प्रधानमन्त्री ओलीद्वारा बेलायती समकक्षीसँग भेट [भिडियोसहित]

नवीन पोखरेल

लन्डन — प्रधानमन्त्री केपी शर्मा ओलीले तीनदिने बेलायत भ्रमणका क्रममा मंगलबार समकक्षी टेरेजा मेसँग भेट गरेका छन् । प्रधानमन्त्री कार्यालय टेन डाउनिङ स्ट्रिटमा भएको करिब आधा घण्टा लामो भेटमा दुई देशबीच सम्बन्ध सुदृढबारे छलफल भएको थियो ।

बेलायती प्रधानमन्त्री मेले राजीनामा दिइसकेकाले नेपालका प्रधानमन्त्रीको १७ वर्षपछिको बेलायत भ्रमणमा कुनै पनि किसिमको सम्झौता हुन सकेन। 'सहयोगभन्दा पनि मित्रराष्ट्रबीच सहयोग सुदृढ गर्ने कुरा महत्त्वपूर्ण हो,' परराष्ट्रमन्त्री प्रदीप ज्ञवालीले भने, 'बेलायतको सहयोग निरन्तर भई नै रहेको छ। हामीले यसपटक प्रविधि हस्तान्तरण र लगानीका क्षेत्रमा सहयोग गर्न जोड दिएका छौँ।'

प्रधानमन्त्री ओलीले नेपालले हासिल गरेका राजनीतिक उपलब्धिको व्याख्या गर्दै राजनीतिक संक्रमणपछि नेपाल आर्थिक विकासमा केन्द्रित रहेको बताएका थिए। परराष्ट्रमन्त्रीका अनुसार उनले नेपालको विकास प्रयासमा अझ बृहत्तर सहयोग गर्न बेलायतसँग आग्रह गरेका थिए। विकासका साथै प्राकृतिक विपत्ति जस्तै भूकम्पका बेला बेलायतको सहयोगप्रति आभार व्यक्त गरेका थिए।

बेलायती समकक्षी मेले परिवर्तनका लागि नेपाललाई बधाई दिँदै बेलायतको सधैँ दृढ समर्थन र ऐक्यबद्धता रहेको विश्वास दिलाएकी थिइन्। दुवै मुलुक राष्ट्रसंघ मानवअधिकार परिषद्को सदस्य भएका नाताले मानवअधिकारका विषयमा समेत छलफल भएको थियो। प्रधानमन्त्री ओलीले गोर्खा समस्याबारे कुरा उठाएका थिए। उनले नेपाल, भारत र बेलायतबीचको त्रिपक्षीय सन्धि पुनरावलोकन गरी गोर्खा सरोकारलाई गम्भीरतापूर्वक सम्बोधन गर्न मेलाई ध्यानाकर्षण गराएका थिए। गोर्खाहरू बेलायत-नेपाल सम्बन्धको अत्यन्त महत्त्वपूर्ण कडी भएकाले उनीहरूको समस्याबारे छलफल गरेर अगाडि बढ्ने आश्वासन मेले दिएको मन्त्री ज्ञवालीले बताए।

भेटमा ओलीले कूटनीतिक सम्बन्ध स्थापनाको दुई शताब्दी बढी समयमा पनि बेलायती प्रधानमन्त्रीको नेपाल भ्रमण नभएकोप्रति ध्यानाकर्षण गराउँदै उच्चस्तरीय भ्रमण शृंखला जोड्न आग्रह गरेका थिए। प्रत्युत्तरमा मेले आफ्ना उत्तराधिकारीले भावी दिनमा भ्रमणलाई प्राथमिकता दिने जनाएकी थिइन्।

यसैबीच, प्रधानमन्त्री ओलीले बेलायती राजकुमार हयारीसँग पनि मंगलबार भेट गरे। केन्जिङटन प्यालेसमा भएको आधा घण्टा लामो भेटमा द्विपक्षीय सम्बन्धबारे कुराकानी भएको प्रधानमन्त्रीका प्रेस सल्लाहकार कुन्दन अर्यालले जानकारी दिए। भेटमा ओलीले प्रिन्स हयारीलाई भूकम्पका बेला गरेको सहयोगप्रति धन्यवाद दिएका थिए। करिब दुई वर्षअघि नेपाल भ्रमण गरेका हयारीले नेपाल अत्यन्तै चित्ताकर्षक मुलुक भएको बताउँदै आएका छन्।

अफगानिस्तानमा गोर्खा सैनिकहरूसँगै बसेका हयारीले गोर्खालीको बहादुरी र आतिथ्यको खुलेर प्रशंसा गर्दै आएका छन्। भूकम्प गएको झन्डै एक वर्षपछि नेपाल पुगेका हयारीले आफ्नो बसाइ लम्ब्याएर उत्तरी गोरखामा गाउँलेहरूसँगै ढुंगा र माटो बोकेर विद्यालय पुनर्निर्माणमा सघाएका थिए।

ओली र बेलायतका प्रमुख प्रतिपक्षी दल लेबरका नेता जेरेमी कोर्बिनबीच पनि भेटवार्ता भएको छ। प्रधानमन्त्री ओलीसँग भूपू ब्रिटिस गोर्खा र गैरआवासीय नेपालीले दूतावासमा बेग्लाबेग्लै भेट गरी समान पेन्सन मुद्दा र दोहोरो नागरिकताका सवालमा छलफल गरेका थिए।
भिडियो

प्रकाशित : जेष्ठ २८, २०७६ २०:४८
प्रतिक्रिया
पठाउनुहोस्
ADVERTISEMENT

बेलायतमा अन्तर्राष्ट्रिय विद्यार्थी : गृहमन्त्री 'पोस्ट स्टडी वर्क' को पक्षमा 

नवीन पोखरेल

(लन्डन) — बेलायतका एकजना प्रभावशाली मन्त्रीले अन्तर्राष्ट्रिय विद्यार्थीको नियम सहज बनाउने प्रतिबद्धता व्यक्त गरेका छन् । प्रधानमन्त्री टेरेजा मेले शुक्रबार दलको नेताबाट राजीनामा दिएपछि उनको उत्तराधिकारी बन्ने दौडमा रहेका गृहमन्त्री साजिद जाविदले उक्त प्रतिबद्धता व्यक्त गरेका हुन् । सत्तारूढ दलको नेताको दौडमा ११ राजनीतिज्ञ छन् । 

जाविदले 'आफू बेलायतको प्रधानमन्त्रीमा निर्वाचित भए बेलायती विश्वविद्यालयबाट ग्रयाजुएट गरेपछि अन्तर्राष्ट्रय विद्यार्थीलाई 'पोस्ट स्टडी वर्क' को व्यवस्था गर्ने जनाए । उनका अनुसार त्यसअन्तर्गत विद्यार्थीलाई २ वर्षका लागि वर्क पर्मिट (काम गर्ने अनुमति) दिइनेछ ।

जाविदले बेलयातका विश्वविद्यालयमा पढ्न आउने विदेशी विद्यार्थीका लागि आप्रवासनसम्बन्धी नियम पनि खुकुलो बनाउने प्रतिबद्धता जनाए । बि्रटिस फयुचर नामक थिंक टयांकद्वारा लन्डनमा आयोजित एक कार्यक्रमलाई सम्बोधन गर्दै जाविदले बेलायती विश्वविद्यालयबाट पढाइ पूरा गरेका विदेशी विद्यार्थीलाई ६ महिनाभित्रै स्वदेश फर्काउनु अनुपयुक्त भएको बताए ।

यसअघि त्यस्ता विद्यार्थीलाई 'पोस्ट स्टडी वर्क' अन्तर्गत २ वर्षको भिजा दिने गरिन्थ्यो । 'म हाम्रो देशमा अझ धेरै अन्तर्राष्ट्रिय विद्यार्थी पढ्न आएको देख्न चाहन्छु,' गृहमन्त्री जाविदले भने, 'विद्यार्थीले आफनो पढाइ सकेर काम गर्न चाहन्छन् भने उनीहरूलाई सहज रूपमा बस्ने वातावरण मिलाइदिनुपर्छ । यसमा हाम्रो दृष्टिकोण सकारात्मक हुन आवश्यक छ ।'

वर्तमान कामचलाउ प्रधानमन्त्री मे सन् २०१२ मा गृहमन्त्री भएपछि अन्तर्राष्ट्रिय विद्यार्थीमाथि कठोर नियम ल्याएकी थिइन् । मेका पालामा विद्यार्थीले ग्रयाजुएट गरेपछि ४ महिना मात्र बस्न मिल्ने नियम ल्याइएको थियो । आप्रवासी नियन्त्रणकै हिस्सास्वरूप ईयूबाहेकका मुलुकबाट आउने विद्यार्थीलाई कडाइ गरिँदा हजारौं नेपाली विद्यार्थीसमेत प्रभावित भएका थिए ।

व्यापक आलोचनापछि यसै वर्षको सुरुतिर सरकारले नियममा हेरफेर गर्दै पढाइपछि ६ महिनासम्म बस्न दिने व्यवस्था गरेको थियो तर प्रधानमन्त्रीको दाबेदारका रूपमा रहेका जाविदले पूर्वविश्वविद्यालयमन्त्री जो जोन्सनको दुई वर्ष बढाइनुपर्ने मागसहित संशोधन प्रस्तावको समर्थन गरेका छन् ।

बेलायती अखबार फाइनान्सियल टाइम्समा समेत लेख लेख्दै मन्त्री जाविदले बेलायतमा पढाइ सकेका 'क्षमतावान् विद्यार्थीलाई घर फर्काइनु उपयुक्त नहुने' धारणा राखेका छन् । 'मैले पहिल्यै भनिसकेको छु कि विद्यार्थीलाई नियन्त्रण गर्ने मेरो लक्ष्य हुनेछैन । यो बेलायतको हितमा छ,' उनले लेखेका छन् ।

हायर एजुकेसन पोलिसी इन्स्िटच्युटको प्रतिवेदनअनुसार अन्तर्राष्ट्रिय विद्यार्थीले बेलायती अर्थतन्त्रमा वाषिर्क २० बिलियन पाउन्डको योगदान पुर्‍याउने गरेका छन् । बेलायतले सन् २००९ मार्चमा 'पोइन्ट बेस्ड सिस्टम' ल्याएपछि नेपालसहित अन्य मुलुकका हजारौं अन्तर्राष्ट्रिय विद्यार्थी बेलायत ओेइरिएका थिए । नियमको व्यापक दुरुपयोग, नक्कली भाषा सर्टिफिकेट काण्ड र आप्रवासी संख्या अप्रत्याशित रूपमा बढेपछि बेलायत कडा नियम ल्याउन बाध्य भएको अध्यागमन कानुनविद् सोलिसिटर राजु थापा बताउँछन् ।

यसैबीच अमेरिकी राष्ट्रपति डोनाल्ड ट्रम्पको सम्मानमा बेलायती राजदरबारमा सोमबार आयोजित रात्रिभोज -स्टेट ब्यांक्युट) का बेला गृहमन्त्री जाविदलाई निम्ता नगरिएकामा विरोध भएको छ ।
मुस्लिम काउन्सिल अफ बि्रटेनले प्रधानमन्त्री मेलाई एक पत्र लेख्दै जाविदलाई किन निम्ता गरिएन भन्दै मेसँग जवाफ मागेको छ । बि्रटेनको एउटा ठूलो इस्लामिक संगठनले 'मुस्लिम भएकै कारण जाविदलाई नबोलाइएको हो कि' भन्दै बेलायत न्याय र समानताको सिद्धान्तबाट चुक्दै गएको चिन्ता व्यक्त गरेको छ । ट्रम्पलाई दिइएको रात्रिभोजमा नबोलाइने जाविद वरिष्ठ मन्त्री हुन् ।

प्रकाशित : जेष्ठ २६, २०७६ २१:३१
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT