जनकपुरका महन्त आन्दोलित

रामानन्दीय वैष्णव संघका कार्यवाहक अध्यक्ष रामभजन दास वैष्णव नेतृत्वको जुलुसमा जानकी मन्दिरका छोटे महन्त रामरोशन दास, सुन्दर सदनका महन्त नवलकिशोर शरणलगायत अधिकांश गुठी, राजगुठी तथा निजी गुठीका महन्त सहभागी थिए । ज्ञापनपत्रमा प्रस्तावित विधेयक फिर्ता लिन माग गरिएको छ ।

यहाँ गुठी संस्थानको पूर्ण स्वामित्वका राममन्दिर, रत्नसागर मठजस्ता राजगुठी, आंशिक स्वामित्वको जानकी मन्दिरजस्ता छुट गुठी र स्वतन्त्र रूपमा गुरु–शिष्य परम्पराअनुसार सञ्चालित निजी गुठी छन् ।

२०३३ सालको कानुनले जानकी मन्दिर, रत्नसागर मठलगायतलाई गुठी संस्थानअन्तर्गत ल्याएको थियो । गुठी अधीनस्थ मठमन्दिरजस्तै छुट गुठीका महन्तको नियुक्ति पनि संस्थानले गर्दै आएको छ । निजी गुठीमा भने गुरु–शिष्य परम्पराअनुसार महन्त नियुक्त हुन्छन् ।

सुन्दर सदनका महन्त नवलकिशोर शरणले पूर्वमहन्तहरूले पुस्तैनी रूपमा आर्जन गरेको श्रीसम्पत्ति, पूजापाठ, धर्मव्यवहारमाथि हस्तक्षेप गर्न खोजिएको आरोप लगाए । ‘निजी गुठीको जग्गा वा मठमन्दिर निर्माणमा सरकारको के योगदान छ ? हाम्रा पुर्खाले आर्जेको श्रीसम्पत्ति, पूजाअर्चना तथा धर्म व्यवहारमाथिको आक्रमण सह्य हुँदैन । कडा आन्दोलनमा जान्छौं,’ उनले भने ।

जानकी मन्दिरका महन्त रामतपेश्वर दास वैष्णवले विधेयक फिर्ता नलिए मठमन्दिर बन्द गर्ने चेतावनी दिएका छन् । उनले भने, ‘गुठी विधेयकले महन्तलाई गुलाम बनाउन खोजेको छ । सनातन धर्मसंस्कृतिमाथि प्रहार गरेको छ । यो फिर्ता लिनुपर्छ ।’