कांग्रेसद्वारा सरकारको ध्यानाकर्षण
काठमाडौँ — प्रमुख प्रतिपक्षी दल नेपाली कांग्रेसले बाढी, पहिरो र डुबान क्षेत्रमा विभिन्न रोग महामारीको रुपमा फैलने सम्भावनालाई नियन्त्रण गर्न सरकारसँग आग्रह गरेको छ । कांग्रस संसदीय दलको कार्यालयले बुधबार जारी एक विज्ञप्तिमार्फत बाढी, पहिरो र डुबान क्षेत्रमा थप मानवीय क्षति हुन नदिन सरकार र सम्बन्धित निकायलाई सशक्त एवं गतिशील रुपमा कार्य गर्न आग्रह गरेको हो ।
केही दिनअघि परेको भारी वर्षाका कारण मुलुकका विभिन्न भागमा आएको बाढी, पहिरो, डुबान र कटानका कारण ठूलो संख्यामा मानवीय क्षति हुनाका साथै भौतिक क्षति पनि भएको छ ।
क्षतिग्रस्तस्थलको प्रतिवेदनका आधारमा विपद् व्यवस्थापनका लागि राज्यले अझै प्रभावकारी ढंगले राहत एवं पुनःस्थापना गर्नु आवश्यक देखिएको कांग्रेसका प्रमुख सचेतक बालकृष्ण खाँणले उल्लेख गरे ।
प्रकाशित : श्रावण १, २०७६ १४:५५प्रतिक्रिया
