समानुपातिक सांसद जिपछिरिङले स्थानीय तहलाई दिए १० एम्बुलेन्स र २ शव बहान
(दोलखा) — सांसदहरुले निर्वाचन क्षेत्र विकासको बजेट दुरुपयोग गरेको समाचार आइरहनु नौलो भएन । तर, कोही यस्ता सांसद छन जो निजी सम्पत्तिले सार्वजनिक विकास र सेवा गरिरहेका छन् ।
जसमध्ये एक हुन संघीय सांसद जिपछिरिङ लामा शेर्पा । उनले निजी लगानीमा सबै स्थानीय तहहरुलाई एम्बुलेन्स उपलब्ध गराएका छन् । उनले एम्बुलेन्स उपलब्ध गराएसँगै स्थानीय तहको ठूलो आवश्यकता टरेको छ । साथै उनले जिल्लाका दुई नगरपालिकालाई शववाहनसमेत उपलब्ध गराएका छन् । शेर्पाले सांसद हुनु अगाडीदेखि विकास र सेवाका लागि निजी सम्पत्ति खर्चंदै आएका छन् ।
जिल्लामा दुई नगर र सातवटा गाउँपालिका छन् । तिनमा बिरामी ओसार्न एम्बुलेन्सको खाँचो थियो । ‘स्वास्थ्य केन्द्रसम्म बिरामी पुर्याउनु पहिलो आवश्यकता ठानेर स्थानीय तहलाई एम्बुलेन्स उपलब्ध गराएँ,’ उनले भने । शेर्पाले नौ वटा स्थानीय तहमा एक/एक र दुगर्म गाउँ खारेका लागि थप एक गरी १० वटा एम्बुलेन्स आफ्नै खर्चमा किनिदिएका हुन् ।
भीमेश्वर नगरपालिका र जिरी नगरपालिकाका लागि शववाहनसमेत खरिद गरेर दिएका छन् । जसका लागि भन्सार छुट प्राप्त भएकाले एक करोड ४० लाख खर्च भएको उनले बताए । उक्त एम्बुलेन्सहरु सांसद शेर्पाले आफ्नो बा—आमा तेङिमा र दोडामाको नाम स्थापना गरेको प्रतिष्ठानमार्फत उपलब्ध गराएको बताएकाछन् ।
सांसद शेर्पा पेशाले निर्माण व्यवसायी हुन् । हाल उनी कांग्रेसको कोटामा दोस्रो पटक समानुपातिक सांसद भएका हुन् । उनलाई सांसद पदभन्दा सफल व्यवसायीको पहिचानमा बढीले चिन्दछन् ।
व्यवसायी र राजनितिज्ञ दुवैको आवरणमा खुल्न चाहने उनी समाजसेवा गरिरहन्छन् । ‘एम्बुलेन्स, शववाहन र अन्य विकासमा निजी सहयोग गर्नु कुनै राजनीतिक स्वार्थ र प्रचारका लागि हैन,’ सांसद शेर्पा भन्छन् ।
उनको निजी खर्चबाट जिल्लाका धेरै गुम्बाहरु बनेका छन् । खानेपानीका धारा बनेका छन् । बाटाहरु निर्माण भएका छन् । स्कुलहरु बनेका छन् । व्यक्तिहरुको दुःख टरेका छन् । उनी भन्छन, ‘दुःख परेकालाई सहयोग जसले पनि गरे हुन्छ । धन र मन हुने सबैले सहयोग गरौॅ ।’
उनी जनमतबाट निर्वाचित हुनबाट असफल नेतामा पनि पर्छन् । निजी लगानीमा सहयोग र सेवा गर्दै हिँड्ने दोलखाका माधवमणि राजभण्डारी, महेन्द्रबहादुर कार्की, आत्मकृष्ण श्रेष्ठ जस्ता अन्य केही नेताहरु पनि राजनीतिमा सफल छैनन् । उनीहरुको पैसाले स्कुल, पुस्तकालय, मन्दिर, सडक, सहकारीका घरहरु बने तर निर्वाचनबाट सांसद बन्ने अवसर भने आएन ।
सेवा र सहयोगलाई राजनीतिबाट पृथक राखेर हेर्नुपर्ने उनीहरुको विचार छ । सांसद शेर्पा सेवा र सहयोगलाई मनको परोपकारी आदेश भन्छन् । सरकारी वजेटलाई मैले ल्याएको भन्दै प्रचार गर्नु राजनीतिक वेइमानकीको संज्ञा दिदै उनी भन्छन, ‘सकिन्छ भने सबैले मन खोलेर सहयोग गरौँ, मर्दा लानु केही छैन ।’
