दोहोरो नागरिकताबारे छानबिन सुरु

कान्तिपुर संवाददाता

विराटनगर — भारत र नेपाल दुवै देशको नागरिकता लिने सुनसरीको इनरुवाका छगनलाल शर्माका विषयमा प्रशासनले छानबिन सुरु गरेको छ । 

व्यापारी शर्माले दोहोरो नागरिकता लिएको समाचार प्रकाशन भएपछि सुनसरी प्रशासनले छानबिन सुरु गरेको हो । छगनलाललाई झिकाउन जिल्ला प्रशासन कार्यालयले सोमबार पत्र पठाइसकेको सुनसरीका प्रमुख जिल्ला अधिकारी प्रेमप्रकाश उप्रेतीले बताए ।

दोहोरो नागरिकताका विषयमा अनुसन्धान भइरहेको बताउँदै उनले शर्माको बयानपछि परराष्ट्र मन्त्रालयमार्फत भारतमा देखिएका कागजपत्र झिकाइने जानकारी दिए ।

‘कान्तिपुरमा समाचार आएपछि हामीले थाहा पायौं,’ प्रजिअ उप्रेतीले भने, ‘छगनलाललाई झिकाउन पत्र काटिसकेका छौं । यस विषयमा उनको बयान लिइसकेपछि आवश्यक कारबाही गर्छाैं ।’ इनरुवा बजारमा सुरज फेन्सी स्टोर नामक कपडा पसल चलाएर बसेका शर्माले ३४ वर्षको उमेरमा २०३४ सालमा नेपालमा वंशजको नागरिकता लिएको देखिन्छ ।

नेपालको नागरिकता नम्बर ६२५६/२७१९ रहेका उनको भारतको निर्वाचन आयोगको वेबसाइटमा ०३३०५१९ नम्बरको मतदाता परिचयपत्र भेटिएपछि उनले दोहोरो नागरिकता राखेको खुलेको हो ।

छगनलालविरुद्ध यसअघि पनि विभिन्न चरण उजुरी परेका थिए । डकुमेन्ट नम्बर डीडी ७४००५२६८५ एनपीबाट सन् २०१७ जुलाई महिनाको २३ तारिखमा गृह मन्त्रालयमा र डीडी ७४००५२६५४ एनपी नम्बरबाट सतर्कता केन्द्रमा समेत छगनलालको दोहोरोनागरिकता विषयमा उजुरी परेको छ ।

त्यस्तै, उनको दोहोरो नागरिकताका विषयमा २०७४ साउन ८ गते ९५१ दर्ता नम्बरको उजुरी अख्तियार दुरुपयोग अनुसन्धान आयोग काठमाडौंमा पनि उजुरी दर्ता भएको छ । त्यस्तै, अख्तियारको इटहरीस्थित कार्यालयमा पनि १६५ दर्ता नम्बरको उजुरी २०७४ साउन ९ गते नै परेको छ । तत्कालीन प्रमुख जिल्ला अधिकारी गोपालप्रसाद पराजुलीले भने त्यसबेला उजुरी लिन नमानेको स्रोतले बतायो ।

दर्ता भएका उजुरीउपर पनि अहिलेसम्म कुनै कारबाही नभएको पाइएको छ । अख्तियारको इटहरीस्थित कार्यालयमा छगनलालको दोहोरो नागरिकताका विषयमा उजुरी आएको र त्यसबारे फाइल गृह मन्त्रालय पठाइएको प्रवक्ता ज्ञानेन्द्र ढकालले बताए । कार्यालयको तर्फबाट आवश्यक कारबाही टुंग्याएर थप कारबाहीका लागि लागि २०७५ साउनमा गृह मन्त्रालय पठाइसकेको जानकारी उनले दिए ।

२०००००८१०६८६ नम्बरको रासनकार्ड लिएका शर्माले २०२९४ नम्बरको मगनलाल रामावतको पसलबाट भारत सरकारले दिने रासन लिने गरेको देखिएको छ । उनले सन् २०१७ मा राजस्थानको बिकानेर जिल्लामा विधानसभा निर्वाचन क्षेत्र नम्बर १३ मा मतदान गरेको देखिएको छ । नेपालमा १६७१९७१ नम्बर मतदाता परिचयपत्र लिएका उनले इनरुवाको भगवती माविमा रहेको निर्वाचन केन्द्रबाट समेत मतदान गरेको देखिएको छ ।

भारतीय नागरिकले कुनै पनि अवस्थामा वंशजको नागरिकता भने नपाउने प्रजिअ उप्रेतीले बताए । ‘जिल्ला प्रशासन कार्यालयले वंशज र वैवाहिक अंगीकृत नागरिकता मात्रै वितरण गर्छ । अंगीकृत नागरिकता गृह मन्त्रालयले नै वितरण गर्छ तर यसका लागि धेरै प्रक्रिया छन्, जोकोहीले सजिलै लिन सक्दैनन्,’ उनले भने, ‘छगनलालका विषयमा अनुसन्धान भइरहेको छ ।’

छगनलालका तीन जना छोरा र उनीहरूका श्रीमतीको समेत दोहोरो नागरिकता लिएका छन् । नेपाल नागरिकता ऐनमा दोहोरो नागरिकता लिनेलाई ५ वर्षसम्म कैद र एक लाख रुपैयाँ जरिवानाको व्यवस्था छ ।

एक पक्राउ
मोरङ - नेपाल र भारतको दोहोरो नागरिकता लिएका विराटनगर ९ का ३६ वर्षीय विमलेस साहलाई प्रहरीले पक्राउ गरेको छ ।
विराटनगर ३ खार्जी ढाटमा सवारी जाँच गर्ने क्रममा साहको पर्सबाट नेपाली सवारीचालक अनुमतिपत्रका साथै भारतीय आधार कार्ड फेला परेपछि नियन्त्रणमा लिइएको प्रहरी नायब उपरीक्षक घनश्याम श्रेष्ठले बताए । साहको ०२-५०४१९९ नम्बरको सवारीचालक अनुमति पत्रसँगै भारतको विहार राज्य, अररिया जिल्ला मनिकपुर बुर्जा चोक वडा ८ उल्लेख भएको आधार कार्ड बरामद भएको हो ।

विराटनगरमा खाद्यान्न सप्लायर्स रहेका साहले २०५५ भदौ १९ मा जिल्ला प्रशासन कार्यालय मोरङबाट ३७४७३ नम्बरको नागरिकता लिएको पाइएको छ । प्रहरी नायब उपरीक्षक श्रेष्ठले साहको परिवारिक पृष्ठभूमिलगायत विभिन्न कोणबाट अनुसन्धान भइरहेको उनले बताए ।

प्रकाशित : जेष्ठ २, २०७६ ०९:१०
प्रतिक्रिया
पठाउनुहोस्
ADVERTISEMENT

‘योगमाया’ अब रंगमञ्चमा

कान्तिपुर संवाददाता

काठमाडौँ — योगमाया नेपाली माझ परिचित नाम भए पनि उनको जीवनकाल र योगदानका बारेमा कमै मात्र जानकार छन् । अब भने योगमायाको जीवनकाललाई रंगमञ्चमा हेर्न पाइने भएको छ ।

नीलम कार्की निहारिकाले लामो अध्ययन र अन्वेषणपछि योगमायाको जीवनकालमा आधारित रही लेखेको पुस्तक ‘योगमाया’ लाई नै आधार बनाई रंगकर्मी टंक चौलागाईंले नाट्य रूपान्तरण गरी मन्चन गर्ने भएकाहुन् । नाटकको निर्देशन पनि चौलागाईंले नै गर्नेछन् ।

योगमायाले दासप्रथा, सतिप्रथा, बालविवाह, छुवाछुत, थिचोमिचो र भेदभावजस्ता कुरीति, विसंगति र विकृतिविरुद्ध आवाज उठाएकी थिइन् । उनले धर्मका अपव्याख्या र विसंगतिलाई खुलेरै विरोध गरिन् । निहारिकाले ‘योगमाया’ कै लागि मदन पुरस्कार पनि जितेकी थिइन् ।

यतिबेला रिहर्सल भइरहेको नाटकमा भने प्रकेश सिन्धुलीयको सहनिर्देशन र सुरज तमुको कोरियोग्राफी रहने बताइएको छ । स्कुल थिएटर नेपाल र सांग्र्रिला फाउन्डेसनको प्रस्तुति रहने नाटकको मुख्य भूमिकामा कलाकार मिथिला शर्मा देखिँदै छिन् । उनी लामो समयपछि रंगमञ्चमा योगमायाको चरित्रका आउन पाउनुलाई अवसरका साथै चुनौती पनि रहेको स्वीकार गर्छिन् ।

सहयोगी संस्था काठमाडौं प्रज्ञाकुञ्ज स्कुलको परिसरमा अभ्यास भइरहेको सो नाटकमा मिथिलासँगै राधा श्रेष्ठ, प्रभाकर न्यौपाने, प्रल्हाद खरेल, श्याम खडा, प्रकेश सिन्धुलीय, राज न्यौपाने, सुरज तमु, दीपिका ढकाल, सुमन कुइकेल, सरस्वती अधिकारी, सगुन पोखरेल, आकांक्षा जिसी, पुष्पराज अवस्थी लगायतका रंगकर्मीहरू हुनेछन् । ‘योगमाया’ जेठ २४ गते देखि असार १६ गते सम्म बत्तीसपुतलीस्थित शिल्पी थिएटरको गोठाले नाटकघरमा प्रस्तुत हुने जनाइएको छ ।

प्रकाशित : जेष्ठ २, २०७६ ०९:०६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT