सुनौली नाकामा अलपत्र परेका नेपाल प्रवेश गरे
भैरहवा — सिमानाबाटै नेपाल आउनमा रोक लगाइएपछि सुनौली नाकामा अलपत्रमा परेका नेपालीको ठूलो समूहलाई आठ घण्टापछि नेपाल आउन अनुमति दिइएको छ ।
लामो यात्राका क्रममा सिमाना बन्द हुने जानकारी नपाएपछि भारतको विभिन्न स्थानबाट घर फर्केका नेपालीको समूह सोमबार बिहान १० बजेदेखि सिमानाबाट नेपाल आउनमा रोक लगाइदा भारततर्फ नै अलपत्रमा परेका थिए । सोमबार साँझ ६ बजेतिर स्थानीय प्रशासनले उनीहरुलाई नेपाल आउने अनुमति दिएको थियो ।
रुपन्देहीका प्रमुख जिल्ला अधिकारी महादेव पन्थले उनीहरुलाई मानवीयताको आधारमा सबैको विस्तृत विवरणसहितको फर्म भरेर नेपाल आउने अनुमति दिइएको बताए । ‘उनीहरुलाई थेग्न सक्ने खालको क्वारेन्टाइन नभएकाले व्यक्तिगत विवरण विस्तृत रुपमा भरेर र सिमानामा स्वास्थ्य परीक्षण गरेर नेपाल आउन अनुमति दिइएको हो,’ प्रजिअ पन्थले भने,‘ती फर्महरु सम्बन्धित जिल्ला प्रशासन कार्यालयमा पठाइने छ र केही परेमा त्यहीँबाटै उनीहरुको निगरानी हुने छ ।’
उनीहरु ट्रान्जिटका क्रममा रहेको र भारततर्फपनि अ-आफ्नै देशमा जान भनी हटाउन थालेपछि उनीहरु समस्यामा परेकाले मानवीय समस्या आएको पन्थले बताए । अब उप्रान्त यसरी आउने कसैलाईपनि नेपाल आउने अनुमति नदिइने उनले जनाए । उनका अनुसार, करिब ३ सयको संख्यामा रहेका नेपालीलाई नेपाल आउने अनुमति दिइएको हो । त्यसपछि सिमानाबाट नेपाल आउनमा पुन रोक लगाइएको छ ।
नेपाल आउन नपाएपछि सोमबार बिहानदेखि सुनौली नाकामा अलपत्रमा परेका नेपालीको समूहमा महिला र बालबालिका पनि थिए ।
यो पनि पढ्नुहोस्ः
बोर्डर बन्द भएपछि सुनौली नाकामा २ सय नेपाली अलपत्र
प्रकाशित : चैत्र १०, २०७६ १९:१६