भर्ना अभियान : मुख्यमन्त्री र मन्त्रीले चासो दिएनन्

कान्तिपुर संवाददाता

विराटनगर — प्रदेश १ का मुख्यमन्त्री शेरधन राईले अघिल्लो वर्ष विद्यार्थी भर्ना अभियानक्रममा अभिभावकत्व लिएका अल्पसंख्यक समुदायका तीन विद्यार्थीमध्ये दुई जना मात्रै उत्तीर्ण भएका छन् । 

राईले मोरङको रतुवामाई नगरपालिकास्थित सरस्वती माविमा नर्सरीमा अध्ययनरत रोजिना खातुन, सुदर्शन मर्मु र विनोद मुर्मुको अभिभावकत्व लिएका थिए । तीन बालबालिकामध्ये रोजिना र सुदर्शन उत्तीर्ण भएर कक्षा १ मा पुगे पनि विनोद उत्तीर्ण हुन नसकेको प्राचार्य यज्ञनाथ भट्टराईले बताए । स्वास्थ्य समस्याका कारण नियमित विद्यालय आउन नसकेकाले कक्षागत मूल्यांकनमा विनोद असफल भएको उनले जानकारी दिए ।

प्राचार्य भट्टराईले भर्ना अभियानपछि मुख्यमन्त्री राई या उनको सचिवालयले सम्पर्क नराखेको बताए । अभिभावकत्व लिएकै बेला बालबालिकालाई खाद्यान्न र पोसाक वितरण गरिए पनि त्यसपछि सोधीखोजी नगरिएको उनले जनाए ।

‘मुख्यमन्त्रीज्यूले अभिभावकत्व ग्रहण गर्नुभयो तर उनीहरूको पठनपाठन के कस्तो छ, नियमित विद्यालय आइरहेका छन्/छैनन् भन्ने विषयमा चासो राख्नुभएको छैन,’ उनले भने, ‘नयाँ भर्ना अभियान सुरु भइसक्यो तर परीक्षाको नतिजासम्म उहाँले सोध्नुभएको छैन ।’ रोजिनाकी आमा रवेसा खातुनले मुख्यमन्त्री राईले भर्नाको बेला दुई बोरा चामल, एक जोर पोसाक, दुई केजी दाल र कापीकलम दिएको बताइन् । त्यसपछि सम्पर्क नगरेको उनको गुनासो छ ।

मुख्यमन्त्री राईका प्रेस संयोजक ध्रुव सुवेदीले भने मुख्यमन्त्रीको कार्यव्यस्तताका कारण विद्यालयसम्मै पुग्न नसकेको भए पनि स्थानीय तहसँग समन्वय गरेर उनीहरूको विषयमा जानकारी लिइरहेको बताए ।

संघीय सरकारका सामान्य प्रशासनमन्त्री लालबाबु पण्डितले अभिभावकत्व लिएका मोरङ बूढीगंगा गाउँपालिकाका अनिशा सरदार र नीरज ठाकुर दुवै उत्तीर्ण भएका छन् । अनिशा बीपी प्राविमा ५ मा र नीरज लक्ष्मी माविमा ७ कक्षामा पुगेका छन् ।

बीपी प्राविका प्राचार्य महेश खाँले मन्त्री पण्डितले एकपटक उनीहरूलाई खाद्यान्न, कापीकलम र एक थान पोसाक दिनेबाहेक सहयोग नगरेको बताए । विभिन्न कार्यक्रममा धेरै पटक बूढीगंगा पुगे पनि मन्त्री पण्डित विद्यार्थीको अवस्था बुझ्न नआएको उनले जानकारी दिए ।

लक्ष्मी माविका प्राचार्य हरि खतिवडाले मन्त्रीले विद्यार्थीको अभिभावकत्व ग्रहण गरेको विषयमा जानकारी नभएको बताए । ‘मन्त्रीले अभिभावकत्व ग्रहण गरेको विषयमा मलाई थाहा छैन,’ उनले भने, ‘नीरज गत वर्षदेखि हाम्रो विद्यालयमा आएको हो तर मलाई अहिलेसम्म उनको अभिभावकत्व मन्त्री लालबाबु पण्डितले लिएको थाहा थिएन ।’

बिनु तिम्सिना (प्रशिक्षार्थी)

प्रकाशित : वैशाख ८, २०७६ ०८:२२
प्रतिक्रिया
पठाउनुहोस्

भारतीय प्रधान न्यायाधीशमाथि यौन दुर्व्यवहार आरोप

एएफपी

नयाँदिल्ली — भारतीय सर्वोच्च अदालतका प्रधान न्यायाधीश रञ्जन गोगोईमाथि यौन उत्पीडनको आरोप लागेको छ । एक पूर्व सहयोगीले उनीमाथि यौन उत्पीडन गरेको आरोप लगाएकी हुन् ।

यौन उत्पीडन आरोप लगाउने ३५ वर्षीया महिलाले सर्वोच्चका सबै (२२ जना) न्यायाधीशलाई शुक्रबार पत्र लेखी आफूलाई गोगोईले सरकारी निवासस्थित कार्यालयमा गत वर्षको अक्टोबरमा दुई पटकसम्म यौन दुर्व्यवहारको प्रयास गरेको बताएकी छन् ।

प्रधान न्यायाधीश गोगोईले आफूविरुद्ध अदालतका पूर्वकर्मचारीले लगाएको आरोप ‘अविश्वसनीय’ रहेको प्रतिक्रिया दिएका छन् । उनले आफूलाई महत्त्वपूर्ण मुद्दाको सुनुवाइ गर्न रोक लगाउने दुर्भावनाबाट यो प्रेरित अभिव्यक्ति मात्र भएको प्रतिक्रिया दिँदै आरोपको खण्डन गरेका छन् । यस क्रममा प्रधान न्यायाधीश गोगोईले आफूमाथि लागेको आरोप आधारहीन रहेको र यसको पछाडी कुनै ठूलो शक्तिको हात हुन सक्ने प्रतिक्रिया दिएका छन् ।

आफूमाथि लागेको आरोप अस्वीकार गर्दै गोगोईले भने, ‘यो न्यायपालिकाको स्वतन्त्रतामाथि खतराको संकेत हो ।’ उनले यो आरोप न्यायपालिकालाई अस्थिर बनाउनका लागि गरिएको एक षड्यन्त्र भएको समेत बताए । ‘यसका पछि ठूलो शक्ति लागेको हुन सक्छ,’ उनले भने, ‘यस्तो अवस्थामा काम गर्नुपर्‍यो भने राम्रा मान्छे यो अफिसमा कहिल्यै काम गर्न आउँदैनन् ।’ प्रधान न्यायाधीश गोगोईले ती महिलाको आपराधिक पृष्ठभूमि भएको बताए । ‘ती महिलालाई सर्वोच्चमा कसरी जागिर मिल्यो ? जब कि उसको विरुद्ध आपराधिक मुद्दा छ । यसको पनि जाँच हुनुपर्छ,’ उनले भने ।

महिलाले गोगोईले आफूमाथि यौन उत्पीडन गरेको, उनको प्रस्तावमा सहमत नभएपछि जागिरबाट हटाएको र आफ्नो परिवारलाई विभिन्न तरिकाले प्रताडित गरेको आरोपसमेत लगाएकी छन् । महिलाले पत्रमा लेखेकी छन्, ‘उहाँले मलाई मेरो कम्मरमा समात्नुभयो, शरीरका सबै अंगमा हात लगाउनुभयो र मलाई उहाँको शरीरतर्फ अँठ्याउनुभयो ।’

यसैबीच, प्रधान न्यायाधीशले आफूमाथि लागेको आरोपको सुनवाइ आफैं संलग्न रहेको बेन्चबाट गरेका छन् । प्रधानन्याधीश गोगोईविरुद्ध लागेको यौन उत्पीडनको आरोपमाथि सर्वोच्च अदालतमा शनिबार प्रधान न्यायाधीश रञ्जन गोगोई, न्यायाधीश अरुण मिश्रा र सञ्जीव खन्ना रहेको विशेषबेन्चमा सुनुवाइ भएको हो ।

बेन्चले प्रधान न्यायाधीशमाथिको आरोपबारे अन्य न्यायाधीशसहितको एक विशेष बेन्चमा सुनुवाइ हुने जनाएको छ । आफैं आरोपित भएको अवस्थामा बेच्चमा बस्नु गलत भएको प्रतिक्रिया केही कानुन व्यवसायीहरूले दिएका छन् । महिला कानुन व्यवसायीहरूले यस प्रकारको सुनवाइलाई यौन उत्पीडन आरोपका लागि निर्धारित प्रक्रियाकोउल्लंघन भएको बताएका छन् ।

गोगोईको यात्रा
भारतको पूर्वोत्तर राज्यबाट प्रधान न्यायाधीश बन्ने गोगोई पहिलो व्यक्ति हुन् । उनी भारतको ४६ औं प्रमुख न्यायाधीशका रूपमा कार्यरत छन् । उनको कार्यकाल १७ नोभेम्बर २०१९ सम्म रहेको छ । १८ नोभेम्बर १९५४ मा जन्मेका गोगोईले सन १९७८ मा कानुनी सेवाका लागि आफ्नो नाम दर्ता गराएका थिए । उनी गुवाहाटी उच्च अदालतमा संवैधानिक र कम्पनी विषयमा बहसहरू गरेका थिए ।

२८ फेब्रुअरी २००१ मा गुवाहाटी उच्च अदालतले उनलाई स्थायी न्यायाधीशमा नियुक्त गरेको थियो । ९ सेप्टेम्बर २०१० मा उनलाई पन्जाब र हरियाणा उच्च अदालतमा सरुवा गरिएको थियो । उनलाई १२ फेब्रुअरी २०११ मा पन्जाब र हरियाणा उच्च अदालतको मुख्य न्यायाधीश नियुक्त गरियो । २३ अप्रिल २०१२ मा सर्वोच्च अदालतको न्यायाधीशमाउनी नियुक्त भएका थिए ।

पछि ३ अक्टोबर २०१८ मा उनी भारतको सर्वोच्च अदालतका प्रधान न्यायाधीश बने । उनले असमको राष्ट्रिय नागरिक रजिस्टार, सांसद तथा विद्यालयकहरूका लागि विशेष सुनुवाइका लागि विशेष अदालतहरू गठन, राजीव गान्धी हत्याकाण्डका अभियुक्तहरूलाई आजीवन कराबासको सजायमाकमी, लोकपालको नियुक्तिसहितका विभिन्नविषयहरूमा महत्त्वपूर्ण फैसला आफ्नो कार्यकालमा दिइसकेका छन् ।

प्रकाशित : वैशाख ८, २०७६ ०८:२१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT