लाञ्छना लागेपछि धुरुधुरु रोए मेयर

वीरेन्द्र केसी

अर्घाखाँची — डेढ वर्षदेखि भूमिकास्थान नगरपालिकाका प्रमुख रेशम थापा र उपप्रमुख खडानन्द बेल्वासेबीच खटपटले विकासका काम प्रभावित भएका छन् । उनीहरूबीचको खटपट आर्थिक वर्ष २०७६/७७ को प्रस्तावित बजेट बनाउने क्रममा नगरसभामै छताछुल्ल भयो ।

प्रमुख–उपमेर, वडाध्यक्षबीच भनाभन भएपछि दुई दिनसम्म नगरसभा अवरुद्ध भयो। योजना अनुगमन, भुक्तानी, सेवासुविधाबारे आरोप–प्रत्यारोप चल्यो। असमझदारीबीच नगरसभा पूरा गरियो। सभामा थापा र बेल्वासेले एकअर्कालाई कटाक्ष पनि गरे।

सभामा नगरप्रमुख थापा एक्लै भए। उपप्रमुख बेल्वासेसहित ९ वटै वडाका वडाध्यक्ष एकातिर भए। स्रोतका अनुसार योजनाको बजेट बाँडफाँट गर्दा कुरा नमिलेपछि विवाद भएको हो। एक्लिएपछि थापा सभा छाडेर दुई घण्टा रोएका थिए। ‘नगरको बजेट योजना बनाउने, कहाँ, कुन योजनामा, कति बजेट राख्ने र सबै जनप्रतिनिधिको भावनाअनुसार काम गर्न नसकेकै कारण रुनु लाजमर्दो कुरा हो,’ वडा नम्बर ३ का अध्यक्ष बालकृष्ण बन्जाडेले भने।

आफ्नो काम, कर्तव्य के हो ख्याल नगरी अनावश्यक अरू जनप्रतिनिधिको काममा हस्तक्षेप गर्ने अनि भत्ताको कुरा उठाएर अतिरञ्जित गर्नु राम्रो नभएको उनको भनाइ छ। ‘बैठक भत्ता र अन्य सेवासुविधाबारे बैठकमा कुरै उठेको छैन,’ उनले भने, ‘बाहिर हल्ला फिँजाएर भ्रम छरियो।’

थापाले शनिबार सदरमुकाममा पत्रकार सम्मेलन गरी उपप्रमुख र वडाध्यक्षहरूले नगरप्रमुखभन्दा आफू ठूलो ठानेकाले समस्या भएको प्रतिक्रिया दिए। ‘मेरो पदलाई नमान्ने, स्वीकार गर्न नसक्ने,’ उनले भने, ‘उहाँहरू (उपप्रमुख, वडाध्यक्ष) का अनुसार नगर चल्दैन।’ नगरसभामा आफूलाई व्यक्तिगत लाञ्छना लगाएर गाली गरेकाले दुःख लागेर रोएको उनले बताए। ‘मन थाम्न सकिनँ,’ उनले भने, ‘धेरैबेर रोएँ।’

नगरलाई भ्रष्टाचारमुक्त र पारदर्शी ढंगले अगाडि बढाउन विकास योजनाको काम भइरहेको उनले बताए। ‘म एक्लै छु, सत्यका लागि लडछु,’ उनले भने, ‘जनताले मूल्यांकन गर्छन्।’ नगर प्रमुख थापाले पदको दुरुपयोग गरेको वडा नम्बर ४ का अध्यक्ष बाबुराम पन्थी सुनारको आरोप छ। ‘बैठकमा भत्ताको विषय नै प्रवेश भएन, सभा गर्ने ढंग नभएर रुने र कराउने अनि बाहिर भत्ता नलिऔं भनेर प्रस्ताव राख्दा म एक्लिएँ भनेर भ्रम छर्ने काम थापाले गरे,’ उनले भने।

थापा र बेल्वासेबीचको व्यक्तिगत कारणले नगरसभा भाँडिने स्थिति आएपछि वडा नम्बर ९ का अध्यक्ष नारायण खनाल, ३ का अध्यक्ष बालकृष्ण बन्जाडेसहितको टोलीले दुवै जनालाई मिलाएर भाँडिनबाट जोगाएको उनले बताए। ‘हामीले उहाँ (थापा र बेल्वासे) को इज्जत जोगाइदियौं, हाम्रो चरित्रहत्या गर्न लुकेर पत्रकार सम्मेलन गर्नु बेठीक हो,’ उनले भने, ‘हामीले फेरि पत्रकार सम्मेलन गरेर प्रमुखका कर्तुत सार्वजनिक गरिदियौं भने के होला?’ प्रमुखले काठमाडौं जाँदाआउँदा र व्यक्तिगत काम गर्दा सरकारी गाडी दुरुपयोग गरेको उनको आरोप छ।

अनुगमन समिति, बजेट तर्जुमा समितिको संयोजक नगरमा उपप्रमुख हुन्छ। थापाले आफैं हस्तक्षेप गर्नु राम्रो नभएको उनले बताए। प्रमुख थापा मदिरा र बेल्वासे हार्डवेयर व्यापारी भएकाले राजनीतिक संस्कारको कमी भएको स्थानीयको भनाइ छ। सानातिना विषयमा पनि झगडा गरेर काममा भाँजो होल्ने काम भएको उनीहरूले बताए।

अनावश्यक रूपमा नचाहिँदा कुरा काट्ने, अरूको अधिकारमाथि हस्तक्षेप गर्ने प्रमुखको बानीले अप्ठ्यारो परेको उपप्रमुख बेल्वासेको भनाइ छ। ‘प्रमुख, उपप्रमुख र वडाध्यक्षबीच राजनीतिक र व्यक्तिगत कुराले असमझदारी होला,’ नगरपालिकाका प्रमुख प्रशासकीय अधिकृत हरिप्रसाद अर्यालले भने, ‘त्यो उहाँहरूको कुरा हो।’

प्रकाशित : असार १५, २०७६ २०:१८
प्रतिक्रिया
पठाउनुहोस्
ADVERTISEMENT

झगडा मिलाउन खाेज्दा आफैं मरणासन्न

वीरेन्द्र केसी

अर्घाखाँची — जेठ ३२ गते शनिवार गाउँकै साथीभाई मिलेर क्रिकेट खेलका थिए । भूमिकास्थान नगरपालिका धारापानीस्थित ठूलाखर्क युथ क्लबले खाकाबेंसीमा क्रिकेटको आयोजना गरेका थियो । धारापानी र ढाकावाङ गाउँका खेलाडीबीच विवाद साम्य नहुँदा दुई दिनपछि मेलामा भएको झडप छुट्टयाउन पुगेका धारापानीका २६ वर्षीय शम्भु शाही मरणासन्न हुने गरी कुटिए ।

उनको काठमाडौ मेडिसिटी अस्पतालमा उपचार भैरहेको छ। डाक्टरका अनुसार उनको स्वास्थ्य खतरामुक्त छ।

असार २ गते गाउँकै भूमिकास्थान मन्दिरमा जेठे पूर्णिमाको ठूलो मेला लागेको थियो। मेला हेर्न दुवै गाउँका क्रिकेट खेलाडी पनि आएका थिए। क्रिकेट खेलेका ढाकावाङकासहितका ६ जना युवाले धारापानीका खेलाडी धारापनीका अनिल आचार्यलाई मेलास्थलमै कुटपिट गरे। घरबाट सँगै मेला हेर्न गएका साथी अनिललाई कुटेको देखेपछि शाहीले बचाएर ल्याई केही परको होटलमा खाजा खान लगे। प्रहरीले झडपलाई छुट्टाएको थियो।

खाजा खाँदै गर्दा ६ जनाको टोलीले प्रहरीको आँखा छल्दै शाहीलाई पछाडिबाट वियरको बाेतलले ढाडमा हिर्काए। जबरजस्ती पेट काटेर बाेतलका सिसा पेटभित्र छिराइदिएर उनीहरु भागे।

बेहोस भएका शाही स्थानीय र प्रहरीले सन्धिखर्क अस्पतालमा ल्याइए। सामान्य उपचारपछि काठमाडौ ल्याइयो। ‘डाक्टरले आन्द्रामा पुगेको सिसा निकालिदिएपछि पनि उनी राम्ररी बोल्न सकेका छैनन्,’ उपचारमा संलग्न उनका दाई पवनले भने। झगडा गर्नु हुँदैन भनेर छुट्टाउन जाँदा भाइको यस्तो हालत भयो, हामी अन्यायमा परेको उनले बताए। काठमाडौंमा कोरियन भाषा पढ्दै गरेका शम्भु दुई दिन अघि मात्रै घर गएका थिए।

'ढाकावाङको टीमले नाम दर्ता भएका खेलाडी बाहेक बाहिरको मान्छे राखेपछि मैले किन बाहिरको राखेको भनेर सोधेको थिएँ, त्यसपछि झगडा भयो, पछि साम्य भएर खेल्यौं, खेलमा हामी पहिलो दिनमै दुई समुह पराजित भयौं, आचार्यले भने।

‘मेलामा क्रिकेट खेलेका ढाकावाङका साथीले बोलाए। चिनेजानेकै गाउँकै साथीले बोलाएपछि म गएँ, एक्कासी अपरिचित व्यक्तिले क्रिकेट खेल्दा बढी बोल्ने भनेर टाउको र मुखमा हिर्काए, शम्भु र प्रहरीले झडपबाट बचाएर ल्याए, पछि होटलमा खाजा खाँदा शम्भुलाई नराम्ररी कुटेका हुन्’ उनले बताए।

शम्भुले क्रिकेट खेलेका थिएनन्। गाउँमा क्रिकेटको कुनै खेल प्रतियोगिता थिएन। गाउँका साथीभाई मिलेर टीम बनाएर खेल भएको थियो। गाउँका कोही पनि क्रिकेट खेलाडी थिएनन्। साथीभाई मिलेरै रमाइलाको लागि खेलिएको खेल थियो, अनिलले भने।

धारापानीका स्थानीय अगुवा झविलाल थापाले क्रिकेट खेलमा नमिलेका कुरालाई ठुला विवाद बनाएर झगडाको रुपमा इगो राख्नु दुःखद र गलत प्रवृति भएको बताए। 'कुनै खेल प्रतियोगता नै थिएन, आपसमा मिलेर खेल्दा यति ठूलो घटना घट्नु राम्रो होइन,' उनले भने।

कुटपिट गर्ने र कुटिएका दुवैको पक्ष र विपक्षमा राजनीतिक दलका नेताले बोकेका छन्। केही नेता घाइतेको पक्ष केही प्रहरी नियन्त्रणमा रहेकालाई छुटाउन लागि परेको स्रोतले जनायो।

कुटपिट गर्ने ६ जना प्रहरी नियन्त्रणमा
शाहीलाई मरणासन्न हुने गरी कुटपिटमा संलग्न रहेको आरोपमा प्रहरीले ६ जनालाई पक्राउ गरी कारवाही अघि बढाएको छ। घटना भएकै दिन ढाकावाङका नुमबहादुर गमाल र लिलबहादुर गमाललाई नियन्त्रणमा लिएको थियो।

घटनापछि भाग्न सफल भएका बाबुराम गमाल, हिमबहादुर थापा गमाल, सुरजबहादुर थापा र छपबहादुर घर्तीलाई विहीबार गाउँबाटै नियन्त्रणमा लिएको प्रहरी नायब उपरीक्षक प्रकाश विष्टले बताए। उनीहरुलाई ज्यान मार्ने उद्योगमा मुद्दा दर्ता गरी प्रक्रिया अघि बढाइएको उनले बताए।

प्रकाशित : असार ७, २०७६ २१:०४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT