विस्फोटका आरोपी ६ जनालाई पुर्पक्ष थुनामा राख्न जिल्ला अदालतको आदेश 

कान्तिपुर संवाददाता

काठमाडौँ — जिल्ला अदालत ललितपुरले नख्खुस्थित एनसेलको टावर विस्फोटका आरोपीहरुलाई पुर्पक्ष थुनामा राख्न आदेश दिएको छ । न्यायाधीश अवनी मैनाली (भट्टराई)को इजलासले चन्द समूहका नेता हेमन्तप्रकाश ओलीसहित ६ जनालाई पुर्पक्ष थुनामा पठाएको अदालतका स्रेस्तेदार चन्द्रप्रकाश तिवारीले बताए ।

महानगरीय प्रहरी अपराध महाशाखा र जिल्ला प्रहरी काभ्रेबाट खटिएको टोलीले नख्खुस्थित एनसेल कार्यालय बाहिर भएको विस्फोटमा संग्लन भएको आरोपमा गत चैत ९ गते काभ्रेबाट नेत्रविक्रम चन्द समूहका तेस्रो वरीयताका नेता हेमन्तप्रकाश ओलीसहित नौ जनालाई पक्राउ गरेको थियो ।

Citizen


अदालतमा पेस गरिएकाहरुलाई प्रहरीले कर्तव्य ज्यान, बम विस्फोट र राज्य विरुद्धको अपराधमा मुद्दा चलाएको छ । प्रहरी परिसर ललितपुरले घटनाको बेलाको सिसिटिभी फुटेज र प्रतिवादीहरुसँग प्रहरीले गरेको बयानको भिडियो सामाग्री पनि अदालतमा बुझाएको छ । प्रहरी स्रोतका अनुसार सिसिटिभी फुटेजमा प्रतिवादीहरु सूर्य भुजेल र जुम्ली भनिने वीरबहादुर खडायतलाई पनि देखिएको छ । प्रहरीले वीरबहादुरले बमलाई एनसेलको कार्यालयभित्र लगेर राखेको समेत देखिएको भन्दै उनीमाथि आरोप लगाएको थियो ।

उक्त घटनामा ओलीसहित रामकृष्ण खतिवडा, शिव धिमाल, दयाहाङ भनिने डिकेन्द्र राई, ईश्वर दमाई, जुम्ली भनिने वीरबहादुर कडायतलाई थुनामा पठाएको हो । घटनामा जोडिएका सूर्य भुजेल भने सर्वोच्च अदालतबाट बन्दी प्रत्यक्षीकरणको आदेशमार्फत रिहा भएका थिए । अदालतले फरार आरोपितको हकमा समान म्याद काट्ने भनी आदेश गरेको छ ।

प्रकाशित : वैशाख १०, २०७६ १९:३३
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

हवाई इन्धनको भाउ १० रुपैयाँ घट्यो

कान्तिपुर संवाददाता

काठमाडौँ — आयल निगमले हवाई इन्धन (अन्तराष्ट्रियतर्फ)को मूल्य प्रतिलिटर १० रुपैयाँ घटाउने निर्णय गरेको छ । उच्च मुनाफा राखेको आरोप लागेपछि निगमले हवाई इन्धन अन्तर्राष्ट्रियतर्फ मूल्य घटाउने निर्णय गरेको हो । निगमले घटेको मूल्य मंगलबार राति १२ बजेदेखि नै लागू हुने मंगलबार विज्ञप्तिमार्फत् जनाएका छन् ।

निगमका अनुसार हवाई इन्धन प्रतिलिटर १.१२५ अमेरिकी डलर छ। उक्त मूल्यमा १० रुपैयाँ घटाउने निर्णय गरेको हो। हाल हवाई इन्धन अन्तर्राष्ट्रियतर्फ प्रतिलिटर ५१.८३ रुपैयाँ नाफा राखेको छ। जसअनुसार १५ दिनमै २५ करोड ९२ लाख रुपैयाँ नाफा हुने प्रक्षेपण गरिएको छ।

कालोबजार ऐनअनुसार २० प्रतिशतभन्दा बढी मुनाफा राख्न पाइँदैन। निगम स्रोतका अनुसार आपूर्ति विभागले बढी मुनाफा लिएको पत्राचार गरेपछि सोमबार निगम बोर्ड बैठकले मूल्य घटाउने निर्णय गरेको हो। निगमले हवाई इन्धनको मूल्य घटाउने निर्णय गरे पनि पेट्रोल, डिजेल, मट्टितेल, हवाई इन्धन आन्तरिकको भने यथावत राखेको छ।

भारतीय आयल निगम (आइओसी)ले पठाएको नयाँ मूल्यसूची अनुसार अप्रिल १५ देखि ३० सम्म ३० करोड ३३ लाख नाफा हुने प्रक्षेपण गरेको छ।

प्रकाशित : वैशाख १०, २०७६ १९:२६
पूरा पढ्नुहोस्
प्रतिक्रिया
पठाउनुहोस्
ADVERTISEMENT