प्राधिकरणले तार काटे इन्टरनेट अवरुद्ध हुन्छ : सेवा प्रदायक

इन्टरनेट सेवा प्रदायकहरुको संस्था आइस्पान अध्यक्ष भोजराज भट्टले प्राधिकरणले एकै पटक ५ सय प्रतिशतसम्म पोल भाडा वृद्धि गरेका कारण तिर्न नसकिने दाबी गरे । 'एकै पटक ५ सय प्रतिशत बढाएपछि कसरी तिर्नु,' उनले भने, 'प्राधिकरणले तार काटे इन्टरनेट अवरुद्ध हुन्छ । त्यसको जिम्मा हामी लिन्नौं ।'

प्राधिकरणले गत भदौंदेखि इन्टरनेट र केबल सेवा प्रदायकहरुले प्रयोग गर्ने आफ्नो पोल भाडा वृद्धि गरेको छ । प्राधिकरणको पूर्वाधार प्रयोग गरी अरुले धेरै आम्दानी गरे पनि प्राधिकरणलाई लाभ नभएको भन्दै भाडा बढाइएको प्राधिकरणका कार्यकारी निर्देशक कुलमान घिसिङले जानकारी दिए । उनले बढेको पोल भाडा नतिर्नेको तार काट्न मातहतका शाखाहरुलाई निर्देशन दिइएको जानकारी दिए ।