सवाल-जवाफको क्रममा प्रधानमन्त्री तथा सांसदले प्रयोग गरेका अमर्यादित शब्द संसद अभिलेखबाट हटाउन निर्देशन

वैशाख २२ र २३ गते प्रतिनिधिसभा बैठकमा राष्ट्रपतिद्वारा प्रस्तुत नीति तथा कार्यक्रममा छलफल भएको थियो । बैशाख २४ गते प्रधानमन्त्रीले छलफलको क्रममा उठेका प्रश्नहरुको उत्तर दिएका थिए । प्रधानमन्त्रीलाई २४ गतेको बैठकमा प्रश्न सोध्ने क्रममा कांग्रेस सांसदले बोलेका र जवाफ दिने क्रममा प्रधानमन्त्री ओलीले बोलेका शब्दहरु मर्यादाविपरीत भएको भन्दै बैठकमा नै चर्काचर्की परेको थियो । प्रधानमन्त्रीले जवाफ दिने क्रममा प्रयोग गरेका केही शब्दहरु अमर्यादित रहेको भन्दै कांग्रेस सांसदहरुले अभिलेखबाट मेटाउन माग गर्दै विरोध गरेका थिए । विरोधकाबीच नै प्रधानमन्त्रीले जवाफ दिएका थिए भने त्यससँगै बहुमतको आधारमा नीति तथा कार्यक्रम पास भएको थियो ।

शुक्रबार बसेको प्रतिनिधिसभाको बैठकको सुरुमा नै सभामुख महराले अघिल्लो बैठकमा प्रधानमन्त्री तथा सांसदले प्रयोग गरेका अमर्यादित शब्दहरु अभिलेखबाट हटाउन निर्देशन दिएका हुन् ।

'सरकारको नीति तथा कार्यक्रमबारे प्रधानमन्त्रीको स्पष्टिकरण र जिज्ञासाका क्रममा व्यक्त भएका संसदीय मर्यादा अनुकुल नभएका शब्द अभिलेखबाट हटाउन सचिवालयलाई निर्देशन दिन्छु,' सभामुख महराले भने ।