‘तारा एयर रामेछाप विमानस्थल बाहिरको तारजालीमा ठोकिएर धावनमार्गबाट चिप्लिएको देखियो’

टीकाप्रसाद भट्ट, सुरज कुँवर

रामेछाप — सोमबार बिहान रामेछाप विमानस्थलमा अवतरण गर्ने क्रममा तारा एयरको जहाजले विमानस्थलको धावनमार्गभन्दा लगभग ५० मिटर वर रहेको तारबारलाई छोएर धावनमार्गबाट चिप्लिएको देखिएको छ ।

रातो घेरा भित्र तारा एयरको विमान ठोकिएर भत्किएको बार । इन्सेटमा धावनमार्गमा चिप्लिएको विमान । तस्बिर : टीका भट्ट

अवतरणको क्रममा रामेछाप विमानस्थलको धावनमार्गभन्दा झण्डै ५० मिटर बाहिरैदेखि तारा एयरको नाईन एन एकेके कलसाइनको डोर्नियर जहाजले तारजाली तथा त्यसलाई अड्याउन प्रयोग भएको सिमेन्टको पोललाई ठक्कर दिँदै धावनमार्गमा पसेको त्रिभुवन अन्तर्राष्ट्रिय विमानस्थलका प्रवक्ता प्रतापबाबु तिवारीले पनि पुष्टि गरेका छन्।

उनको अनुसार तारजाली र पोललाई ठक्कर दिएपछि जहाज असन्तुलित हुँदै धावनमार्गबाट तीन सय मिटर दाहिनेतर्फ चिप्लिएको थियो।


तारा एयरको विमान ठोकिएर भत्किएको बार र धावनमार्गमा चिप्लिएको विमान। तस्बिर : टीका भट्ट

दुर्घटना लगत्तै रामेछाप विमानस्थल कार्यालय तथा तारा एयरले भने जहाजको अगाडिको टायर पड्किएर विमान धसिएको दाबी गरेको थियो

‘हामी धन्नले बाँच्यौं,’ धावनमार्गको उत्तरतर्फको तरकारीबारीमा काम गरिरहेकी दानकुमारी श्रेष्ठले भनिन्, ‘हाम्रो टाउको जोगियो, जहाज विमानस्थल बाहिर रहेको सिमेन्टको पोल, बाँसलाई हान्दै बत्तिएर धावनमार्गमा धसिएको हो। भित्र गएपछि के भयो थाहा भएन। थोरै तल गरेको भए ५ जनाको एकै चिहान हुने थियो।’ विमानले केहि पोल भाँचेको छ, भने गाडिएका बाँसहरु बंग्याएको छ।
लुक्लातर्फबाट आउँदा अधिकांश विमान उत्तरी धावनमार्ग भएर अवतरण गर्छन्। विमानस्थलको तारबारभन्दा करिव ५० मिटर भित्र मात्र धावनमार्ग पर्छ। सोमबार तारा एयरको विमान भने विमानस्थलको ५० मिटर बाहिरै रहेका पोल र बाँस हिर्काउँदै छिरेको थियो।

काठमाडौंबाट सोलुको लुक्लाका लागि १४ जना विदेशी पर्यटक बोकेर उडेको उक्त जहाज मौसम बिग्रिएपछि रामेछाप विमानस्थलमा अवतरणका लागि डाईभर्ट भएको थियो। ‘जहाज भयानक दुर्घटनाबाट जोगियो धन्न कसैलाई केही भएन,’ स्थानीय रुद्र श्रेष्ठले भने।

‘चालकले त्यति धेरै तलबाट यस अघि कहिल्यै विमान ल्याएका थिएनन्,’ दानकुमारी श्रेष्ठले भनिन्, ‘हामी सधैं त्यतै हुन्छौं। अघि पछि धेरै माथिबाट जहाज धावनमार्ग तिर जान्थे।’
उडान र अवतरण ठप्प
यसैबीच धावनमार्ग अवरुद्ध हुने गरी विमान दुर्घटनामा परेको पछि सबै उडान र अवतरण रोकिएका छन्। लुक्ला उडानका लागि रामेछाप विमानस्थल पुगेका सयौं विदेशी पर्यटक विमानस्थलमै अलपत्र छन्। जहाजलाई छेउ लगाउनका लागि केही प्राविधिक जुटेका छन्।


प्रकाशित : वैशाख ९, २०७६ १८:३४
ADVERTISEMENT
प्रतिक्रिया
पठाउनुहोस्

सुन तस्करीमा संलग्न विदेशमा भएपनि समातिन्छन्  : प्रहरी महानिरीक्षक

जनकराज सापकोटा

काठमाडौँ — प्रहरी महानिरीक्षक सर्वेन्द्र खनालले संगठित सुन तस्करीका फरार अभियुक्तहरुलाई देशबाहिरबाट पनि पक्राउ गरेर ल्याउने काम भइरहेको बताएका छन् । प्रहरी महानिरीक्षकको रुपमा एक वर्षे कार्यसमिक्षा सुनाउने क्रममा खनालले संगठित सुन तस्करी रोक्ने काममा कुनै कसुर बाँकी नराखीएको बताएका हुन् ।

फाइल तस्बिर ।


प्रहरी प्रधान कार्यालयले २०७५ सालभरमिा ७८ केजी ८ सय ७६ ग्राम अवैध सुन बरामद गरेको पनि जनाएको छ। अवैध सुनबाट मात्रै प्रहरीले ४५ करोड ४ लाख ६० हजार ६५ रुपैया राजश्व असुली भएको र अवैध सुन ओसारपसारमा १ सय ३७ जना पक्राउ परेको जनाएको छ।

प्रहरीको कार्यसमिक्षा सुनाउने क्रममा प्रवक्ता एसपी उत्तम सुवेदीले संगठित सुन तस्करीमा संग्लन भरिया र दोस्रो तहका मान्छे समातिएको बताएका थिए। संगठित सुन तस्करीका पहिलो तहका मान्छे किन नसमातिएका भन्ने पत्रकारको प्रश्नमा प्रहरी महानिरीक्षक खनालले विदेशमा बसेर सुन तस्करीमा संग्लन रहेकालाई पनि पक्राउ गर्ने प्रयास भएको बताए।

उनले गोरे भनिने चुणामणी उप्रेती संग्लन भएर ल्याइएको ३३ किलो सुनको विषयमा भने उति खुलेर बोलेनन्। प्रहरी महानिरीक्षकले सरकारी समितिले यसमा काम थालेको र आफूहरुले समितिलाई सघाएको बताएपनि तस्करीको सुन हराएको विषयमा थप बोलेनन्।


तथ्यांक :
अवैध सुन बरामद : ७८ केजी ८ सय ७६ ग्राम

राजश्व असुली : ४५ करोड ४ लाख ६० हजार ६५

सुन तस्करीमा संग्लन प्रतिवादी : १३७

प्रकाशित : वैशाख ९, २०७६ १७:०३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT