सगरमाथा र मकालुमा दुई भारतीय आरोहीको मृत्यु, एक बेपत्ता

बिहीबार दिउँसो आरोहण सकेर फर्किएका भारतीय सैनिक रवी ठाकुर राति १० बजे चौथो शिविरमा आइपुगेका थिए । ‘उनी त्यहाँ सुतेको सुत्यै भए,’ सेभेन समिट ट्रेक्सका अध्यक्ष मिग्मा शेर्पाले कान्तिपुरसँग भने, ‘अक्सिजन अभावले उनको मृत्यु भएको खबर आएको छ ।

सैनिक ठाकुर सेभेन समिटको व्यवस्थापनमा आरोहणमा गएका थिए । ८ हजार मिटर उचाईमा रहेको शिविरबाट ठाकुरको शव उद्धार गर्न केही दिन लाग्ने बताइएको छ ।

यसैबीच यही कम्पनीको व्यवस्थापनमा संखुवासभामा रहेको मकालु हिमाल आरोहण सकेर फर्किँदै गर्दा अर्का भारतीय सैनिक नारायण सि‌ंहको पनि मृत्यु भएको अध्यक्ष शेर्पाले बताए ।

८४८१ मिटर उचाईको मकालु आरोहण सकेर फर्किने क्रममा भारतको कलकत्ता घर भएका दिपंकर घोष हराइरहेका छन् ।

बिहीबार साँझ आरोहण सकेर फर्कनेक्रममा उनी हराएका थिए । ‘शेर्पाहरुले दिपंकरलाई खोज्न सकिने ठाउँसम्म पुगेर खोजे तर कतै भेटिएनन्,’ अध्यक्ष शेर्पाले भने, ‘ सायद दिपंकरको शव भेटिन ग्राहो छ ।’

यो सिजनमा अहिलेसम्म चार वटा हिमालमा कम्तीमा ५ विदेशी अरोहीको मृत्यु भइसककेको छ भने दुई विदेशी बेपत्ता भएका छन् ।