किन घोचपेचमै उत्रिए दाहाल र पोखरेल ?

नेकपामा वैचारिक कार्यदिशाको विवाद
कान्तिपुर संवाददाता

काठमाडौँ — एकताको झन्डै एक वर्ष पुगिसक्दा पनि वैचारिक दिशा तय गर्न नसकेको भन्दै नेकपाभित्र विवाद बढेको छ । नेताहरूबीचको विवाद बुधबार सार्वजनिक मञ्चबाटै छताछुल्ल भएको छ । आउँदो शुक्रबार एकता दिवस मनाउने तयारीमा रहेको नेकपाका अध्यक्ष पुष्पकमल दाहाल र सचिवालय सदस्य ईश्वर पोखरेलबीच बुधबार युवासंघको मञ्चमा चलेको घोचपेचले आन्तरिक विवादलाई सतहमा ल्याइदिएको छ ।

नारायणकाजी श्रेष्ठ, घनश्याम भुसाललगायतले पार्टीको कार्यशैली र वैचारिक कार्यदिशामाथि यसअघि नै पटकपटक प्रश्न उठाएका थिए ।

Citizen

पार्टी सञ्चालन शैलीप्रति आन्तरिक रूपमा असहमति राख्दै आएका उपप्रधानमन्त्री पोखरेलले बुधबार सार्वजनिक मञ्चबाटै वैचारिक रूपमा पार्टी स्पष्ट नहुने हो भने तासको महलझैं ढल्न सक्ने चेतावनी दिए ।

‘विचारमा स्पष्ट नभएको कम्युनिस्ट पार्टीले दुनियाँमा दुर्भाग्यको स्थिति भोग्नुपर्‍यो, हामी त्यो दुर्भाग्य भोग्न चाहन्नौं, हामीले विचारमा स्पष्ट भएको कम्युनिस्ट पार्टी चाहेका हौं,’ उनले भने, ‘हामीले संसारभर देख्यौं, कम्युनिस्ट पार्टीेहरूले ठूल्ठूला बलले राज्यसत्ता कब्जा गरे । शासनसत्ता सञ्चालन गरे । कुनै पनि पुँजीवादीको एउटा पनि गोली नलागी तासको महलझैं ढले । हाम्रो कम्युनिस्ट पार्टी कुनै हालतमा त्यस्तो हुनुहुन्न । हामी सबैले खबरदारी गर्नुपर्ने जरुरी छ ।’

पोखरेलले पार्टी तजबिजी हिसाबले चल्न थालेको बताएका थिए । ‘तजबिजी हिसाबले चल्ने पार्टी अघि बढ्न सक्दैन,’ उनले भने, ‘हामी त नेता भइरहौंला तर आन्दोलन कसरी अघि बढ्छ, कसरी नेतृत्व हुन्छ भन्ने प्रश्नको हल हुन जरुरी छ । विचार, संगठन र नेतृत्वको प्रश्नमा सोलोडोल कुरा गर्न मन पराउँछौं, भइहाल्छ नि, चलाउँछौं, चलिहाल्छ नि भन्छौं । यसरी हुँदैन ।’

उनले सुखी नेपाली समृद्ध नेपाल निर्माणको लक्ष्य बोकेर हिँड्ने तर त्यसका लागि जाने राजनीतिका वैचारिक बाटो के हो भन्ने स्पष्ट नहुँदा कहीं पनि नपुगिने तर्क गरे । ‘वैचारिक रूपमा स्पष्ट भइएन भने न हाँस न कुखुराको चाल हुन्छ,’ उनले भने ।

वैचारिक रूपमा स्पष्ट नभएको पार्टीले कार्यभार पूरा गर्न नसक्ने उल्लेख गर्दै पोखरेलले झन्डै आधा घण्टा निकै आक्रामक अभिव्यक्ति दिएपछि अध्यक्ष दाहालले झन्डै १५ मिनेटसम्म त्यसको जवाफ दिए । वैचारिक आधारबिनै पार्टी एकता भयो र कुनै राजनीतिक दिशा छैन भन्ने भ्रम नपाल्न उनले आग्रह गरे । ‘हामीले यो सिद्धान्त, यो विचार भनेर धेरै माथापच्ची गरेको भए पार्टी एकता हुने थिएन, यो सरकार बन्ने थिएन । त्यसैले यो एकतामा नेतृत्व र विचार दुवैको भूमिका थियो,’ दाहालले भने, ‘विचारको कुनै भूमिका थिएन भन्ने ठानियो भने गलत हुन्छ ।’

दाहालले एकताकै जगमा विचार निर्माण भइरहेकाले यसलाई जडसूत्रवादी ढंगले नबुझ्न आग्रह गरे । तत्कालीन एमालेले अघि सारेको जनताको बहुदलीय जनवादको सिद्धान्तको वकालत गर्ने नेता पोखरेललाई कटाक्ष गर्दै दाहालले विचार भन्ने कुरा कुनै अमूर्त नभएको बताए ।

‘माक्र्सवाद विचार दोहोर्‍याइरहने कुरान र बालबलजस्तो होइन,’ दाहालले भने, ‘यसलाई निरन्तर विकास गर्नुपर्छ । अनि मात्र त्यसले मानवजातिको विकास गर्छ ।’ एउटै मात्र विचार सही भनिरहेको भए अहिलेको अवस्थामै नआउने उल्लेख गर्दै उनले निरन्तरतामा क्रमभंगता गरेको दाबी गरे ।

उनले कम्युनिस्ट पार्टीभित्र विचार शुद्धताको नाममा जडसूत्रवादी प्रवृत्ति हुर्केको विगत सम्झाए । दाहालले एमाले छुट्टै दल रहेका बेला आफूले त्यसका नेताहरूलाई प्रधानमन्त्री बनाउन भूमिका खेलेको प्रसंग पनि कोट्याए । माधव नेपाल, झलनाथ खनाल र दुवै पटक केपी ओलीलाई प्रधानमन्त्री बनाउन आफ्नै भूमिका रहेको दाबी गर्दै उनले त्यसलाई ख्याल गर्न आग्रह गरे । पूर्वएमाले पृष्ठभूमिका युवाको बाहुल्य रहेको मञ्चमा दाहालले बाँकी जीवन पनि कुनै न कुनै त्याग र क्रमभंगता गरेर बिताउन चाहेको बताए ।

झन्डै तीन घण्टा चलेको कार्यक्रममा मुख्य वैचारिक विवाद दाहाल र पोखरेलबीच भए पनि पार्टी अस्पष्ट रहेको विषयमा वरिष्ठ नेता माधव नेपालले पनि कुरा उठाए । ‘समृद्धिको यात्रा, समाजवादको लक्ष्य भनेर हिँडेका छौं । हामीले परिकल्पनाको समाजवाद के हो, कस्तो हो,’ नेपालले भने, ‘समृद्धि भनेको टाटाबाठा र मुट्ठीभरका व्यक्तिका लागि मात्र होइन, त्यसभित्र रोजगारी, गाँसबास, कपास र सम्मानका विषयहरू जोडिएको हुनुपर्छ ।’ यसमा जोड्ने काम कति गर्न सकियोभन्ने समीक्षा हुनुपर्ने नेपालको धारणा थियो ।

‘राजनीतिक वैचारिक कार्यदिशाका बारेमा आवश्यक छलफल गर्नुपर्छ,’ नेपालले भने, ‘जनताको दु:खकष्टमा साथ दिएनौं भने जनताले हामीलाई मन पराउँदैनन् ।’ उनले अर्काले भनेको सुन्ने बानी हटेको उल्लेख गर्दै बोल्ने कम, सुन्ने बढी गर्न नेतृत्वलाई सचेत गराए ।

अर्का वरिष्ठ नेता झलनाथ खनालले दुवै पार्टीले तय गरेको इतिहासको जगमा अब नयाँ वैचारिक बहस अघि बढाउनुपर्ने बताए । उनले समाजवादी क्रान्तिका लागि बहस केन्द्रित हुनुपर्ने धारणा राखे ।

प्रकाशित : जेष्ठ २, २०७६ ०७:३४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

त्रिवि सेवा आयोगले सञ्चालन गरेको खुला परीक्षामा अनियमितता भएको निष्कर्ष

सुदीप कैनी

काठमाडौँ — त्रिभुवन विश्वविद्यालय सेवा आयोगले सञ्चालन गरेको खुला परीक्षामा अनियमितता भएको अख्तियार दुरुपयोग अनुसन्धान आयोगले प्रारम्भिक निष्कर्ष निकालेको छ । आयोगले सञ्चालन गरेको परीक्षामा पदाधिकारी र कर्मचारीका नातेदार तथा आफन्तलाई उत्तीर्ण गराइएको भन्दै उजुरी परेपछि अख्तियारले अनुसन्धान थालेको थियो ।

'भेटिएका केही तथ्यांकले गम्भीर अनियमितता संकेत गरेका छन्,' अख्तियार स्रोतले भन्यो, 'प्रारम्भिक छानबिनमा रहेको फाइल तत्काल विस्तृत अनुसन्धानमा गइहाल्छ । थप कागजपत्र हेरेर छानबिन गर्दै छौं ।' अख्तियार प्रवक्ता प्रदीप कोइरालाले त्रिभुवन विश्वविद्यालयबाट केही कागजात अख्तियारले नियन्त्रणमा लिएको जानकारी दिँदै छानबिन चलिरहेको बताए ।

परीक्ष्ाामा त्रिविका उच्च पदाधिकारी, विद्यार्थी, कर्मचारी संघ/संगठन र राजनीतिक दलका पहुँचवाला नेताहरूका नातागोताको नाम निस्किएको भन्दै चौतर्फी विरोध हुँदै आएको छ । यस विषयमा अख्तियार र राष्ट्रिय सतर्कता केन्द्रमा उजुरी परेको थियो । केन्द्रले छानबिन टोली खटाइसकेको छ । 'उजुरीपछि टोली बनाएर खटाएका थियौं,' केन्द्रका प्रवक्ता विष्णुराज लामिछानेले भने, 'अख्तियारले फाइलहरू लिएको जानकारी आएको छ, उसको निर्णय कुरेर बसेका छौं ।' अख्तियारको छानबिन प्रक्रिया र निर्णयपछि केन्द्रले थप निर्णय लिने उनले जनाए ।

त्रिवि सेवा आयोग अध्यक्ष चैतन्य शर्मा, प्रमुख परशुराम कोइराला, त्रिवि केन्द्रीय क्याम्पसका प्रिन्सिपल कृष्ण आचार्य, पूर्वरजिस्ट्रार चन्द्रमणि पौडेललगायत उच्च पदाधिकारीका नातेदार परीक्षामा सफल भएका छन् । त्रिवि पदाधिकारीले आफन्तबाहेक पनि भनसुनका आधारमा थुप्र्रै पहुँचवालाका आफन्तलाई परीक्षामा पास गराएको स्रोतको दाबी छ । कुन पदाधिकारी, कुन विद्यार्थी/कर्मचारीका नेताले कुन प्रतिस्पर्धीलाई पास गराउन सिफारिस गरे भन्ने सूची सामाजिक सञ्जालमा समेत भाइरल भइरहेको छ ।

५० भन्दा बढी प्रतिस्पर्धीलाई पहुँच आधारमा उत्तीर्ण गराइएको उक्त सूचीमा उल्लेख छ । 'पहुँचवाला कर्मचारी, विद्यार्थी नेताका आफन्तलाई पास गराउन सेवा आयोगका पदाधिकारीले नतिजा आउनुअघि नै लिस्ट बोकेर हिँडेका थिए,' त्रिविस्रोतले भन्यो, 'भागबन्डा आधारमापरीक्षामा अनियमितता गरेर तिनैमध्येकालाई पास गराइयो ।'
उत्तरपुस्तिका परीक्षणमा गडबड गरेर आफूनिकटका व्यक्तिलाई पास गराइएको त्रिविका केही प्राध्यापकले कान्तिपुरसँग बताए । खुला प्रतिस्पर्धाको अन्तर्वार्ता भने बाँकी छ ।

आयोग अध्यक्ष शर्मा नेकपानिकट हुन् भने प्रमुख कोइराला कांग्रेसनिकट हुन् । उनीहरूको सेटिङमा पूर्वएमाले, कांग्रेस र पूर्वमाओवादीनिकट पदाधिकारी तथा विद्यार्थी संगठनका नेताको सिफारिसमा नतिजा प्रकाशित भएको एक प्रााध्यापकले बताए । शर्माको कार्यकाल सकिन दुई महिना मात्र बाँकी छ । उनी एमालेनिकट भएकै आधारमा अवकाशलगत्तै त्रिवि उपकुलपति बन्ने लबिइङ गर्दै हिँडेका छन् । त्यसका लागि पनि नेता कार्यकर्ता खुसी पार्न शर्माले लिस्ट तयार पारेर पहुँचवालालाई जागिर दिन लागिपरेको ती प्राध्यापकको दाबी छ ।

आयोगले विज्ञापन नम्बर १८/२०७३/२०७४ मा विभिन्न पदमा खुला विज्ञापन गरेको थियो । उपप्रशासक, आर्थिक नियन्त्रक, शाखा अधिकृत, लेखा अधिकृत, पुस्तकालय अधिकृत, प्राविधिक अधिकृत, मुख्य कार्यालय सहायक, कार्यालय सहायक, लेखा सहायकलगायत १६ पदमा विज्ञापन गरिएको थियो ।

तीमध्ये शाखा अधिकृत, लेखा अधिकृत कार्यालय सहायक, लेखा सहायकको पदमा अनियमितता गरेर नातेदारलाई पास गराइएको आशंका छ । नतिजा प्रकाशनमा बदमासी गरेको भन्दै प्राध्यापक र विद्यार्थी संघ/संगठनले छानबिन गरी कारबाही गर्न माग गरेका छन् ।

प्रकाशित : जेष्ठ २, २०७६ ०७:२०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT