामाघरबाट आमासँगै घर र्फकने क्रममा बालिका बलात्कारमा परेकी हुन्। मोटरसाइकलमा आएका मियाँले बालिकालाई घर पुर्‍याइदिने बहानामा जबर्जस्ती करणी गरेको गुल्मीका प्रहरी उपरीक्षक दिपककुमार बस्नेतले बताए।

आमाको सहमतिमा मोटरसाइकलमा लगेको र बाटोमा जबर्जस्ती गरेर पैसा दिएर भागेको प्रारम्भिक अनुसन्धानमा देखिएको प्रहरी उपरीक्षक बस्नेतले बताए। मियाँलाई अर्घाखाँचीको छत्रदेव गाउँपालिका अर्घातोषबाट बुधबार राति नै पक्राउ गरिएको हो।

कसैलाई नभन्नु भन्दै बालिकालाई ५ सय रुपैया दिएर मियाँ फरार भएका थिए। गुल्मी र अर्घाखाँचीको अर्घातोष प्रहरी चौकीबाट खटिएको प्रहरीले घरमा लुकेर बसेको अवस्थामा पक्राउ गरेको हो।

प्रकाशित : वैशाख ५, २०७६ ०९:५४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT