राष्ट्रियसभा गएनन् प्रधानमन्त्री  

कान्तिपुर संवाददाता

काठमाडौँ — प्रतिनिधिसभामा प्रतिपक्षी कांग्रेसको अवरोधका कारण बोल्न नपाएका प्रधानमन्त्री केपी शर्मा ओली राष्ट्रियसभामा गएनन् । प्रतिनिधिसभाको सम्बोधनपछि प्रधानमन्त्रीले राष्ट्रियसभामा पनि सम्बोधन गर्ने सम्भावना थियो । त्यस अनुसारको परम्परा चल्दै पनि आएको छ । तर, उनी त्यता नगएर पत्रकार सम्मेलन मार्फत आफ्ना विषयहरू सार्वजनिक गरेका छन् ।

त्यही अनुसार प्रधानमन्त्री कार्यालयबाट राष्ट्रियसभा सचिवालयलाई समय व्यवस्थापनका लागि भनिएको थियो । तर, प्रतिनिधिसभामा प्रधानमन्त्रीले बोल्ने कार्यक्रम बिथोलिएपछि उताको कार्यक्रम पनि रोकियो । कार्यसूची तय गर्नुपूर्व नै प्रधानमन्त्रीको सचिवालयबाट प्रधानमन्त्रीले राष्ट्रियसभामा सम्बोधन नगर्ने सूचना आएपछि उनको सम्बोधनलाई कार्यसूचीमा राखिएको थिएन ।

कसले बोल्ने विषयमा प्रतिनिधिसभामा विवाद बढेर अवरुद्ध भएपनि राष्ट्रियसभा भने सहज ढंगले सञ्चालन भएको थियो । सत्ता र प्रतिपक्षका नेताले समय लिएर बोलेका थिए । नेकपा नेता दिननाथ शर्माले राष्ट्रियसभामा पेस भएर प्रक्रियामा रहेको गुठी विधेयक बारे प्रतिनिधिसभामा छलफल हुनु ठिक परम्परा नरहेको बताए । ‘विधेयक यहाँको प्रक्रियामा छ । तर, त्यस विषयमा प्रतिनिधिसभामा चर्को स्वर गुन्जिएको छ । के ठिक हो ?,’ उनले भने ‘हाम्रो क्षेत्राधिकारलाई हस्तक्षेप गरेर त्यहाँ विषय उठाइएको छ । त्यो विधि र परम्परा विपरीत छ । त्यसप्रति दुःख व्यक्त गर्दछु ।’

कांग्रेस नेता सुरेन्द्रराज पाण्डेले सरकारले एकपछि अर्को विवादित विधेयकहरू ल्याएकाले ती सबै फिर्ता हुनुपर्ने माग गरे । ‘विवादित सबै विधेयक फिर्ता लिई सरोकारवालाहरूसँगको छलफलपछि विधेयकहरू ल्याइनुपर्छ,’ उनले भने ‘त्यसले संसद्को गतिविधिलाई पनि सहज बनाउँछ ।’ उनले सदन प्रतिपक्षीको हुने अभ्यास विपरीत प्रतिपक्षीको आवाजलाई सदनमा दबाउन खोजिए त्यो सडकमा पोखिने उल्लेख गरे ।

प्रकाशित : असार ३, २०७६ १९:०४
प्रतिक्रिया
पठाउनुहोस्

व्यंग्यात्मक शैलीमा प्रधानमन्त्रीले भने, 'माइतीघर मण्डला त साँच्चैको माइतीघर भइरहेछ'

कान्तिपुर संवाददाता

काठमाडौँ — प्रधानमन्त्री केपी ओलीले आवेष र उत्तेजनामा आएर कुनै पनि विरोध नगर्न सरोकारवालालाई अपील गरेका छन् । विभिन्न विधेयकका विरुद्धमा माइतीघर मण्डलामा भइरहेको विरोधप्रति लक्षित गर्दै उनले परिस्थिति बिगारेर आफ्नो दूनो सोझ्याउनका निम्ति सधैं माइतीघर मण्डला नजान आग्रह गरे ।

मंगलबार सिंहदरबारमा आयोजित पत्रकार सम्मेलनमा बोल्दै प्रधानमन्त्रीले भने, समस्याको समाधान संसद् र संवादबाट गर्न सकिने उपाय सुझाए।समस्यालाई लिएर आन्दोलन गर्नुपर्ने जरुरी नरहेको बताउँदै प्रधानमन्त्रीले भने,‘द्वन्द्व र लडाइँसंवादबाट टुंगिन्छ भने सानातिना कुराहरु वातचितबाटै टुंगिन्छ ।’ व्यंग्यात्मक शैलीमा प्रधानमन्त्रीले भने, 'माइतीघर मण्डला त साँच्चैको माइतीघर भइरहेछ । यताउता केही भयो कि हुर्रर कुदेर जाने । मलाई घरमा यस्तो गरे भन्ने जस्तो गरेर ।'

उनले अहिलेको सरकार लोकतान्त्रिक आन्दोलन, बलिदान दिएर आएको उल्लेख गर्दै लोकतन्त्रको रक्षाका लागि प्रतिबद्ध रहेको बताए। सरकारले समृद्धिको काम अगाडि लगेको छ भन्दा केही तत्व आत्तिएका प्रधानमन्त्रीको टिप्पणी थियो । उनले सरकार जनाताको चाहनाबमोजिम काम गर्ने प्रस्ट्याए । प्रधानमन्त्रीले भने, ‘जनताले जे चाहन्छन् सरकारले त्यही गर्छ। देशको समृद्धि र विकास यसको अभिष्ट हो। सुशासन र विकास यो सरकारको मूलमन्त्र हो र त्यसलाई साकार पार्दै अगाडि बढ्छ।’

प्रकाशित : असार ३, २०७६ १८:५७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT