तारा एयर दुर्घटनापछि अवरुद्ध रामेछाप विमानस्थल सुचारु

काठमाडौंबाट लुक्ला जान थालेको उक्त एयरको नाईन एन एकेके कलसाइनको डोर्नियर विमान मौसम प्रतिकुल भएपछि डाईभर्ट भएर रामेछाप विमानस्थलमा अवतरण गर्न लाग्दा विमानस्थल भन्दा बाहिरै देखि ठोक्किँदै धावन मार्गमा पसेको थियो ।

विमानस्थल उत्तरतर्फ तरकारी बालीमा हालेका थांग्रा, विमानस्थल सुरक्षाका लागि लगाइएको तारबारमा ठोक्किएर धावनमार्गमा हुत्तिदै पश्चिमतर्फको माटोमा पुगेर विमान अडि्कएको थियो । विमानमा १४ यात्रु र चालक दलका ३ सदस्य सवार थिए । उनिहरु सबै सकुशल छन् ।

विमान दुर्घटना पछि काठमाडौंबाट पुगेका प्राविधिकहरुले परिक्षण र जाँच सुरु गरेका थिए । अपरान्ह धावनमार्गमा अन्य विमानको अवतरण रोकिने गरी अड्किएको उक्त विमानलाई तानेर छेउ लगाइएको थियो । रामेछाप नागरिक उडड्यन कार्यालयले मंगलबार बिहानै देखि उडान सुचारु गरेको जनाएको छ ।

काठमाडौं विमानस्थल मर्मतका लागि बिहान ८ बजेसम्म बन्द हुने भएकाले लुक्लातर्फको उडान समयमा नै गर्न निजी वायु कम्पनीहरुले रामेछाप विमानस्थल प्रयोग गर्दै आएका छन् । तारा, समिट र सिता एयरले लुक्काका लागि रामेछापबाट सरदर दैनिक ३५ उडान गर्छन् ।