सीके राउतको 'जनमत' दर्ता

कान्तिपुर संवाददाता

काठमाडौँ — चन्द्रकान्त (सीके) राउतले नेतृत्व गरेको राजनीतिक समूहले निर्वाचन आयोगबाट सोमबार राजनीतिक दल दर्ताको प्रमाणपत्र पाएको छ । पृथकतावादी अभियान त्यागेको घोषणा गरेका राउतले दर्ता गराएको दलको नाम हो- जनमत पार्टी ।  

आयोगका प्रवक्ता सहसचिव शंकरप्रसाद खरेलले आवश्यक छानबिन र सबै प्रक्रिया पूरा गरेपछि आयोगले सीके राउत नेतृत्वको दल दर्ता गरिदिने निर्णय लिएको बताए ।

'संविधान, ऐन र नियमअनुसार पार्टीको विधान, उद्देश्य सबै मिलेको पाइएपछि मात्रै दल दर्ताको निर्णय भएको हो,' उनले भने । राउतले वैशाख १५ मा दल दर्ताका लागि आयोगमा निवेदन दिएका थिए । ३५ सदस्यीय कार्यसमितिमा उनी अध्यक्ष र अरू सबैजना केन्द्रीय सदस्य छन् ।

केन्द्रीय सदस्य चन्दन सिंहले पार्टीको अन्य पदाधिकारीको चयन तथा समिति विस्तारलगायत काम क्रमशः हुँदै जाने बताए । गत फागुन २४ मा सरकारसँगको सम्झौतापछि राउतले मूलधारको राजनीतिमा आउने घोषणा गरेका थिए ।

प्रकाशित : जेष्ठ ६, २०७६ २०:०४
प्रतिक्रिया
पठाउनुहोस्

प्रधानमन्त्री विरुद्ध अपशब्द लेखेको आरोपमा पक्राउ

कान्तिपुर संवाददाता

काठमाडौँ — नेपाल प्रहरीको महानगरीय अपराध महाशाखाले प्रधानमन्त्री केपी शर्मा ओलीविरुद्ध फेसबुकमा अपशब्द लेखेको आरोपमा लालबहादुर तामाङलाई पक्राउ गरेको छ । ३३ वर्षीय तामाङलाई बिजुली बजारबाट नियन्त्रणमा लिइएको हो । 

'५० करोड दिनुस् म मोदीलाई मारिदिन्छु' भन्दै भारतीय प्रधानमन्त्री नरेन्द्र मोदीविरुद्ध लेखिएको समाचार फेसबुकमा एक अनलाइन पोर्टलले सेयर गरेको थियो ।

त्यही सामग्रीमा तामाङले कमेन्ट लेख्दै प्रधानमन्त्री ओलीविरुद्ध अपशब्द लेखेका थिए । उनीमाथी विद्युतीय कारोबार ऐन २०६३ अन्तर्गत मुद्दा चलाइने महाशाखाका एसपी केदार ढकालले जानकारी दिए ।

मुख्य पात्रलाई उन्मुक्ति
महाशाखाले यसअघि पनि प्रधानमन्त्री, राष्ट्रपति र दलका मुख्य नेताविरुद्ध अपशब्द लेख्नेलाई पक्राउ गर्दै साइबर अपराधमा मुद्दा चलाइसकेको छ । वैशाख अन्तिम साता महाशाखाले सिन्धुपाल्चोकको मेलम्चीबाट ईश्वरकुमार चौलागाइर्ंलाई पक्राउ गरेर विद्युतीय कारोबार ऐनअन्तर्गत मुद्दा चलाएको थियो ।

फटकशिला माविका प्रधानाध्यापक तथा शिक्षक महासंघ सिन्धुपाल्चोकका सचिव चौलागाईंलाई महाशाखाले राष्ट्रपति र प्रधानमन्त्रीको मानहानि हुने तस्बिर फेसबुकमा राखेको आरोपमा पक्राउ गरेको थियो ।

महाशाखाले गत कात्तिक १३ गते कागेश्वरी मनहरा नगरपालिका ८ बस्ने हरिप्रसाद मानन्धरलाई पक्राउ गरेको थियो । पाथीभरा अनलाइन डटकममा प्रधानमन्त्रीको स्वास्थ्यसम्बन्धी झूटो समाचार सम्प्रेषण गरेर भ्रम सिर्जना गरेको आरोपमा उनी पक्राउ परेका थिए । महाशाखाले मंसिर ११ मा भ्रमपूर्ण तथा झूटो खबर लेखेको आरोपमा पोस्टपाटी डटकमका सम्पादक गोपाल चन्दलाई तारकेश्वर नगरपालिका मनमैजुबाट पक्राउ गरेको थियो ।

उक्त अनलाइनले मंसिर ८ मा पूर्वप्रधानमन्त्री एवं नेकपाका अध्यक्ष पुष्पकमल दाहाल चितवन गएका बेला 'स्थानीयले खुकुरी प्रहारको प्रयास' शीर्षकमा समाचार छापेको थियो । अनलाइनमा प्रकाशित समाचारको अन्त्यमा उक्त 'समाचार मिर्मिरे अनलाइनबाट साभार गरिएको' उल्लेख छ । त्यतिबेला महाशाखाले समाचारको मूल स्रोतमाथि अनुसन्धान नगरी साभार गर्नेमाथि कारबाही गरेको थियो ।

गत भदौ ५ गते महाशाखाले काभ्रे रोशी गाउँपालिका-५ का वडा सचिव होमनाथ सिग्देलविरुद्ध फेसबुकमा प्रधानमन्त्रीको मानहानि हुने तस्बिर सेयर गरेको आरोपमा पक्राउ गरी विद्युतीय कारोबार ऐन २०६३ अन्तर्गत मुद्दा चलाएको थियो । मानहानिसम्बन्धी सामग्रीको मूल स्रोतमाथि कारबाही नगरी व्यक्ति छानेर पक्राउ गर्ने र मुद्दा चलाउने प्रवृत्ति महाशाखाले यो घटनामा पनि देखाएको थियो ।

सिग्देल पक्राउका बेला प्रधानमन्त्रीको मानहानि हुने तस्बिर पोस्ट गर्ने व्यक्तिको खोजी भइरहेको बताए पनि महाशाखाले सुरुमा उक्त तस्बिर पोस्ट गर्ने कसैलाई पक्राउ गरेन । सिग्देल काठमाडौं जिल्ला अदालतको आदेशमा एक लाख धरौटी बुझाएर भदौ २२ गते छुटे ।

प्रकाशित : जेष्ठ ६, २०७६ १९:४४
पूरा पढ्नुहोस्
प्रतिक्रिया
पठाउनुहोस्