'भौतिक पूर्वाधारका कार्यक्रम कनिका छरेजस्तो'

तीन मन्त्रालयका विभिन्न शीर्षकमा छलफल
कान्तिपुर संवाददाता

काठमाडौँ — विनियोजन विधेयकअन्तर्गत तीन मन्त्रालयका विभिन्न शीर्षकमा प्रतिनिधिसभाको बुधबारको बैठकमा छलफल जारी छ  । बैठकमा श्रम, रोजगार तथा सामाजिक सुरक्षा, भौतिक पूर्वाधार तथा यातायात र ऊर्जा, जलस्रोत तथा सिँचाइ  मन्त्रालयअन्तर्गत विभिन्न शीर्षकमा छलफल भएको हो । 

प्रमुख प्रतिपक्षी दल नेपाली कांग्रेसकी डिला सङ्ग्रौलाले श्रम, रोजगार तथा सामाजिक सुरक्षा मन्त्रालय शीर्षकको खर्च रकममा एक रुपैयाँ कायम गरियोस् भन्दै खर्च कटौती प्रस्ताव प्रस्तुत गरिन् । सरकारले नयाँ रोजगारीको क्षेत्र पहिल्याउन नसकेको आरोप लगाउँदै उनले श्रमका लागि विदेशिएका युवाले सामाजिक सुरक्षा नपाएको र सरकारले स्वदेशभित्र नै रोजगार सिर्जना गर्न नसकेको टिप्पणी गिरन् ।

सोही पार्टीका सञ्जयकुमार गौतमले भौतिक पूर्वाधार तथा यातायात मन्त्रालय शीर्षकको खर्च रकममा एक सय रुपैयाँ कायम गरियोस् भन्दै खर्च कटौती प्रस्ताव प्रस्तुत गरे । भौतिक पूर्वाधारका कार्यक्रम कनिका छरेजस्तो र सपनाको महल बनाउने खालको रहेको चर्चा गर्दै उनले जनताको आवश्यकताभन्दा सत्ता पक्षका नेताका पहुँचका आधारमा सडक पूर्वाधारमा रकम विनियोजन गरिएको आरोप लगाए ।

कांग्रेसकै ज्ञानेन्द्रबहादुर कार्कीले ऊर्जा मन्त्रालय शीर्षकको खर्च रकममा एक रुपैयाँ कायम गरियोस् भन्दै खर्च कटौती प्रस्ताव प्रस्तुत गरे । विद्युत् विकासका क्षेत्रमा नयाँ कार्यक्रम आउन सकेको छैन भन्दै उनले प्रसारण लाइन समयमा बन्न नसक्दा निजी क्षेत्र निरास भएको बताए । सांसद कार्कीले बूढीगण्ढकी जलविद्युत् आयोजना निर्माण अगाडि बढाउनसमेत माग गरे ।

नेपाल मजदूर किसान पार्टीका प्रेम सुवालले ती तीनवटै मन्त्रालयका विभिन्न शीर्षकको खर्च रकममा एक रुपैयाँ कायम गरियोस् भन्ने खर्च कटौती प्रस्ताव प्रस्तुत गर्दै हिमाल, पहाड र तराईलाई नयाँ सडक सञ्जालले जोड्नुपर्ने आवश्यकता औँल्याए । उनले सरकारले नै सार्वजानिक यातायातको व्यवस्था गर्न, सडक निर्माण गर्न तथा कालोपत्र गर्न स्थानीय निकायमा पठाउनुपर्ने र काठमाडौँ उपत्यकामा विद्युतीय सवारी साधनको व्यवस्था गर्नुपर्ने माग गरे ।

यसअघि शून्य समयमा संविधानको भावनाअनुरुप लोकसेवा आयोगको विज्ञापनलाई समावेशी र समानुपातिक बनाउन, कञ्चनपुरका सुकुम्वासी समस्या समाधान गर्न, मिडिया काउन्सिलसम्बन्धी विधेयक सच्याउन र भ्रष्टाचार नियन्त्रण गर्न सांसदहरूले सरकारको ध्यानाकर्षण गराए । सरकारी अस्पतालमा बिग्रिएका उपकरण मर्मतमा ध्यान दिन, सडक दुर्घटना हुन नदिन सचेतनाका कार्यक्रम सञ्चालन गर्न र शून्य समयमा उठाइएका समसामयिक विषय के कति पूरा भयो भन्नेबारेमा सरकारले सदनमा जानकारी दिन मागसमेत गरिएको थियो ।

यसरी शून्य समयमा आफ्नो भनाइ राख्ने सांसदहरूमा पुष्पा भुसाल, पार्वता डिसी चौधरी, पद्म गिरी, निरुदेवी पाल, नवराज सिलवाल, नमिताकुमारी चौधरी, देवप्रसाद तिमल्सिना, देवप्रसाद गुरुङ, दिलेन्द्रप्रसाद बडू, दिव्यमणिराज भण्डारी, तेजुलाल चौधरी, डिला सङग्रैला, टेकबहादुर बस्नेत, प्रेम आले, प्रेम सुवाललगायत थिए ।

प्रकाशित : असार ४, २०७६ १४:२८
प्रतिक्रिया
पठाउनुहोस्

चार दिनदेखि सडक अवरुद्ध

आनन्द गौतम

ताप्लेजुङ — सिरिजंघा गाउँपालिका-१ सिनाममा झरेको पहिरोले सडक बगाउँदा चार दिनदेखि यातायात अवरुद्ध भएको छ । सडक अवरुद्ध बनेपछि सिरिजंघा गाउँपालिकाको केन्द्र तेल्लोक जाने र फर्कने यात्रुलाई समस्या भएको छ । सिनाम र आम्बेगुदिन जोड्ने नेबुखोला छेउमा झरेको पहिरोले करिव २० मिटर सडक बगाएको शिक्षक चन्द्र बुढाथोकीले बताएका छन् । 

पहिरो शनिबार राति झरेको थियो । यो मार्ग भएर झापा बिर्तामोड र सदरमुकाम फुङलिङबाट सवारी चल्ने गरेको थियो । यस्ले आम्बेगुदिनको खाम्दिङ्गे बजारपनि यातायातबाट पनि बञ्चित भएको छ । सडक नहुँदा तेल्लोकबाट सिनामको डाँडाँ गाउँसम्म पुग्न तीन घण्टा बढी पैदल हिँड्नुपर्छ । याम्फुदिन, मामाफ्रे खेवाङबाट आउने यात्रुलाई पहिरोका कारण ठूलै समस्या भएको छ । एकै दिनमा सदरमुकाम पुग्ने यी क्षेत्रका बासिन्दाले अब बास बस्नुपर्ने भएको छ ।

पहिरो पन्छाउने प्रयास भइरहेको वडाध्यक्ष उर्मिला थेवेले बताइन् । गतवर्षपनि यही ठाउँमा पहिरो झरेर पटक/पटक सडक अवरुद्ध बनाएको थियो । पहिरो पन्छाउन ५ लाख बढी खर्च भएको थियो । तत्काल अरु विकल्प नभएकाले गाउँपालिका सँग कुरा गरेर सडक खुलाउने प्रयत्नमा रहेको थेबे बताउँछिन् । गाउँपालिका अध्यक्ष टीका गुरुङका अनुसार पानी पर्ने क्रम रोकिएपनि गाउँपालिकाकै स्काभेटर प्रयोग गरेर खुलाउने प्रयास गरिने छ । ताप्लेजुङमा प्रत्येक रातजसो वर्षा भइरहेको छ । कमेरे माटो र बगिरहने क्षेत्र भएकाले सामान्य वर्षा हुनासाथ प्रत्येकवर्ष पहिरो जाने गरेको छ ।

प्रकाशित : असार ४, २०७६ १४:१३
पूरा पढ्नुहोस्
प्रतिक्रिया
पठाउनुहोस्