निर्मला हत्या प्रकरण : कसैलाई राहत र नोकरी, कोहीलाई उपचार खर्चै अभाव

बलात्कारपछि हत्या गरिएकी निर्मला र आन्दोलनका क्रममा गोली लागी मृत्यु भएका शनि खुनाका परिवारले १८ लाख रुपैयाँ राहत पाइसके
भवानी भट्ट

कञ्चनपुर — बोल्न सक्दैनन्, अलि–अलि इसारा मात्रै गर्छन् । दिसा–पिसाब आएको पनि थाहा पाउँदैनन् । करिब १ वर्षदेखि अस्पतालको शय्यामा यस्तै दिनचर्या चलिरहेको छ । एउटा खुट्टा काटिइसकेको छ । तर, निको हुने/नहुने ठेगान छैन ।

१ वर्षअघि बलात्कारपछि हत्या गरिएकी निर्मला पन्तका हत्यारा पत्ता लगाउन माग गर्दै चर्किएको आन्दोलनमा प्रहरीको गोली लागेर घाइते भएका भीमदत्त नगरपालिका ४, महेन्द्रनगरका अर्जुन भण्डारा अहिले पनि अचेत अवस्थामै छन् ।

काठमाडौंस्थित शिक्षण अस्पतालमा उपचार गराइरहेका उनको शारीरिक अवस्थामा सामान्य सुधार आए पनि निको हुने आश न्यून रहेको डाक्टरहरूले बताएको आफन्तजनको भनाइ छ । गत भदौ ७ मा अन्य दिनझैं अर्जुन खाना खाएर घरबाट निस्किएका थिए । उनी सिधै निर्मलाका हत्यारा पत्ता लगाउन माग गर्दै चलिरहेको आन्दोलनमा होमिए ।

साँझपख जिल्ला प्रशासन कार्यालय अगाडि प्रहरीले चलाएको गोली लागेर उनी घाइते भएका हुन् । त्यसपछि उनलाई महाकाली अञ्चल अस्पताल हुँदै बाँकेको कोहलपुर मेडिकल कलेजबाट काठमाडौं रिफर गरियो । ‘गोली लागेको दायाँ खुट्टा पनि काटिएको छ, अर्को खुट्टा पनि छोटो भए जस्तो छ,’ शिवकलाले भनिन्, ‘अरु कुरामा पनि कुनै सुधार आएको छैन, डाक्टर पनि अब निको नहुने भनिरहेका छन् ।’ घटना हुँदा सुरुमा सरकारले उपचार खर्च व्यहोर्ने भनेको थियो ।

तर, नयाँ वर्षदेखि १ रुपैयाँ पनि उपलब्ध नभएको शिवकलाको भनाइ छ । उनका अनुसार ३ महिनामा साढे ३ लाख रुपैयाँ खर्च भइसकेको छ । ‘ऋण गरी अहिलेसम्म उपचार गराइरहेकी छु, कमाउने कोही छैन, अब कसरी खर्च जुटाउने,’ उनले भनिन्, ‘मन्त्रालयमा जाँदा १/२ दिनमा रकम निकासा हुन्छ भन्छन्, तर कहिले हो कहिले ?’ अस्पतालले पनि पटक–पटक घर लैजान भन्दै दबाब दिन थालेको छ ।

‘कसैले राहत र नोकरी पनि पाए, तर हाम्रा बाल–बच्चाले अनाहकमा दुःख पाए,’ शिवकलाले भनिन् । उनले पछिल्लोपटक गृह मन्त्रालयमा गएर घरसम्म पुग्ने खर्चसमेत दिन आग्रह गरेको बताइन् । उनले ऋण काढेर उपचार गराउन सक्ने क्षमता नभएकाले अर्जुनलाई डिस्चार्ज गरी घर लैजाने बताइन् ।

निर्मलाका परिवारलाइ राहत सहयोग
बलात्कारपछि हत्या गरिएकी बालिका निर्मलाका परिवारले स्थानीय तह, प्रदेश सरकार र संघीय सरकारबाट गरी १८ लाख रुपैयाँ राहत पाएका छन् । निर्मलाकी आमाले भीमदत्त नगरपालिकामा दैनिक ज्यालादारीमा रोजगारी पनि पाएकी छन् ।

यसैगरी आन्दोलनका क्रममा प्रहरीको गोली लागेर मृत्यु भएका शनि खुनाको परिवारले पनि तीन वटै तहका सरकारबाट १८ लाख रुपैयाँ राहत रकम बुझिसकेको छ । शनिकी आमाले पनि नगरपालिकामा दैनिक ज्यालादारीमा काम पाएकी छिन् ।

तर निर्मलाकै न्यायका लागि आन्दोलनमा होमिँदा घाइते भएका परिवारको भने बिचल्ली भएको छ । उनीहरूले न कुनै राहत पाए नत उपचार खर्च नै । ‘तीन दिनदेखि गृह मन्त्रालयमा धाइरहेको छु, भोलि–भोलि भन्छन्,’ भदौ ८ गते प्रहरीको गोलीबाट घाइते भएका महेन्द्रनगरकै उमेश देउवाका बुबा यज्ञराज देउवाले भने, ‘अस्पतालले त डिस्चार्ज गर्‍यो, तर बेला–बेलामा फलोअपमा आउनुपर्छ यति पैंसा कहाँंबाट ल्याउनु ।’

उमेशका बुबा यज्ञराज पेन्टिङको काम गर्छन् । त्यसैबाट घर परिवारको खर्च चलाउँथे । १ वर्षदेखि छोराको उपचारमा दौडिनु पर्दा रोजीरोटी पनि बन्द भएको उनी बताउँछन् । ‘मजदुरी गरी परिवार पाल्थे, छोराको उपचार कसरी गरौं,’ उनले भने । उमेशलाई ३ महिनाको उपचारपछि डिस्चार्ज गरेको हो । उनको बायाँ खुट्टमा गोली र बायाँ हातमा छर्रा लागेको थियो । खुट्टाको शल्यक्रिया गरी केही निको भए पनि हातका छर्रा ननिकालेकाले बेला–बेला दुखिरहन्छ ।

‘खुट्टाको हड्डी जोडिन लागेको भन्छन्, तर हातको छर्रा निकाल्न अप्रेसन नै गर्नुपर्ने भनेका छन्,’ यज्ञराजले भने, ‘अब सरकारले उपचार खर्च नदिए म त सक्दिनँ, ज्यालादारी गरिखाने मान्छे कहाँबाट अप्रेसन तथा अन्य उपचार गराउन सक्छु ।’ उनी काठमाडौंमा कोठा लिएर बसेका छन् । त्यहींबाट फलोअपमा अस्पताल धाउँछन् । कोठा भाडा र खानाको खर्च तिर्नै धौ–धौ भएको उनले बताए ।

निर्मलाको हत्या भएको पनि १ वर्ष पुग्दै छ । अहिलेसम्म पनि वास्तविक हत्यारा पत्ता लाग्न सकेको छैन । त्यतिबेला घाइते भएकामध्ये ४ जना अहिले पनि उपचारमै छन् । भदौ ८ गते घाइते भएका सुरेन्द्र देउवा र चेतन भट्टलगायत पनि उपचारमै छन् । चेतनको दायाँ हातमा गोलीको छर्रा लागेको छ । उनी अहिले शल्यक्रियाका लागि काठमाडौं गएका छन् । अर्जुन र उमेश जस्तै अन्य घाइतेले पनि उपचार खर्च पाएका छैनन् ।

प्रकाशित : श्रावण ४, २०७६ ०९:५०
ADVERTISEMENT
ADVERTISEMENT
प्रतिक्रिया
पठाउनुहोस्

महाकाली पुलमा ३० प्रतिशत काम

भवानी भट्ट

कञ्चनपुर — महाकाली नदीमा निर्माणाधीन पक्की पुलको ३० प्रतिशत काम सकिएको छ । महाकालीपारिको दोधारा चाँदनीलाई सदरमुकाम महेन्द्रनगरसँग जोड्न दुई वर्षअघि निर्माण सुरु भएको ४ लेनको पुलको पाइलिङसँगै पिलर निर्माणको काम अन्तिम चरणमा पुगेको हो ।

बर्खामा नदीको सतह बढेर अहिले पुल निर्माणको मुख्य काम रोकिए पनि आयोजनाअन्तर्गतका अन्य संरचना धमाधम बनिरहेका छन् ।

‘मुख्य पुलका ३४ मध्ये १७ पिलर निर्माण भइसकेका छन्,’ कुमार सीएफईसी जेभीका इन्जिनियर किशोर पाण्डेयले भने, ‘पाइलिङमा पनि ४८ मध्ये २९० को काम पूरा भएको छ ।’ उनले पुस मसान्तभित्र पाइलिङको काम सक्ने र चैत मसान्तसम्म सबै पिलर निर्माण गरिसक्ने लक्ष्य राखिएको बताए ।

‘पुलमा स्ल्याब हाल्ने काम पनि सँगसँगै चल्छ,’ इन्जिनियर पाण्डेयले भने, ‘पुलका दुवैतर्फ निर्माण हुने पहुँचमार्गको काम पनि ७५ प्रतिशत सकिएको छ ।’ उनले करिब ८ किलोमिटरमा भरानको काम चलिरहेको बताए ।

अहिले पुल र सडक निर्माणको काम रोकिएको छ । सडक किनारमा नाली निर्माण भने भइरहेको छ । सडक किनारमा १२ किलोमिटर नाली निर्माण गर्नुपर्नेछ । पूर्व–पश्चिम राजमार्गको अन्तिम बिन्दु गड्डाचौकीदेखि पुल निर्माण स्थलसम्म पहुँच मार्गमा पर्ने भुजेला नदी र महाकाली सिँचाइ आयोजनाको नहरमा ४ वटा पक्की पुलको काम पनि सम्पन्न भइसकेको छ ।

भीमदत्त नगरपालिका १३ ओदाली र महाकाली नगरपालिका १ चाँदनीलाई जोड्ने गरी निर्माणाधीन पक्की पुल ८ सय मिटर लम्बाइ र २४ मिटर चौडाइको हुनेछ । ३ वर्षभित्र सक्ने गरी कुमार सीएफईसी जेभीसँग ३ अर्व २७ करोड रुपैयाँमा ठेक्का सम्झौता भएको थियो ।

पुलका दुवैतर्फ बाँध बाँधेर आँखा आकारको पोखरी निर्माण गरी पर्यटकीय स्थलका रूपमा समेत विकसित गरिने योजना छ । ‘तीन वर्षभित्रै काम सकिन असम्भव भएकाले २ सय ७० दिन म्याद थप भइसकेको छ,’ इन्जिनियर पाण्डेयले भने, ‘यो अवधिभित्र काम सक्ने गरी हामी लागिरहेका छौं ।’ नदीमा जेठदेखि नै काम रोकिए पनि सडक भरान तथा नाली निर्माणको काम वर्षातमा पनि चलिरहेको उनले बताए । गत वर्ष कात्तिकसम्म नदीमा पानी नघटेका कारण मुख्य पुलको काम ढिलो मात्रै सुरु भएको थियो ।

हिउँदमा पनि अलि माथि रहेको शारदा ब्यारेज (वनबसा पुल) बाट बेलाबेलामा जानकारीबिना नै पानी छाड्ने गरेका कारण काम प्रभावित हुने गरेको छ । यसबाहेक विगतमा मुआब्जा विवादका कारण पनि काममा अवरोध भएको थियो । ‘अब मुआब्जा विवाद टुंगिएको छ, निर्माण कार्यमा कुनै रोकावट छैन,’ महाकाली पुल आयोजनाका प्रमुख खडकलाल श्रेष्ठले भने, ‘विगतमा देखिएका सबै विवाद समाधान भएका छन् ।’ ऐलानी र पर्ती जग्गामा बसोबास गर्नेहरूलाई मन्त्रिपरिषदको निर्णयअनुसार भोगचलनका आधारमा मुआब्जा वितरण गरिएको छ ।

प्रकाशित : श्रावण ४, २०७६ ०९:०६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT