चन्द समूहद्वारा गाउँपालिको कार्यालयमा आगजनी

आगजनीबाट महत्वपूर्ण कागाजात जलेर नष्ट भएका छन् । आगजनीबाट ३ करोडको क्षति भएको गाउँपालिका अध्यक्ष धिरबहादुर विष्टले बताए । ‘महत्त्वपूर्ण कागजातसहित भौतिक सामान सबै नष्ट भएका छन् ।’अध्यक्ष विष्टले भने, ‘आर्थिक वर्ष सकिने बेला कार्यालय जलाएपछि काम गर्न अप्ठेरो भयो ।’

उनले मंगलबार राति नै नरहरिनाथ ५ रुप्सा र ६ माल्कोट सेरापाटास्थित वडा कार्यालयमा पनि तोडफोड गरी कागजात नष्ट गरेको जानकारी दिए ।

कुमालगास्थित गाउँपालिका भवनभित्र रहेका महत्त्वपूर्ण कागजातसहित दराज, टेबुल, कुर्सी, कम्प्युटर, ल्यापटप, प्रिन्टर, फोटोकपी मेसिन जलेर नष्ट भएका छन् । गाउँपालिकाको २० लाख मूल्यको सोलार पनि जलेर नष्ट भएको छ ।

राति १ बजेको समयमा चन्द कार्यकर्ताले पेट्रोल छर्किएर आगजनी गरेको कालिकोटका डीएसपी विनोद शर्माले बताए । डीएसपी शर्माले आगजनी गर्नेको खोजी भइरहेको बताए ।