एनसेलको कर विवादमा निर्णय सुनाउने मिति सर्‍यो

कान्तिपुर संवाददाता

काठमाडौँ — सर्वोच्च अदालतले एनसेलको कर विवादमा निर्णय सुनाउने मिति सारेको छ । मंगलबार निर्णय सुनाउने मिति तोकिएकोमा सर्वोच्चले आगामी साउन ३० गते निर्णय सुनाउने मिति तय गरेको हो ।

सर्वोच्चले यसअघिका प्रधानन्यायाधीश गोपाल पराजुलीको कार्यकालमा अपनाइएको शैलीको अनुशरण गर्दै मुद्दालाई पूर्ण इजलासमा पेस गर्न आदेश दिएको थियो। पूर्ण इजलासको फैसला अन्तिम भई पुनरावलोकनमा जाने अवस्था हुदैन। यसअघि पनि एनसेलको मुद्दालाई पूर्ण इजलासमा पेस गर्न आदेश दिइएको थियो।

आफूमाथि १० प्रतिशत पूँजीगत लाभकरबापत १४ अर्ब ३६ करोड रुपैयाँ कर निर्धारण हुनुपर्नेमा ३९ अर्ब ६ करोड रुपैयाँ निर्धारण गर्नु गलत हुने एनसेलको दाबी थियो।

मुद्दा किनारा लगाउने बेलामा व्यक्त हुनुपर्ने रायलाई समेत सुरुमै प्रस्तुत गर्दै न्यायाधीश बमकुमार श्रेष्ठको इजलासले आदेशमा भनेको थियो, ‘यसअघि नै एनसेलले २३ अर्ब ५६ करोड रुपैयाँ दाखिला गरिसकेकाले त्यो घटाएर माग गर्ने भनिएको देखिए तापनि निर्णय हुनुपूर्व नै बुझाइसकेको अग्रिम करको सो अंकलाई एकमुष्ठ लाग्ने करमा गणना गरी थप शुल्क लिने गरी भएको निर्णय मनासिव देखिएन।’

प्रकाशित : श्रावण २१, २०७६ १८:४४
ADVERTISEMENT
प्रतिक्रिया
पठाउनुहोस्
ADVERTISEMENT

केन्द्र विवाद : कार्यालयका सामान सार्न खोज्दा झडप

नगर कार्यसमिति चयन भएदेखि नै सुरु भएको केन्द्र विवादले मेयर र उपमेयरबीच सधैं झगडा छ । 
श्यामसुन्दर शशि

(जनकपुर ) — केन्द्र सार्ने विवादले हंसपुर नगरपालिका २ बघचौडास्थित स्थायी केन्द्र मंगलबार दिनभर तनावग्रस्त रह्यो । घटनामा आधा दर्जन स्थानीय र केही प्रहरी घाइते भएका छन् । बघचौडास्थित स्थायी केन्द्रमा रहेका कागजपत्र ओसार्न सशस्त्र र नेपाल प्रहरीको सुरक्षा घेरामा मेयर रामज्ञान मण्डलले दुईवटा ट्र्याक्टर पठाएका थिए । तर वडाध्यक्ष उदयकुमार साहको नेतृत्वमा स्थानीयले विरोध गर्दा स्थिति तनावग्रस्त बनेको हो । 

नगर कार्यसमिति चुनिएदेखि नै सुरु भएको केन्द्र सार्ने विवादले मेयर मण्डल र उपमेयर रेणु झाबीच सधैं झगडा छ । उपमेयर केन्द्र सार्न नहुने पक्षमा छिन् । मेयर मण्डलले पछिल्लो पटक हंसपुर चोकमा अस्थायी कार्यालय पनि सञ्चालनमा ल्याएको घोषणा गरे पनि मूल कार्यालयबाट कुनै पनि सामान सार्न पाएका छैनन् । सहमति नै नभई कार्यालयका सामान लैजान खोज्दा मंगलबार स्थानीय विरोधमा उत्रिएका हुन् । इलाका प्रहरी कार्यालय धनुषाधाम, बलगंगा सशस्त्र प्रहरी कार्यालय एवं बेलही प्रहरी चौकीबाट आएको सुरक्षाकर्मीको टोली र बघचौडावासीबीच घम्साघम्सी भएको हो । मेयर मण्डलले ‘अफिस लुट्न मान्छे पठाएको’ भने भन्ने हल्ला फैलिएपछि गाउँले नगरपालिका कार्यालय रहेको बघचौडा बजारमा भेला भएका थिए । बजारमा सयौंको संख्यामा भेला भएका स्थानीयलाई नगर कार्यालयतर्फ जान प्रहरीले रोकेपछि घम्साघम्सी भएको हो ।

‘पुलिसहरू जनतालाई यतै अलमल्याएर कार्यालयका सामान झिक्न खोज्दै थिए । तर हामीले चाल पायौं,’ उपमेयर झाले भनिन्, ‘कार्यालयका सामान सार्नबाट रोक्न खोज्दा झडप भयो ।’

नगरपालिका कार्यालयतर्फ जान खोजेका हंसपुर २ का अध्यक्ष उदयकुमार साह र आफ्ना गाडीचालक पुण्यकुमार खत्रीलाई धनुषाधाम इलाका प्रहरी कार्यालयका इन्चार्ज रामकुमार यादवले कुटपिट गरेको उनले बताइन् । प्रहरीले लाठीचार्ज गर्दा तपेश्वर मण्डल, फेकन कापर र अशोक मिश्रलगायत आधा दर्जन स्थानीय घाइते भएका छन् । ढाडमा गम्भीर चोट लागेका मण्डललाई भने सघन उपचारका लागि जनकपुर ल्याइएको छ । मेयरले पठाएको भनिएका दुवै ट्र्याक्टर स्थानीयले नियन्त्रणमा लिएपछि झडप भएको थियो । स्थानीय र सुरक्षाकर्मीबीच झन्डै तीन घण्टासम्म भएको झडप जिल्लाबाट प्रहरी नायब उपरीक्षक रामेश्वर कार्कीको नेतृत्वमा पुगेको टोलीको पहलमा साम्य भएको थियो । झडपका क्रममा प्रहरीले पक्राउ गरेका स्थानीय चन्दर साह र दिनेश साहलाई मुक्त गर्ने र स्थानीयले ट्र्याक्टर फिर्ता गर्ने सहमति भएको उपमेयर झाले जानकारी दिइन् ।

प्रकाशित : श्रावण २१, २०७६ १८:३९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT