कांग्रेस नेता ताम्राकारको निधन

कान्तिपुर संवाददाता

भैरहवा — पूर्वमन्त्री एवं नेपाली कांग्रेसका नेता रामकृष्ण ताम्राकारको ७६ वर्षको उमेरमा मंगलबार निधन भएको छ । उनी लामो समयदेखि बोनम्यारो क्यान्सरबाट पीडित थिए ।

२००० सालमा भोजपुरमा जन्मिएका उनी लामो समयसम्म भैरहवामा रहेर कांग्रेसबाट राजनीति गर्दै आएका थिए । पञ्चायतकालमा भूमिगत रहनुका साथै जेलनेलसमेत भोगेका थिए । पछिल्लो समय उनी कांग्रेसको केन्द्रीय सदस्य र कार्यवाहक कोषाध्यक्ष थिए ।

०४८ सालको निर्वाचनबाट उनी सांसद बनेका थिए । उनी उद्योग वाणिज्य तथा आपूर्ति र स्वास्थ्यमन्त्रीसमेत भए । ०५१ को मध्यावधि र ०५३ को रूपन्देही २ को उपनिर्वाचनमा पराजित ताम्राकार ०५६ मा भने विजयी भएका थिए । संविधानसभाको निर्वाचन ०६४ र ०७० मा उनी पराजित भएका थिए ।

उनीनिकट महेन्द्रकुमार श्रेष्ठका अनुसार झन्डै एक वर्षअघि ताम्राकारलाई क्यान्सर भएको पत्ता लागेको थियो । सुरुमा भारतको कोलकातामा उपचार गरेपछि फर्केर काठमाडौंमै उपचार जारी थियो । उपचारकै क्रममा काठमाडौंको ललितपुरस्थित अल्का अस्पतालमा मंगलबार अपराहन ४ बजे उनको निधन भएको थियो । अन्तिम श्रद्धाञ्जलीका लागि ताम्रकारको पार्थिव शरीरलाई बुधबार पार्टी केन्द्रीय कार्यालयमा विहान १० बजेदेखि दिउसो १ बजेसम्म राखिने छ । बुधबारनै पशुपति आर्यघाटमा दाहसंस्कार गरिनेछ । ताम्राकारका श्रीमती, एक छोरा र एक छोरी छन् ।

कांग्रेस केन्द्रीय कार्यसमितिको आकस्मिक बैठकले दिवंगत ताम्रकारप्रति उच्चसम्मान प्रकट गर्दै बुधबार देशभरका पार्टी केन्द्रीय कार्यालय बन्द गर्ने निर्णय गरेको छ । कांग्रेसले बुधबार, विहीबार र शुक्रबार पार्टी केन्द्रीय कार्यालय र मातहतका कार्यालयमा पार्टीको झन्डा आधा झुकाउने र १३ दिनसम्म शोक श्रद्धाञ्जली बाहेक पार्टीका सवै कार्यक्रम स्थगित गर्ने निर्णय पनि गरेको छ ।

जागरण अभियानको मिति परिवर्तन

लोकतन्त्र दिवसका अवसर पारेर कांग्रेसले बुधबार ७७ जिल्लामै सुरु गर्न लागेको पार्टीको जागरण अभियान बैशाख २५ गते सुरु हुने भएको छ । कांग्रेस केन्द्र्रीय कार्यालयद्धारा जारी विज्ञप्ति अनुसार १३ दिनसम्म पार्टीको औपचारिक कार्यक्रम नगर्ने निर्णय भएकाले जागरण अभियानको मिति सारिएको हो ।

प्रकाशित : वैशाख १०, २०७६ २१:१९
प्रतिक्रिया
पठाउनुहोस्
ADVERTISEMENT

८ जनाविरुद्ध भ्रष्टाचार मुद्दा

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले मालपोत कार्यालय, धरानका अधिकृत फणीन्द्र भट्टराईसहित ५ जनाविरुद्ध बुधबार विशेष अदालतमा भ्रष्टाचार मुद्दा दायर गरेको छ । फिल्डबुकमा खगेन्द्रकुमारी गिरीको जग्गा भनी उल्लेख भएको धरान नगरपालिका वडा नं. ११ ग कि.नं. ३५ र ३६ का जग्गा उनको मृत्युपश्चात मिलेमतोमा खगेन्द्रकुमारी राईको भनी कर्णबहादुर राईका नाममा नामसारी गरी अनियमितता गरेकाले उनीहरूविरुद्ध मुद्दा दायर गरिएको अख्तियारले जनाएको छ ।

मुद्दा दायर गरिएकामा भट्टराईका अतिरिक्त नासु डिल्लीराम कोइराला, सर्वेक्षक योगेन्द्रप्रसाद यादव, खरिदार श्यामप्रसाद लो र कृष्णबहादुर राई छन् ।

त्यस्तै अख्तियारले डिभिजन वन कार्यालय, बाराका कार्यालय प्रमुख -डिभिजनल वन अधिकृत) शिवशंकर ठाकुर लोहार र सहायक वन अधिकृत गौरीशंकरप्रसाद केसरीविरुद्ध पनि भ्रष्टाचार मुद्दा दायर गरेको छ । उनीहरूले कवाडी सामानका लागि बोलपत्र आहवान गर्दा लिलामी परेपछि सामान उठाउन सेवाग्राहीसँग ९० हजार रुपैयाँ घूस लिएको अख्तियारको दाबी छ ।

अख्तियारले मंगलबार नै दैलेख, नारायण नगरपालिकाका इन्जिनियर टेकबहादुर हितानविरुद्ध मुद्दा दायर गरेको छ । हितानले नगरपालिकाको वडा नं. ९ स्थित सियाला सिँचाइ योजनामा मापदण्डविपरीत निर्माण कार्य गर्ने/गराउने र सर्त तथा मापदण्डविपरीत भएको कार्यलाई मापदण्डअनुसार भएको भनी झुटो प्रतिवेदन दिई अनियमितता गरेको आरोप छ । मुद्दा दायरसँगै ७ कर्मचारी सेवाबाट निलम्बित भएका छन् ।

अख्तियारले प्रहरी किताबखानाका कम्प्युटर अपरेटर सुरज केसीलाई मंगलबार घूस रकमसहित पक्राउ गरेको छ । निवृत्तिभरणपत्र बनाउने प्रयोजनका लागि सेवाग्राहीसँग लिएको १० हजार रुपैयाँ घूससहित केसी पक्राउ परेको अख्तियारले जनाएको छ । केसीलाई अख्तियारको हिरासतमा राखी थप छानबिन भइरहेको छ ।

प्रकाशित : वैशाख १०, २०७६ २०:५६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT