उपराष्ट्रपतिलाई स्वागत गर्न बालबालिका ४० डिग्रीमा १ घण्टा पैदल

उपराष्ट्रपतिको स्वागतमा अनिवार्य उपस्थित हुन भनिएपछि सार्वजनिक बिदाका दिन बालबालिका हिँडेरै कार्यक्रमस्थलमा पुगे
शिव पुरी

रौतहट — कटहरियामा आयोजित जानकी जयन्ती समारोहमा सोमबार विद्यार्थीहरू पानी खोज्दै भौंतारिरहेका थिए । करिब ४० डिग्री सेन्टिग्रेडको गर्मीमा हिँडेर आइपुगेका उनीहरू कार्यक्रमस्थलमा खानेपानीको व्यवस्था नहुँदा आकुलब्याकुल देखिन्थे । उपराष्ट्रपति नन्दबहादुर पुनको स्वागतका लागि अनिवार्य उपस्थित हुन पत्र काटिएपछि विद्यालयहरूले उनीहरूलाई ल्याएका थिए । 

कार्यक्रममा एक घण्टासम्म पैदल हिँडेर आएका विद्यार्थी पनि थिए । कतिपय विद्यार्थीले खाली खुट्टै हिँडेका थिए । कटहरिया-१ स्थित भषेडवा माविका प्रधानाध्यापक राममंगल राय यादवले नगरपालिकाले विद्यालयका सबै कर्मचारी र छात्रछात्रालाई अनिवार्य उपस्थित गराउन निर्देशन दिएकाले विद्यार्थीलाई ल्याउनुपरेको बताए । 'बालबालिकालाई बोलाएर न बस्ने ठाउँ दिइयो न खाजा,' उनले भने, 'चर्को घाममा बच्चाहरू भोकभोकै फर्किनुपरेको छ । यस्तो कार्यक्रममा बच्चाहरूलाई बोलाउनु हुँदैनथ्यो ।' भषेडवा माविबाट कार्यक्रमस्थल झन्डै ३ किलोमिटर दूरीमा पर्छ । उपराष्ट्रपति पुन आउनुभन्दा एक घण्टाअघि विद्यार्थी कार्यक्रमस्थल पुगिसकेका थिए ।

Citizen


कटहरिया नगरपालिकाभित्र २३ वटा विद्यालय छन् । नगरपालिकाको शिक्षा शाखाले जानकी जयन्ती समारोहमा सबै संस्थागत तथा सामुदायिक विद्यालयका कर्मचारी र विद्यार्थीलाई आआफ्नो ब्यानरसहित उपस्थित हुन वैशाख २४ गते नै पत्र पठाएको थियो । समारोह नगरपालिकाले आयोजना गरेको हो ।

नगरपालिकाका शिक्षा शाखाका प्रतिनिधि सरेन्द्र ठाकुरले ठूला कक्षाका विद्यार्थीलाई मात्र बोलाइएको दाबी गरे । 'कार्यक्रममा धेरैजसो ठूला विद्यार्थी नै थिए,' उनले भने । उपराष्ट्रपति उपस्थित हुने कार्यक्रम भएकाले विद्यालयलाई आउन भनेको उनले बताए । सोमबार प्रदेश सरकारले सार्वजनिक बिदा दिएको थियो । विद्यालय बन्द भए पनि विद्यार्थीलाई पोसाकमै कार्यक्रम ल्याइएको थियो ।

कटहरिया नगरपालिकाका प्रमुख सियाराम कुशवाह हुन् । व्यक्ति हत्याको आरोपमा जेल परेका उनी केही महिनाअघि सर्वोच्च अदालतले सफाइ दिएर छुटेपछि हेलिकप्टरबाट गृहजिल्ला आएका थिए ।

प्रकाशित : जेष्ठ १, २०७६ ०७:०४
प्रतिक्रिया
पठाउनुहोस्
ADVERTISEMENT

बीआरआईप्रति सजग रहन अमेरिकी आग्रह

घनश्याम खडका

काठमाडौँ — चीनको महत्त्वाकांक्षी योजना बेल्ट एन्ड रोड इनिसिएटिभ (बीआरआई) मा नेपालको संलग्नताप्रति अमेरिकाले चासो देखाएको छ । दक्षिण तथा मध्य एसियाली मामिलाबारे कार्यवाहक अमेरिकी उपविदेशमन्त्री डेभिड रान्जले बीआरआईबारे आफूले अध्ययन गरेको र परिणाम आशाजनक फेला नपरेको उल्लेख गर्दै नेपाल यसबारे सचेत हुनुपर्ने बताए । 

नेपाल भ्रमणमा आएका उनले मंगलबार सञ्चारकर्मीसँग भने, 'बीआरआईमाथि हामीले गरेको अध्ययन तपाईंहरूले पनि हेर्न सक्नु हुन्छ । चीनले गरेको सहयोगले कसैको हित भएको खासै देखिँदैन ।'

राष्ट्रपति विद्यादेवी भण्डारी बीआरआईको दोस्रो अन्तर्राष्ट्रिय सम्मेलनमा सहभागी भएर नेपाल र्फकेको दुई सातामै यसबारे अमेरिकाले चासो देखाउँदै आफूले गरेको अध्ययन प्रतिवेदनबारे बोलेको हो । चीनले बीआरआईमार्फत विश्वव्यापी प्रभाव जमाउँदै गएपछि अमेरिकाले यसको विरोध गर्न थालेको टिप्पणी आइरहेका बेला नेपालको यसमा संलग्नतामाथि उच्च तहका अधिकारीहरूबाट यसअघि पनि प्रश्न उठाइएको थियो ।

हालै जारी अमेरिकी प्रतिवेदनमा बीआरआईमा संलग्न देशहरूमा भ्रष्टाचार बढेको, अधिनायकवाद हावी हुँदै गएको र राज्य नियन्त्रित अर्थतन्त्रले जरो गाडेको उल्लेख छ । नेपालमा पनि त्यो अवस्था नआओस् भन्ने अमेरिकाको सद्भाव रहेको उनको भनाइ थियो । 'कुनै पनि लगानी भित्र्याउनुअघि आफ्नो हितमा छ कि छैन र त्यसले पारदर्शिता प्रवर्द्धन गर्छ कि गर्दैन भनेर आफ्ना मित्रहरूले सोच्नुपर्छ भन्ने अमेरिकी धारणा छ,' रान्जले भने, 'बीआरआईले नेपालमा भित्र्याउने योजनामा पनि यी प्रश्न गरिनुपर्छ ।'

चीनले बीआरआईमार्फत एसियामा प्रभाव जमाउन खोजिरहेका बेला अमेरिकाले यस क्षेत्रमा 'इन्डो प्यासिफिक स्ट्राटेजी' अघि सारेको छ । जानकारहरूका अनुसार यो चीनको प्रभावलाई रोक्ने अमेरिकी रणनीति हो । रान्जले भने यो विश्लेषण सही नभएको दाबी गरे । 'इन्डो प्यासिफिक स्ट्राटेजी कुनै देशको विरुद्धमा नभएर लोकतन्त्र, पारदर्शिता र खुला समाजका पक्षमा हो,' उनले भने, 'समृद्धिका लागि यी कुरा मुख्य आधार हुन् ।'

रान्जले परराष्ट्रका समकक्षी अधिकारीहरू र गृहमन्त्री रामबहादुर थापासँग भेट गरी इन्डो प्यासिफिक स्ट्राटेजीबारे कुरा गरेका थिए । गत हिउँदमा परराष्ट्रमन्त्री प्रदीप ज्ञवालीको औपचारिक भ्रमणका बेला अमेरिकाले यस रणनीतिमा नेपाललाई एक मुख्य साझेदार भनी घोषणा गरेको थियो ।

इन्डो प्यासिफिक रणनीतिअन्तर्गतै नेपाललाई आफूले 'मिलेनियम च्यालेन्ज कर्पारेसन' मार्फत ५६ अर्ब सहयोग घोषणा गरेको र आउने पाँच वर्षमा परियोजनामार्फत बन्ने विद्युतीय प्रसारण लाइनले ठूलो परिवर्तन ल्याउने आशा गरेको समेत उनले बताए ।

'हामी नेपाललाई ऋण होइन, अनुदान दिन्छौं,' उनले थपे, 'यस्तो अनुदानको कुनै सर्त पनि राख्दैनौं ।' बीआरआईमार्फत बनाउने भनिएको अन्तरदेशीय रेल मार्गमा चीनसँग नेपालले ऋण सहयोग लिन हुने नहुनेबारे चर्चा चलिरहेका बेला अमेरिकाले नेपाललाई अनुदान घोषणा गरेको हो ।

प्रकाशित : वैशाख ३१, २०७६ २१:४५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT