रुपन्देहीमा प्रहरीद्वारा हवाइ फायर, पेस्तोलसहित नेपाल आउँदै गरेका भारतीय नागरिक पक्राउ 

माधव ढुंगाना

भैरहवा — हतियारसहित नेपाल आउँदै गरेका भारतीय नागरिकलाई पक्राउ गर्ने क्रममा रुपन्देहीको नेपाल-भारत सीमावर्ती क्षेत्रमा शंकरपुरमा प्रहरीले हवाई फायर गरेको छ । 

प्रतिकात्मक तस्बिर

रुपन्देही प्रहरीका अनुसार भारतको महाराजगञ्ज जिल्ला फरेनी बजार बस्ने करिब ५० वर्ष झिनक धोबीलाई नियन्त्रणमा लिने क्रममा एक राउण्ड हवाइ फायर गरेको हो।

हतियारसहित नेपाल आउँदै गरेको सूचनाका आधारमा प्रहरीले नियन्त्रणमा लिन खोज्दा उनलाई छुटाउन भारत तर्फबाट ३०/४० जनाको समूहले प्रहरीको टोली माथि आक्रमण गर्दा आत्मरक्षाका लागि प्रहरीले हवाइ फायर गरेका थिए।

उक्त घटनामा एक भारतीय घाइते भएको भारतीय प्रहरीलाई उद्धृत गर्दै नेपाल प्रहरीले जनाएको छ।सीमापारिबाट भारतीय समूहले गरेको आक्रमणबाट सादा पोशाकमा खटिएका प्रहरीहरु तेजबहादुर कुवँर, प्रेम आले र विक्रम मल्ल घाइते भएको रुपन्देही प्रहरीका डीएसपी धर्मराज भण्डारीले बताए।

भारतीय नागरिकबाट अमेरिकामा बनेको स्वचालित एकथान पेस्तोल र एकथान म्यागजिन बरामद भएको छ। धोबीलाई प्रहरीले नियन्त्रणमा लिएको छ।रुपन्देहीमा कसैले मगाएर धोबीले हतियार ल्याएको हुनसक्ने प्रहरीलेे प्रारम्भिक अनुमान छ।

प्रकाशित : जेष्ठ २, २०७६ १८:५४
प्रतिक्रिया
पठाउनुहोस्
ADVERTISEMENT

झाडापखालाले एकै गाउँमा ९४ बिरामी

माधव अर्याल

पाल्पा — तिनाउ गाउँपालिका-४, बौरीडाँडामा झाडापखालाबाट ९४ जना बिरामी भएका छन् । ११ जनाको अवस्था गम्भीर छ । स्थानीयका अनुसार बिहीबार बिहानैदेखि गाउँमा झाडा र बान्ता फैलिएको थियो ।

बुधबार गाउँकै सिमबहादुर ठाडाको घरमा मृत्यु भएको १३ दिनको चोखिने क्रममा खाना खाएकाहरु बढी बिरामी परेका छन् । त्यहाँ बटुक, अचार लगायतका खाना खाएकाहरु बिरामी परेको स्थानीयले बताए ।

गम्भीर भएका ११ जनाको लुम्बिनी मेडिकल कलेजमा उपचार भएको छ । बिरामीलाई गाउँकै सडक छेउका टहरा, बारी, सडकमा राखेर उपचार गरिएको छ । सामान्य बिरामीलाई घरमा उपचार गरिएको छ । सदरमुकाम तानसेनबाट उपचारका लागि पुगेको स्वास्थ्यकर्मीको टोली फर्किएको छ । स्थानीय स्वास्थ्यकर्मी र दोभानबाट खटिएका प्रहरीले झाडापखाला प्रभावित गाउँमा बिरामी निगरानी गरिरहेका छन् । 'आत्तिनेलाई स्लाइन पानी चढाइएको छ,' कोलडाँडा स्वास्थ्य चौकीका स्वास्थ्यकर्मी हरिजले भने, 'गाउँमा सबैलाई नआत्तिन आग्रह गरको छ ।'

उनले सदरमुकामबाट गाउँ पुगेका सबै स्वास्थ्यकर्मी फर्किकाले एक्लै खटिनुपरेको गुनासो गरे । उनी स्वास्थ्य इकाईमा कार्यरत सहयोगीका साथ बिरामीलाई हेरचार गरेर बसेका छन् ।
गाउँमा बुधबार राति नै केहीलाई झाडा र बान्ता भएको थियो । बिहीबार बिहान १० बजेपछि गाउँका धेरै जना बिरामी परेर अत्तालिएका थिए । बिरामी भएकाहरु कतिपय घरमै औषधि खाने, जीवनजल बनाएर त्यसलाई पिएर बसेका छन् । 'मान्छे मृत्यु भएको १३ औं दिनको पुण्यतिथिमा खाएको खानाबाट गाउँभरि झाडापखाला फैलिएको आशंका गरिएको छ,' स्थानीय देवसिंह थापाले भने ।

बिरमीहरुमा झाडा वान्ता, ज्वरो आउने, कमजोरी हुने, आत्तिने लक्षण देखिएको छ । उपचारका लागि गाउँपालिकाको समन्वयमा स्वास्थ्य शाखा सहित जिल्ला अस्पतालको टोली पुगेको थियो । तिनाउ दोभानका स्वास्थ्यकर्मी सुन्दर तरामुले झाडाबान्ता नियन्त्रणमा आउने विश्वास व्यक्त गरे । सदरमुकाम तानसेनबाट ३४ किलोमिटर दक्षिणमा रहेको बौरीडाँडा गाउँ पुग्न राजमार्गको २४ माइलबाट सातकिलोमिटर पूर्व जानुपर्छ ।

प्रकाशित : जेष्ठ २, २०७६ १८:४५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT