बाढीले बगाएर झापामा २ को मृत्यु, एक बेपत्ता

अर्जुन राजवंशी

बिर्तामोड — अविरल वर्षासँगै आएको बाढीले बगाएर झापामा एक बालिकासहित दुई जनाको मृत्यु भएको छ । अर्का एक बेपत्ता भएका छन् ।

कमल गाउँपालिका र शिवसताक्षी नगरपालिकाको सिमाना भएर बग्ने कमल खोलाको बाढीले बगाएर शुक्रवार इलाम चुलाचुली गाउँपालिका १ का ५० वर्षीय अञ्चल लावतीको मृत्यु भएको जिल्ला प्रहरी कार्यालयले जनाएको छ । बिहान १० बजे घरबाट हिँडेका लावतीको शव बाढीले बगाएर ल्याएको अवस्थामा स्थानीयले बेलुका साढे ५ बजेतिर फेला पारेका थिए ।

दमक नगरपालिका १० स्थित भालु खोलाले बगाएर स्थानीय ६ वर्षीया एलिजा न्यौपानेको मृत्यु भएको छ । दिउँसो १ बजेतिर घर नजिकैको कल्भर्टमा उभिएको अवस्थामा बालिका खोलामा खसेकी थिइन ।

खोलाले बगाएकी बालिकालाई स्थानीयले उद्धार गरी दमकस्थित लाइफ लाइन अस्पताल ल्याएका थिए । बालिकाको उपचारकै क्रममा मृत्यु भएको इलाका प्रहरी कार्यालय दमकले जनाएको छ ।

यस्तै खोला तर्ने क्रममा हडिया खोलाको बाढीले बगाउँदा मेचीनगर नगरपालिका १४ का ४५ वर्षीय सुफल हस्दा बेपत्ता भएका छन् । अपरान्ह ४ बजेट भद्रपुर नगरपालिका ९ प्रणामीनगरस्थित हडिया खोला तर्ने क्रममा हस्दालाई बाढीले बगाएको जिल्ला प्रहरी कार्यालयका डीएसपी महेन्द्र श्रेष्ठले जानकारी दिए । उनको खोजी कार्य जारी राखेको श्रेष्ठले बताए ।

प्रकाशित : असार २७, २०७६ १९:४८
प्रतिक्रिया
पठाउनुहोस्

पहिरोले हिले-भोजपुर सडक अवरुद्ध 

रमेशचन्द्र अधिकारी

धनकुटा — अविरल वर्षाका कारण मध्यपहाडी लोकमार्ग अन्तर्गत हिले–लेगुवा–भोजपुर सडकमा यातायात अवरुद्ध भएको छ । जिल्लका ग्रामीण क्षेत्रका कच्ची सडक पनि अवरुद्ध भएका छन् । पहिरोले अधिकांश सडक अवरुद्ध भएको हो ।

जिल्लाको मूलघाट–त्रिवेणी सडक, तमोर करिडोर सडक र सिधुवा–लेगुवा सडक अवरुद्ध भएको जिल्ला प्रहरी प्रमुख एसपी सुदर्शन कोइरालाले जानकारी दिए ।

उक्त सडकमा धरानबाट धनकुटा हुँदै भोजपुर, संखुवासभा जिल्लामा यातायात सञ्चालन हुने गर्दछ । यातायात अवरुद्ध भएपछि यात्रु अलपत्र परेको छन् । मूलघाट–त्रिवेणी सडक र तमोर करिडोर सडकका थुप्रै स्थानमा पहिरोले सडक अवरुद्ध भएको छ । यस्तै, सिधुवा–लेगुवा सडकमा पर्ने माङमाया खोलामा आएको बाढीले सडक बगाएपछि सडक अवरुद्ध भएको कोइरालाले बताए ।

यस्तै,पहिरोका कारण तीन घरमा क्षति पुगेको छ भने एक विद्यालय भत्किएको छ । धनकुटाको पाख्रिबास नगरपालिका–५ का वडाध्यक्ष गोपालबहादुर थापा, घोर्लिखर्कका युवराज कार्की र चक्रबहादुर निरौलाको घर पहिरोले क्षति पुर्‍याएको स्थानीय प्रशासनले जनाएको छ ।

सहिदभूमि–३ मा रहेको अजम्बरी प्राथमिक विद्यालयको भवन भत्किदा पठनपाठन अवरुद्ध भएको छ । पहिरोले कक्षाकोठा भत्किएको विद्यालयका प्रधानाध्यापक लोकेन्द्र राईले जानकारी दिए । पहिरोका कारण केही कोठा भत्किएको छ भने अधिकांश कक्षा कोठा चर्किएपछि पठनपाठन बन्द गरिएको उनले बताए ।

विद्यालयमा बालविकासदेखि कक्षा ३ सम्म २८ जना विद्यार्थी अध्ययनरत रहेका छन् । कक्षा कोठा मर्मत भएपछि मात्र पठनपाठन सुचारु गरिने प्रअ राईले बताए ।

प्रकाशित : असार २७, २०७६ १९:०९
पूरा पढ्नुहोस्
प्रतिक्रिया
पठाउनुहोस्