८ जनाविरुद्ध भ्रष्टाचार मुद्दा

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले मालपोत कार्यालय, धरानका अधिकृत फणीन्द्र भट्टराईसहित ५ जनाविरुद्ध बुधबार विशेष अदालतमा भ्रष्टाचार मुद्दा दायर गरेको छ । फिल्डबुकमा खगेन्द्रकुमारी गिरीको जग्गा भनी उल्लेख भएको धरान नगरपालिका वडा नं. ११ ग कि.नं. ३५ र ३६ का जग्गा उनको मृत्युपश्चात मिलेमतोमा खगेन्द्रकुमारी राईको भनी कर्णबहादुर राईका नाममा नामसारी गरी अनियमितता गरेकाले उनीहरूविरुद्ध मुद्दा दायर गरिएको अख्तियारले जनाएको छ ।

मुद्दा दायर गरिएकामा भट्टराईका अतिरिक्त नासु डिल्लीराम कोइराला, सर्वेक्षक योगेन्द्रप्रसाद यादव, खरिदार श्यामप्रसाद लो र कृष्णबहादुर राई छन् ।

त्यस्तै अख्तियारले डिभिजन वन कार्यालय, बाराका कार्यालय प्रमुख -डिभिजनल वन अधिकृत) शिवशंकर ठाकुर लोहार र सहायक वन अधिकृत गौरीशंकरप्रसाद केसरीविरुद्ध पनि भ्रष्टाचार मुद्दा दायर गरेको छ । उनीहरूले कवाडी सामानका लागि बोलपत्र आहवान गर्दा लिलामी परेपछि सामान उठाउन सेवाग्राहीसँग ९० हजार रुपैयाँ घूस लिएको अख्तियारको दाबी छ ।

अख्तियारले मंगलबार नै दैलेख, नारायण नगरपालिकाका इन्जिनियर टेकबहादुर हितानविरुद्ध मुद्दा दायर गरेको छ । हितानले नगरपालिकाको वडा नं. ९ स्थित सियाला सिँचाइ योजनामा मापदण्डविपरीत निर्माण कार्य गर्ने/गराउने र सर्त तथा मापदण्डविपरीत भएको कार्यलाई मापदण्डअनुसार भएको भनी झुटो प्रतिवेदन दिई अनियमितता गरेको आरोप छ । मुद्दा दायरसँगै ७ कर्मचारी सेवाबाट निलम्बित भएका छन् ।

अख्तियारले प्रहरी किताबखानाका कम्प्युटर अपरेटर सुरज केसीलाई मंगलबार घूस रकमसहित पक्राउ गरेको छ । निवृत्तिभरणपत्र बनाउने प्रयोजनका लागि सेवाग्राहीसँग लिएको १० हजार रुपैयाँ घूससहित केसी पक्राउ परेको अख्तियारले जनाएको छ । केसीलाई अख्तियारको हिरासतमा राखी थप छानबिन भइरहेको छ ।

प्रकाशित : वैशाख १०, २०७६ २०:५६
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

चन्द समूहका २ कार्यकर्ताले गरे आत्मसर्मपण

नारायण शर्मा

नवलपरासी — नेत्रविक्रम चन्द नेतृत्वको नेकपाका २ जिल्ला सदस्यले पार्टी परित्यागको घोषणा गरेका छन् । दुई सातादेखि जिल्ला प्रहरीको नियन्त्रणमा रहेका दीपककुमार घर्ती र पारसमणि गौतमले मंगलबार पत्रकार सम्मेलन गरी पार्टी परित्यागसहित प्रमुख जिल्ला अधिकारी दीपकराज नेपालसमक्ष आत्मसर्मण गरेका हुन् ।

दुवै जनालाई सत्तारुढ नेकपा पूर्वी नवलपरासीका नेताको जिम्मामा घर पुर्‍याइएको छ ।

चन्द समूहका जिल्ला नेतृत्वले सत्तारुढ नेकपाका जिल्ला नेताले सुराकी गरी पक्राउ गराएको र उनीहरुकै दबाबमा रिहा गराउने नाटक रचेको आरोप लगाएका छन् । आत्मसमर्पण गर्ने दुवै जना देबचुली नगरपालिका निवासी हुन् ।

चन्द समूहकै धनबहादुर मर्दनियालाई पनि प्रहरीले २७ दिनको हिरासत बसाइपछि आइतबार रिहा गरेको थियो ।

प्रकाशित : वैशाख १०, २०७६ २०:१७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT