चन्द कार्यकर्ताले बोकेको बम विस्फोट, घाइते ५ मध्ये २ गम्भीर

चित्रांग थापा, अर्जुन शाह

धनगढी — नेत्रविक्रम चन्द समूहका कार्यकर्ताले बोकेको बम बिहीबार धनगढीको सहिद गेटस्थित नीलम होटलमा विस्फोट हुँदा पाँच जना घाइते भएका छन् ।

घटनामा होटल सञ्चालक केशवराज पाण्डे, रामबहादुर सिंह, जितेन्द्र यादव, मोविन खान र लक्ष्मण सेराली घाइते भएको जिल्ला प्रहरी कार्यालयका डीएसपी दक्षकुमार बस्नेतले जानकारी दिए । घाइतेमध्ये सिंह र सेरालीको अवस्था गम्भीर छ ।

होटलमा चिया पिउने क्रममा सिंहले झोलामा बोकेको ‘टिफिन कन्टेनर’ च्यापिँदा विस्फोट भएको थियो । घटनामा उनको ढाड डढेको छ । सिंह र सेराली दुवै जना बोल्न सक्ने अवस्थामा छैनन् । उनीहरू दुवै चन्द समूहका सैन्य कार्यकर्ता रहेको प्रहरीको दाबी छ । ‘घटनामा चन्द समूहका कार्यकर्ताको संलग्नता देखियो,’ सुदूरपश्चिम प्रहरी प्रमुख डीआईजी तारिणीप्रसाद लम्सालले भने ।

यादव कैलालीस्थित कुखुरा व्यवसायी र खान ग्रिल मिस्त्री हुन् । बझाङ घर भई कञ्चनपुरको बेलडाँडी बस्ने सिंह चन्द समूहका जिल्ला कमिटी सदस्य र माओवादीका पूर्वलडाकु हुन् । सेराली पनि पूर्वलडाकु भएको लम्सालले बताए । घाइतेको स्थानीय माया मेट्रो अस्पतालमा उपचार भइरहेको छ ।

घटनास्थलमा एउटा ९ एमएमको चाइनिज पेस्तोल पनि भेटिएको प्रहरी उपरीक्षक सुदीप गिरीले बताए । ‘विस्फोट गराइएको वस्तु स्टिलको टिफिन कन्टेनर हो,’ उनले भने, ‘यो धेरै घातक हुन्छ ।’ घटनाबारे थप अनुसन्धान भइरहेको उनको भनाइ छ ।

‘विस्फोटक पदार्थसहितको भाँडोपड्किएको देखिन्छ । घटनास्थलबाट हामीले तारलगायत वस्तु बरामद गरेका छौं,’ लम्सालले भने । घटनापछि जिल्लास्थित होटल छानबिन र सिमानामा कडाइ गरिएको उनले जानकारी दिए ।

प्रकाशित : श्रावण ३, २०७६ ०७:०७
ADVERTISEMENT
प्रतिक्रिया
पठाउनुहोस्
ADVERTISEMENT

बाढी प्रभावित क्षेत्रमा संसदीय समितिको अनुगमन

खोला–नदी आसपासका क्षेत्र अतिक्रमण गरी निर्मित संरचनाका कारण बस्तीमा बाढी पसेको टोलीको निष्कर्ष छ ।
कान्तिपुर संवाददाता

काठमाडौँ — प्रतिनिधिसभाको राज्यव्यवस्था तथा सुशासन समितिले बाढीपहिरो प्रभावित क्षेत्रको संसदीय अनुगमन थालेको छ । बिहीबार र शुक्रबार राजधानीको अनुगमन गरेर समितिका दुई टोली शनिबार तराई क्षेत्र जाँदै छन् ।  

समितिले बिहीबार भक्तपुरको चाँगुनारायण, भागुपोखरी, राधेराधे, बाराही, हनुमन्ते, हनुमानघाटलगायत स्थानको अनुगमन गरेको थियो । त्यस क्रममा खोला–नदी आसपासका क्षेत्र अतिक्रमण गरी निर्मित सार्वजनिक तथा निजी संरचनाका कारण बस्तीमा बाढी पसेको टोलीले प्रारम्भिक निष्कर्ष छ । अनियन्त्रित रूपमा बालुवा झिक्दा पनि समस्या बढेको उसको भनाइ छ ।

‘२०२१ सालमा गरिएको नापीअनुसार खोला र नदी क्षेत्रको भाग छाडिनुपर्नेमा अतिक्रमण भएको देखिएको छ,’ समिति सभापति शशि श्रेष्ठले भनिन्, ‘वर्षैपिच्छे आउने बाढीमा राहत बाँडेर टालटुल गर्ने नीतिले समस्या समाधान नहुने उनले बताइन् । ‘समितिले यसको कारण खोजेर निराकरणका लागि सरकारलाई प्रतिवेदन पेस गर्नेछ,’ उनले भनिन् । समिति टोलीले स्थानीय प्रशासन, जनप्रतिनिधि र पीडितहरूसँग अन्तर्क्रिया पनि गरिरहेको छ ।

हनुमन्ते र खासाङखुसुङ खोलाका पुल जोगाउन बनाइएका कंक्रिट संरचनाले बढी क्षति पुर्‍याएका छन् । त्यस्तै चाँगुनारायण आसपासमा बालुवा झिकेका कारण पहिरो गएको छ । हनुमानखोला र आसपासका क्षेत्रमा करिब ४ सय रोपनी धान खेतीमा बाढीले क्षति पुर्‍याएको समितिको अनुमान छ ।

समिति सदस्यहरू बिहीबार संघीय निजामती सेवाको गठन, सञ्चालन र सेवाका सम्बन्धमा बनेको विधेयकको छोटो छलफल गरी अवलोकन भ्रमणमा निस्किएका थिए । सिंहदरबारबाट संसदको बस लिएर अधिकांश सांसद अवलोकनमा गएका हुन् । स्थानीयले सांसदलाई आफूहरू बर्सेनि डुबानमा परेको गुनासो गरेका थिए । समितिले शुक्रबार काठमाडौंको कलंकी, कुलेश्वरलगायत विभिन्न भागमा अवलोकन गर्ने समिति सभापति श्रेष्ठले जानकारी दिइन् ।

‘हामी राजधानीमा पहिला अवलोकन गर्छौं । त्यसपछि दुई टोली बनाएर ४ गते तराईमा जाँदै छौं,’ श्रेष्ठले भनिन् । समितिकी उपसचिव बबिता मिश्रले अवलोकनमा जाँदा सरोकारवाला निकाय सबैलाई समावेश गराउने बताइन् । काठमाडौंका विभिन्न भागमा रहेका नदी अतिक्रमण गरेर संरचना बनाएको पाइएपछि भूमिसुधार कार्यालयका प्रतिनिधिलाई समेत सहभागी गराएर अनुगमन गरिने सभापति श्रेष्ठको भनाइ छ । असार २६ गतेदेखिको बाढीपहिरोले ३१ जिल्ला प्रभावित भएको गृह मन्त्रालयले बताएको छ ।

प्रकाशित : श्रावण २, २०७६ २१:५५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT