दूतावासको सिफारिसमा अध्यागमनको आशंका

घनश्याम खड्का

काठमाडौँ — संयुक्त अरब इमिरेट्सको आबुधाबीस्थित नेपाली दूतावासले दुबई जाने नेपालीका लागि ठूलो संख्यामा सिफारिसपत्र (नो अब्जेक्सन सर्टिफिकेट) जारी गर्दै आएको फेला परेको छ । सामान्यतः अप्ठेरो अवस्थामा बाधा फुकाउन गरिने कूटनीतिक सिफारिस आम रूपमा हुन थालेको पाइएपछि आश्चर्यमा परेको अध्यागमन विभागले जनाएको छ ।

‘दूतावासले आवश्यकै नपर्ने सिफारिस गरिरहेको देखेर अचम्ममा परेको छु,’ विभागका महानिर्देशक ईश्वरराज पौडेलले कान्तिपुरसित भने, ‘सिफारिस लिएर आउनेमा युवकभन्दा युवतीको संख्या बढी पाइएपछि कतिपय अवस्थामा शंका लागेर फर्काइदिने गरेका छौं ।’

दूतावासको पत्र लिएर भिजिट भिसामा दैनिक औसत दुई दर्जन नेपाली दुबई जाने गरेको देखिएको छ । दुबईमा भिजिट भिसालाई वर्किङ भिसामा बदल्न पाउने व्यवस्था छ । ‘दुबईमा यसरी आएका कतिपय युवती दक्षिण अफ्रिकादेखि युरोपका अनेक देशमा तस्करका हातबाट बेचिन पुगेका छन्,’ स्रोतले भन्यो, ‘युवक भने नेपाल सरकारद्वारा रोजगारीका लागि प्रतिबन्धित जोखिमपूर्ण देशहरू इरान, अफगानिस्तानलगायतमा जान्छन् । यसमा नियोगका अधिकारी र म्यानपावर कम्पनीका दलालहरूको मिलेमतो देखिन्छ ।’

भिजिट भिसामा आएर दुबईमा नर्तकीको काम गरेर बसेका नेपाली युवतीको अवस्था जोखिमपूर्ण रहेको पनि स्रोतले बतायो । तीमध्ये कतिपय उद्धारका लागि सहयोग गरिदिनुपर्‍यो भन्दै शरण माग्न आउने गरेको दूतावासकै एक कर्मचारीले बताए । डेढ वर्षदेखि कार्यवाहक राजदूत भएर नियोग चलाउँदै आएका सागर फुयाँलका पालामा बढी एनओसी जारी भएको अध्यागमनका कर्मचारीले बताए ।

‘कुनै पनि देशमा जान सम्बन्धित देशको भिसा भए पुग्छ, हाम्रो दूतावासको कुनै सिफारिस पत्र चाहिने होइन,’ महानिर्देशक पौडेल भन्छन्, ‘आबुधाबीबाट दिनहुँ थुप्रैलाई एनओसी जारी भइरहेको देख्दा हामीलाई शंका लागेको छ ।’ दुबईमा बस्ने नेपालीका आफन्त र परिवारजन भएको जनिने गरी एनओसी बनाइएका केहीलाई छानबिन गर्दा नक्कली समेत भेटिएको पौडेलले बताए । ‘यसमा मलाई हाम्रा केही कर्मचारीको पनि मिलेमतो छ कि भन्ने आशंका छ,’ उनले भने, ‘म त्यसको उचित खोजबिन गर्छु ।’

नियोग उपप्रमुख फुयाँलले एनओसी जारी हुँदै आएको तथ्यलाई स्वीकार गरे पनि यो आफ्ना पालाबाट सुरु नभएको बताए । ‘विदेश आउन हामीले यसरी एनओसी जारी गर्नुपर्छ भनेर कुनै कानुनमा नलेखिएको सत्य हो,’ उनले भने, ‘मभन्दा अगाडि निमित्त प्रमुख भएर बस्नु भएका नेत्रबहादुर टण्डनकै पालादेखि यसरी जारी हुन्थ्यो । मैले त चलनअनुसार काम गरेको मात्र हो ।’

उनले अध्यागमनले नै एनओसी माग्ने भएकाले दूतावासले जारी गर्दै आएको दाबी गरे । हालै राजदूत भएर गएका कृष्णप्रसाद ढकालले भने अबुधाबी नियोगबाट जारी हुँदै आएको एनओसीका सम्बन्धमा आफू बेखबर रहेको बताए । ‘म भर्खरै आएको छु, यो ककसको संलग्नतामा भइरहेको छ, म अब बुझ्छु,’ उनले कान्तिपुरसँग टेलिफोनमा भने ।

प्रकाशित : असार २७, २०७६ ०८:०७
प्रतिक्रिया
पठाउनुहोस्

इंग्ल्यान्ड २७ वर्षपछि फाइनलमा

एएफपी

बर्मिङ्घम — विश्वकप क्रिकेटले नयाँ विजेता पाउने भएको छ । आयोजक इंग्ल्यान्डले बिहीबार दोस्रो सेमिफाइनलमा पाँचपल्टको विजेता अस्ट्रेलियालाई सजिलै ८ विकेटले सजिलै पराजित गरेपछि यस्तो समीकरण बनेको हो । 

आइतबार लर्डसमा हुने फाइनलमा इंग्ल्यान्ड र न्युजिल्यान्डबीच प्रतिस्पर्धा हुँदै छ । यी दुवै टोलीले अहिलेसम्म विश्वकप जित्न सकेका छैनन् । न्युजिल्यान्डले अघिल्लो दिन पहिलो सेमिफाइनलमा भारतलाई स्तब्ध पारेको थियो । न्युजिल्यान्ड लगातार दोस्रोपल्ट फाइनल खेल्दै छ । समूह चरणको खेलमा इंग्ल्यान्डले न्युजिल्यान्डमाथि १ सय १९ रनको जित हात पारेको थियो ।

इंग्ल्यान्ड २७ वर्षपछि फाइनल पुगेको हो । सन् १९९२ मा पछिल्लो पटक इंग्ल्यान्डले फाइनल खेलेको थियो, जहाँ टोली पाकिस्तानसँग उपाधि भिडन्तमा पराजित भयो । त्यसयता इंग्ल्यान्ड सेमिफाइनल पनि पुग्न सकेको थिएन । १९७९ को फाइनलमा इंग्ल्यान्डलाई वेस्ट इन्डिज र १९८७ मा अस्ट्रेलियाले पराजित गरेको थियो । चार वर्षअघि विश्वकपमा इंग्ल्यान्ड पहिलो चरणबाटै बाहिरिएको थियो ।

त्यसयता इंग्ल्यान्डलाई यो स्थितिमा पुर्‍याउन अस्ट्रेलियाका प्रशिक्षक ट्रेभोर बेलिसको उल्लेखनीय योगदान छ । चार वर्षको अन्तरमा एकदिवसीय अन्तर्राष्ट्रियमा विश्व नम्बर एक बनिसकेको टोली विश्वकप उपाधि नजिक पनि पुगेको छ । अस्ट्रेलिया पहिलोपल्ट सेमिफाइनलमा पराजित भएको हो । यसअघिका सात सेमिफाइनल जित्दा अस्ट्रेलिया पाँचपल्ट विश्वविजेता बनेको थियो ।

टस जितेपछि ब्याटिङमा आएको अस्ट्रेलियालाई इंग्ल्यान्डले एक ओभरअगाडि २ सय २३ रनमा अलआउट गर्‍यो ।

जेसन रोयले आक्रामक ८५ रन बनाएपछि इंग्ल्यान्डले ३२.१ ओभरमै लक्ष्य पूरा गरेका थियो । ६५ बल खेलेका उनले ९ चौका र ५ छक्का प्रहार गरे । रोयले जोनी बेरिस्टोसँग पहिलो विकेटमा १८ ओभरभित्र १ सय २४ रन जोडेपछि इंग्ल्यान्डको जित निश्चितजस्तै भएको थियो । बेरिस्टोले ४३ बलमा ५ चौका प्रहार गरी ३४ रन बनाए । जो रुट ४६ बलमा ४९ र कप्तान इयान मोर्गन ३९ बलमा ४५ रन बनाई अविजित रहे । दुवैले ८–८ चौका प्रहार गरे ।

म्यान अफ द म्याच भने क्रिस वोक्स थिए । जोफ्रा आर्चरले अस्ट्रेलियाका कप्तान आरोन फिन्चलाई शून्यमा आउट गरेको अवस्थामा वोक्सले डेविड वार्नरलाई ९ र पिटर ह्यान्ड्सकोम्बलाई ४ रनमै पेभेलियन फर्काए । उनले मिचेल स्टार्कलाई २९ रनमा आउट गरी तेस्रो विकेट लिए । स्टिभ स्मिथले ८५, एलेक्स केरीले ४६ र ग्लेन म्याक्सवेलले २२ रन बनाए पनि अस्ट्रेलियालाई त्यो मजबुत स्कोरमा पुर्‍याउन पर्याप्त भएन् ।

स्पिनर अदिल रशिदले एकै ओभरमा केरी र मार्कस स्टोइनिस (०) लाई आउट गरी अस्ट्रेलियाको खेलमा फर्किने आशामा ठूलो धक्का दिए । वोक्सले ८ ओभरमा २० रनमात्र दिए । रशिदले १० ओभरमा ५४ रन खर्चेर ३, आर्चरले १० ओभरमा ३२ रन खर्चेर २ र मार्क उडले १ विकेट लिए ।

प्रकाशित : असार २७, २०७६ ०८:०४
पूरा पढ्नुहोस्
प्रतिक्रिया
पठाउनुहोस्