‘विश्व मञ्च नेपाललाई महत्त्वपूर्ण’

१३औं विश्व आर्थिक मञ्चको वार्षिक बैठकको ‘न्यू च्याम्पियन्स इन तालियान’अन्तर्गत विश्व आर्थिक नेताहरूको अनौपचारिक भेलामा मन्त्री ज्ञवालीले सबै देशबीच स्रोतसाधन तथा अवसरको समान वितरणको आवश्यकतामाथि जोड दिए ।

‘नेतृत्व ४.० भूमण्डलीकरण नयाँ युगमा सफलताको बाटो’ भन्ने नाराका साथ सोमबार सुरु भएको मञ्च बुधबार सकिनेछ । मञ्च अवधिमा करिब दुई सय सत्र तथा कार्यशाला हुनेछन् । मन्त्री ज्ञवाली सोमबार दिउँसो नै २०२० जी–२० एजेन्डाको मार्गचित्रसम्बन्धी सत्रमा पनि सहभागी भएको बेइजिङस्थित नेपाली दूतावासले जारी गरेको विज्ञप्तिमा भनिएको छ ।

उक्त अवसरमा मन्त्री ज्ञवालीले नेपाल जस्ता कम विकसित मुलुकको आवाज समावेश हुन पाउनु महत्त्वपूर्ण भएको धारणा राखे । अति कम विकसित मुलुकहरूको विकासको आकांक्षा सम्बोधन गर्न व्यापार क्षमता अभिवृद्धि, पुँजीसम्मको पहुँच, प्राविधिक रूपान्तरण, सुरक्षित तथा व्यवस्थित एवं स्वाभिमानयुक्त श्रम देशान्तरणलगायत विषयलाई गम्भीर रूपमा चासो दिनुपर्नेमा उनको जोड छ ।

मन्त्री ज्ञवालीले चीनको उत्तरपूर्वी क्षेत्रमा पर्ने तालियान सहरमा अध्ययन तथा कामको सिलसिलामा पुगेका नेपाली समुदायसँग पनि अन्तर्क्रिया गरेको दूतावासले जानकारी दिएको छ । मञ्चमा विश्वका करिब १ सय देश तथा क्षेत्रबाट २ हजारभन्दा बढी राजनीतिज्ञ, विद्वान्, विशेषज्ञ, वाणिज्य क्षेत्रका प्रतिनिधिलगायत सहभागी छन् । पछिल्ला वर्षमा चीनको वैज्ञानिक तथा प्राविधिक अनुसन्धान एवं विकासका क्षेत्रमा प्राप्त उपलब्धि उत्साहजनक भएको उनीहरूको भनाइ छ ।

मञ्चमा सहभागी हुन परराष्ट्रमन्त्री ज्ञवाली आइतबारको मध्यराति ल्याउनिङ प्रान्त उत्रिएका थिए । ज्ञवालीले बुधबारदेखि बेइजिङको भ्रमण गर्ने कार्यक्रम छ । बेइजिङस्थित नेपाली दूतावासमा मन्त्री ज्ञवालीले बुधबार नै चिनियाँ अनुसन्धाता तथा विद्वान्सँग अन्तर्क्रिया एवं केही राजनीतिक भेटघाट पनि गर्नेछन् ।