इन्जिनियरिङ कलेजमा तोडफोड

काउन्सिलमा दर्ता नगरेकामा विद्यार्थी आक्रोशित
कान्तिपुर संवाददाता

विराटनगर — इन्जिनियरिङ काउन्सिलमा दर्ता नगरेको भन्दै मंगलबार पूर्वाञ्चल विश्वविद्यालयको आंगिक क्याम्पस ‘स्कुल अफ इन्जिनियरिङ एन्ड टेक्नोलोजी’ का विद्यार्थीले प्रशासन र लेखामा तोडफोड गरेका छन् । उनीहरूले क्याम्पस प्रमुख मनोजकुमार साहको कुर्सीसमेत जलाएका छन् ।

तोडफोडका कारण क्याम्पसको प्रशासनिक विभागका कम्प्युटर, फोटोकपी मेसिन, टेलिफोन, फर्निचर र झ्यालका सिसा फुटेका छन्।

काउन्सिलमा दर्ता नगरेकाले आफूहरूको भविष्य अन्योलपूर्ण भएको भन्दै विद्यार्थीहरू आक्रोशित बनेका हुन्। कलेजको लापरबाहीका कारण काउन्सिलमा दर्ता नभएको र ल्याबका सामग्रीसमेत नरहेको भन्दै उनीहरूले पटक–पटक आन्दोलन गरिसकेका छन्।

‘ब्याचलर इन सिभिल इन्जिनियरिङ’ को दुई ब्याचका विद्यार्थी उत्तीर्ण भए पनि काउन्सिलमा दर्ता हुन सकेका छैनन्। विश्वविद्यालयले यो क्याम्पसलाई इन्जिनियरिङ काउन्सिलमा अझै दर्ता गरेको छैन। अनुगमनका लागि पटक–पटक आएको इन्जिनियरिङ काउन्सिलको टोलीले क्याम्पसमा पूर्वाधार अभाव, ल्याबका सामान नभएको र विषयगत शिक्षक नभएको भन्दै हालसम्म दर्ता नदिएको क्याम्पस प्रशासन स्रोतको दाबी छ।

काउन्सिलमा दर्ता प्रक्रिया अन्तिम चरणमा पुगे पनि क्याम्पसको फाइल मन्त्रिपरिषदको क्याबिनेटमा पुग्न नसक्दा दर्ता प्रक्रियामा ढिलाइ भएको क्याम्पस प्रमुख साहले बताए। काउन्सिलले तोकेको मापदण्ड क्याम्पसले पूरा गरी दर्ता प्रक्रिया अगाडि बढाएको उनको दाबी छ। क्याम्पस काउन्सिलमा दर्ता नहुँदा सिभिलका ५० भन्दा बढी विद्यार्थी उत्तीर्ण भए पनि उनीहरूले शैक्षिक प्रमाणपत्रको सदुपयोग गर्न पाएका छैनन्।

यो क्याम्पसको सिभिल इन्जिनियरिङतर्फ एक ब्याचमा ४८ जना विद्यार्थी अध्ययनरत छन्। विद्यार्थी वकिल भट्टराईले क्याम्पसमा नियमित पढाइसमेत नहुने गरेको गुनासो गरे। परीक्षाकै मुखमा क्याम्पस प्रशासनले असार ३ देखि ३१ गतेसम्म क्याम्पस बिदाको सूचना प्रकाशित गरेको छ।

प्रकाशित : असार ३, २०७६ १९:२०
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

राष्ट्रियसभा गएनन् प्रधानमन्त्री  

कान्तिपुर संवाददाता

काठमाडौँ — प्रतिनिधिसभामा प्रतिपक्षी कांग्रेसको अवरोधका कारण बोल्न नपाएका प्रधानमन्त्री केपी शर्मा ओली राष्ट्रियसभामा गएनन् । प्रतिनिधिसभाको सम्बोधनपछि प्रधानमन्त्रीले राष्ट्रियसभामा पनि सम्बोधन गर्ने सम्भावना थियो । त्यस अनुसारको परम्परा चल्दै पनि आएको छ । तर, उनी त्यता नगएर पत्रकार सम्मेलन मार्फत आफ्ना विषयहरू सार्वजनिक गरेका छन् ।

त्यही अनुसार प्रधानमन्त्री कार्यालयबाट राष्ट्रियसभा सचिवालयलाई समय व्यवस्थापनका लागि भनिएको थियो । तर, प्रतिनिधिसभामा प्रधानमन्त्रीले बोल्ने कार्यक्रम बिथोलिएपछि उताको कार्यक्रम पनि रोकियो । कार्यसूची तय गर्नुपूर्व नै प्रधानमन्त्रीको सचिवालयबाट प्रधानमन्त्रीले राष्ट्रियसभामा सम्बोधन नगर्ने सूचना आएपछि उनको सम्बोधनलाई कार्यसूचीमा राखिएको थिएन ।

कसले बोल्ने विषयमा प्रतिनिधिसभामा विवाद बढेर अवरुद्ध भएपनि राष्ट्रियसभा भने सहज ढंगले सञ्चालन भएको थियो । सत्ता र प्रतिपक्षका नेताले समय लिएर बोलेका थिए । नेकपा नेता दिननाथ शर्माले राष्ट्रियसभामा पेस भएर प्रक्रियामा रहेको गुठी विधेयक बारे प्रतिनिधिसभामा छलफल हुनु ठिक परम्परा नरहेको बताए । ‘विधेयक यहाँको प्रक्रियामा छ । तर, त्यस विषयमा प्रतिनिधिसभामा चर्को स्वर गुन्जिएको छ । के ठिक हो ?,’ उनले भने ‘हाम्रो क्षेत्राधिकारलाई हस्तक्षेप गरेर त्यहाँ विषय उठाइएको छ । त्यो विधि र परम्परा विपरीत छ । त्यसप्रति दुःख व्यक्त गर्दछु ।’

कांग्रेस नेता सुरेन्द्रराज पाण्डेले सरकारले एकपछि अर्को विवादित विधेयकहरू ल्याएकाले ती सबै फिर्ता हुनुपर्ने माग गरे । ‘विवादित सबै विधेयक फिर्ता लिई सरोकारवालाहरूसँगको छलफलपछि विधेयकहरू ल्याइनुपर्छ,’ उनले भने ‘त्यसले संसद्को गतिविधिलाई पनि सहज बनाउँछ ।’ उनले सदन प्रतिपक्षीको हुने अभ्यास विपरीत प्रतिपक्षीको आवाजलाई सदनमा दबाउन खोजिए त्यो सडकमा पोखिने उल्लेख गरे ।

प्रकाशित : असार ३, २०७६ १९:०४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT