दुई अधिकृत र इन्स्पेक्टरसहित ८ जनाविरुद्ध मुद्दा

कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले दुई शाखा अधिकृत र इन्स्पेक्टरसहित ८ जनाविरुद्ध विशेष अदालतमा भ्रष्टाचार मुद्दा दायर गरेको छ । अख्तियारले साना तथा मझौला कृषक आयस्तर वृद्धि आयोजना, नेपालगन्जका तत्कालीन अनुगमन तथा मूल्यांकन अधिकृत देवराज भुसालसहित ३ विरुद्ध मुद्दा दायर गरेको हो । 

मुद्दा दायर गरिएकामा आयोजनाका कृषि प्राविधिक मोतीप्रसाद न्यौपाने, दैलेखको नारायण नगरपालिका–१, कुइकानास्थित श्रीस्थान ताजा तरकारी उत्पादन कृषक समूह, व्यावसायिक अदुवा उत्पादन उपआयोजना कृषक समूहका अध्यक्ष रामकुमारी केसी छन् । खेती नै नगरेका कृषकहरूको भर्पाइसमेतको नक्कली बिललगायतका कागजात तयार गरी अनियमितता गरेकाले उनीहरूविरुद्ध मुद्दा दायर गरिएको अख्तियारले जनाएको छ ।

त्यस्तै, अख्तियारले इलाका प्रहरी कार्यालय रन्यौरा, रूपन्देहीका प्रहरी निरीक्षक केशवबहादुर बस्नेतविरुद्ध मुद्दा दायर गरेको छ । ट्याक्टरबाट नियमानुसारको प्रक्रिया पूरा गरी गैडहवा गाउँपालिकाबाट नदीजन्य पदार्थ ढुवानी गरिरहेका सेवाग्राहीसँग बस्नेतले १५ हजार रुपैयाँ घूस लिएको पुष्टि भएकाले उनीविरुद्ध मुद्दा दायर गरिएको अख्तियारले जनायो ।

अख्तियारले शिक्षा विकास तथा समन्वय इकाई सल्यानका प्रमुख (शाखा अधिकृत) धनबहादुर वलीलाई घूस रकमसहित पक्राउ गरेको छ । शिक्षक सरुवा प्रक्रिया सहज बनाइदिने बहानामा सेवाग्राहीसँग लिएको २५ हजार रुपैयाँ घूस रकमसहित वली रंगेहात पक्राउ परेको अख्तियारले उल्लेख गरेको छ ।

अख्तियारले २ करोड रुपैयाँभन्दा बढी गैरकानुनी आर्जन गरेको अभियोगमा कञ्चनपुर भन्सार कार्यालयका तत्कालीन नायब सुब्बा रामप्रसाद भट्टराईविरुद्ध मुद्दा दायर गरेको छ । अर्थ मन्त्रालयअन्तर्गत विभिन्न कार्यालयमा कार्यरत रहँदा भट्टराईले ३ करोड १५ लाख रुपैयाँ कमाइ गरेको, तर १ करोड १५ लाखको मात्र स्रोत खुलेकाले २ करोड अकुत सम्पत्ति आर्जन गरेकामा उनीविरुद्ध भ्रष्टाचार मुद्दा दायर गरिएको अख्तियारले जनाएको छ । अख्तियारले भट्टराईलाई २ करोड बिगो कायम गरी जरिवाना र जेल सजाय गर्न अभियोगपत्रमा मागदाबी गरेको छ ।

अख्तियारले रत्न कन्या आधारभूत विद्यालय, सिर्सिया, रौतहटका प्रधानाध्यापक राकेशकुमार सिंहविरुद्ध भ्रष्टाचार मुद्दा दायर गरेको छ । सिंहले विद्यालयको कम्प्युटर खरिद, सरकारबाट प्राप्त अनुदान, छात्रवृत्ति, पाठ्यपुस्तक खरिद रकम गरी १ लाख ५६ हजार रुपैयाँ हिनामिना गरेकाले उनीविरुद्ध मुद्दा दायर गरिएको अख्तियारले जनाएको छ ।

अख्तियारले श्री निम्न माध्यमिक विद्यालय, राघोपुर, सिरहाको भवन निर्माण समितिका अध्यक्ष जागेश्वर धुरझार (यादव) विरुद्ध भ्रष्टाचार मुद्दा दायर गरेको छ । यादवले विद्यालय भवन निर्माणका क्रममा ४ लाख ६१ हजार रुपैयाँ हिनामिना गरेकाले उनीविरुद्ध मुद्दा दायर गरिएको अख्तियारले उल्लेख गरेको छ । मुद्दा दायर भएसँगै दुई शाखा अधिकृत, इन्स्पेक्टरसहित ५ सरकारी कर्मचारी सेवाबाट निलम्बित भएका छन् ।

प्रकाशित : असार १०, २०७६ १९:५७
प्रतिक्रिया
पठाउनुहोस्

फ्रि तिब्बतको कार्यक्रमले विवादित सांसद यादव पार्टीबाट निलम्बित

कान्तिपुर संवाददाता

काठमाडौँ — समाजवादी पार्टीबाट प्रतिनिधिसभाका सदस्य प्रदीप यादव पार्टीबाट ६ महिनाका लागि निलम्बित भएका छन् । फ्रि तिब्बतको कार्यक्रममा सहभागी भएपछि विवादित बनेका सांसद यादवलाई समाजवादी पार्टीको मंगलबार बसेको केन्द्रीय कार्यकारिणी समिति बैठकले ६ महिनाका लागि निलम्बनको निर्णय गरेको हो ।

सांसद यादव पार्टी नीतिविपरीत जानकारी नै नगराइ लाटभियामा भएको 'इन्टरनेशनल नेटवर्क अफ पारलियामेन्टैरियन अन फ्रि तिब्बत' कार्यक्रममा सहभागी भएको भन्दै समाजवादीले स्पष्टीकरण सोधेको थियो । उनको स्पष्टीकरण चित्तबुझ्दो नभएकोले निलम्बनको निर्णय गरिएको मंगलबार समाजवादीका उपमहासचिव तथा केन्द्रीय कार्यालय प्रमुख प्रकाश अधिकारीले जारी गरेको विज्ञप्तिमा जनाइएको छ ।

बैठकले पार्टीको विभिन्न विभागसमेत गठन गरेको छ । जसअनुसार कार्यालय प्रमुखमा अधिकारी, प्रचार विभागमा सचिव प्रशान्त सिंह, अर्थ विभागमा कोषाध्यक्ष विजयकुमार यादव, विज्ञ परिषद् प्रमुखमा पुष्पराज राजकर्णिकार र केन्द्रीय सल्लाहकार समिति प्रमुखमा भीमप्रसाद गौतम चयन भएका छन् ।

प्रकाशित : असार १०, २०७६ १९:५७
पूरा पढ्नुहोस्
प्रतिक्रिया
पठाउनुहोस्