पेन्सनवालालाई ‘दसैं खर्च’ नदिन माग 

राज्य व्यवस्था समितिको बैठक
कान्तिपुर संवाददाता

काठमाडौँ — प्रतिनिधिसभाको राज्य व्यवस्था तथा सुशासन समितिमा पेन्सनवाला राष्ट्रसेवकहरूलाई दिइँदै आएको एक महिनाको तलब बराबरको दसैं खर्च (चाडपर्व खर्च) दिने व्यवस्था अन्त्य गर्नुपर्ने आवाज उठेको छ ।समितिको आइतबार बसेको बैठकमा संघीय निजामति कर्मचारीसम्बन्धी विधेयकमाथिको छलफलमा बोल्दै अधिकांश सदस्यले पेन्सनवाला राष्ट्रसेवकहरूलाई पेन्सनबाहेक चाडपर्व खर्च दिइनु न्याय संगत नहुने दाबी गरे ।

सत्तारूढ नेकपाका सांसद जनार्दन शर्माले समितिमा पेन्सनवाला राष्ट्रसेवकहरूलाई पेन्सनबाहेक चाडपर्व खर्च दिन नहुने प्रस्ताव गरेका हुन् ।

‘किसानले समेत जीवनभर राज्यका लागि योगदान गरेको हुन्छ । तर, उनीहरूले राज्यबाट केही सुविधा पाउँदैनन् । किन कर्मचारीहरूलाई मात्र पेन्सन पाकिसकेपछि पनि चाडपर्व खर्च दिइरहने ?’ शर्माको प्रश्न थियो ।

कांग्रेसकी सांसद डिला संग्रौलाले शर्माको प्रस्तावमाथि समर्थन जनाउँदै पेन्सनवाला राष्ट्रसेवकलाई चाडपर्व खर्च समेत दिनु राज्यका लागि बोझ भएको बताइन् । ‘पेन्सनवालालाई समेत चाडपर्व खर्च दिने व्यवस्था राज्यका लागि बोझ हो । ऐनबाट यस्तो सुविधा हटाइनुपर्छ’ उनले भनिन् । समितिका सदस्यहरू नवराज सिलवाल, राजकिशोर यादव, अमरेशकुमार सिंहलगायतले समेत शर्माको प्रस्तावको समर्थन गरे ।

नेकपाकी सांसद पम्फा भुसालले भने पेन्सनवालाको चाडपर्व खर्च रोक्नु नहुने धारणा राखिन् । उनले चाडपर्व खर्च रोक्दा सरकारविरुद्ध नकारात्मक भावना सञ्चार हुने तर्क गरिन् । ‘पेन्सनसँगै चाडपर्व खर्चसमेत दिनु राज्यका लागि बोझ हो । तर, अवकाशवाला राष्ट्रसेवकहरूले लामो समयदेखि खाइपाइ आएको सुविधा हटाउँदा सरकारविरुद्ध नकारात्मक भावना सञ्चार हुन सक्छ, त्यसैले यसमा थप छलफल गर्नुपर्छ’ उनले भनिन् ।

समितिकी सभापति शशी श्रेष्ठले पेन्सनवालालाई चाडपर्व खर्च दिने व्यवस्थालाई निरन्तरता दिने या नदिने विषयमा थप छलफल आवश्यक देखिएको उल्लेख गर्दै सामान्य प्रशासन मन्त्रालयलाई यसमा सरकारको धारणा ल्याउन निर्देशन दिइन् ।

सरकारले वि.सं २०१३ देखि अवकाशप्राप्त राष्ट्रसेवकहरूलाई पेन्सन दिन थालेको हो । सरकारले पेन्सनवालालाई समेत अन्य कर्मचारी सरह दसैं या चाडपर्व खर्चबापत एक महिनाको तलब बराबरको सुविधा दिंदै आएको छ । समितिमा विचाराधीन संघीय निजामति कर्मचारीसम्बन्धी विधेयकमा समेत उक्त व्यवस्थालाई कायम राखिएको छ ।

प्रकाशित : असार २२, २०७६ १९:२२
प्रतिक्रिया
पठाउनुहोस्

जुवा खेलेको अभियोगमा सात जना पक्राउ

दुर्गालाल केसी

दाङ — जुवा खेलेको अभियोगमा प्रहरीले शनिबार राति घोराहीमा सात जनालाई पक्राउ गरेको छ । घोराही उपमहानगरपालिका- ६ वचाहा गाउँमा जुवा खेलिरहेको सूचनाका आधारमा खानतलासी गर्दा रंगेहात फेला पारेको जिल्ला प्रहरीले जानकारी दिएको छ ।

पक्राउ पर्नेहरुमा घोराही-६ बचाहाका २८ वर्षीय नमराज चौधरी, २५ वर्षीय जिवराज चौधरी, घोराही १७ गुलरीयाका २९ वर्षीय सुनिल चौधरी, २४ वर्षीय कृष्ण चौधरी, घोराही १८ ढोडेनीका ३८ वर्षीय विष्णु विष्ट, घोराही १० नारायणपुरका २२ वर्षीय सुदिर खनाल र घोराही-१७ कर्जाहीका ३३ वर्षीय महेन्द्र रावल छन् ।

उनीहरुको साथबाट ६१ हजार ३ सय २० रुपयाँ बरामद् भएको जिल्ला प्रहरी प्रवक्ता डिएसपी विनोदविक्रम शाहले बताएका छन् । उनीहरुबिरुद्ध मुलुकी अपराध संहिता ऐन २०७४ को दफा १२५ बमोजिम सार्वजनिक नैतिकता विरुद्धको कसुरमा आवश्यक अनुसन्धान गरिरहेको उनले जानकारी दिए ।

प्रकाशित : असार २२, २०७६ १८:४७
पूरा पढ्नुहोस्
प्रतिक्रिया
पठाउनुहोस्