४९ स्थानमा प्राकृतिक विपद्का घटना

जनकराज सापकाेटा

काठमाडौँ — लगातारको वर्षाले देशैभरी प्राकृतिक विपत्तिका श्रृंखलाहरु निम्तिएका छन् । प्रहरी प्रधान कार्यालले दिउँसो १ बजेर ४५ मिनेटसम्म देशैभरीबाट संकलन गरेको सूचना अनुसार देशका विभिन्न ४९ स्थानमा प्राकृतिक विपद्का घटना भएका छन् ।

प्रहरीका अनुसार देशका विभिन्न २० स्थानमा पहिरो गएको छ । पाल्पा, काठमाडौं, पाँचथर, मकवानपुर, खोटाङ , दोलखा, रामेछाप, तेह्रथुम लगायतका जिल्लाहरुमा साना तथा ठूला पहिरो गएका हुन् । त्यस्तै देशका विभिन्न १६ स्थामा बाढीको प्रकोप देखा परेको छ ।

प्रहरीका अनुसार सुनसरीको हरिनगर गाउँपालिका-५ को सुकसेना टोलका झण्डै ६० घर बाढीको जोखिममा परेका छन् । त्यस्तै महोत्तरीको सदरमुकाम जलेश्वस्थित कारागारभित्र बाढी पसेका कारण कैदी बन्दीहरु समस्यामा परेका छन् । रौतहटको चन्द्रपुर नगरपालिका-२ स्थित पूर्व-पश्चिम राजमार्गमा वर्षाका कारण उत्पन्न बाढीले सवारी अवरोध भएको छ ।

प्रहरीका अनुसार काठमाडौंको विभिन्न स्थानमा बाढी पसेर क्षति पुर्‍याएको छ । कीर्तिपुरस्थित सुकुम्बासी बस्तीका झण्डै ६ घरमा बाढीको पानी पसेको छ । त्यस्तै गुर्जुधारास्थित बुंगुर र्फाममा पानी पसेर प्रभावित भएको छ । त्यस्तै बिहान थानकोटको बाँडभन्ज्याङबाट मसिने जाने बाटो पहिरोका कारण एकतर्फी मात्रै सञ्चनालमा आएको थियो ।

प्रकाशित : असार २७, २०७६ १६:३१
प्रतिक्रिया
पठाउनुहोस्

सिद्धार्थ राजमार्गमा पहिरो खस्ने, हटाउने निरन्तर 

माधव अर्याल

पाल्पा — वर्षा सुरु भएसँगै सिद्धार्थ राजमार्ग अन्तर्गत पाल्पाको बर्तुङदेखि चिडिया खोलासम्मको सडकमा पहिरो खस्ने क्रम सुरु भएको छ । सडक डिभिजन कार्यालयले आधा घण्टामा पहिरो पन्छाउने सवारी साधन व्यवस्था गरेकाले खस्ने र हटाउने निरन्तर रहेको छ । वर्षासँगै सिद्धार्थ राजमार्गको बर्तुङ–चिडियाखोला खण्डमा पहिरो खस्ने क्रम सुरु हुन्छ । 

शुक्रबार मात्रै बिहान २ बजेदेखि ५ बजेसम्म राजमार्ग अवरुद्ध भयो। राजमार्गको तिनाउ गाउँपालिका–५ गौडेपुल र चर्चरेको बीचमा पहिरो खसेको थियो । बिहानै थाहा पाउनासाथ सडक डिभिजनको बर्तुङमा रहेको डोजर प्रयोग गरेर एक घण्टामै राजमार्ग एकतर्फी सुचारु भयो । बिहीबार वर्षासँगै ढुंगा खस्दा सिद्दबाबा क्षेत्रमा राजमार्ग अवरुद्ध भयो । ६ बजेदेखि ८ बजेसम्म सडक अवरुद्ध हुँदा धेरै यात्रुले दुःख पाए । राजमार्गको केराबारी, पानीमिल, हिउँदेखोला, चर्चरे, गौडेपुल, झुम्सा, दोभान लगायतका क्षेत्रमा पनि साना ठुला पहिरो खसेको छ ।

सडक डिभिजन कार्यालयका अनुसार ४ स्थानमा डोजर तम्तयार अवस्थामा राखिएको छ । जहाँ पहिरो खसेपनि आधा घण्टामै पुग्न सकिने गरी मेसिनरी औजार व्यवस्थापन गरेको डिभिजन प्रमुख केदार नेपालले बताए । डोजर,स्काभेटरलाई तयारी अवस्थामा राखिएको उनले बताए ।

उनका अनुसार आर्यभन्ज्याङ–राम्दी र ताँहुसम्मका लागि आर्यभन्ज्याङमा मेसिन राखिएको छ । यस्तै ताहुँदेखि रामपुर र आर्यभन्ज्याङतर्फको केही भागका लागि ताँहुमै डोजर राखिएको छ । त्यस्तै सिद्धबाबा लगायतका वरपरका लागि दोभान प्रहरी चौकीमा मेसिन राखिएको छ ।

प्रकाशित : असार २७, २०७६ १६:२५
पूरा पढ्नुहोस्
प्रतिक्रिया
पठाउनुहोस्