गौरीफन्टा नाकामा रोकिएकालाई क्वारेन्टाइनमा बस्नेगरी प्रवेश गर्न दिइने

प्रमुख जिल्ला अधिकारी यज्ञराज बोहराले सीमा नाकाको दशगजा क्षेत्रमा रोकेर राखिएका नेपालीलाई सम्बन्धित गाउँ तथा नगरपालिकाको क्वारेन्टाइनमा राख्ने गरी भित्राउन लागेको बताए । ‘त्यहाँ रोकिएका नेपालीलाई सम्बन्धित जिल्लामा बसमा पुऱ्याउने भएका छौं,’ ‘उनले भने, ‘अहिले उनीहरुको स्वास्थ्य परीक्षण र व्यक्तिगत बिवरण लिने काम भइरहेको छ ।’

गौरीफन्टा नाकामा एक हजार अलपत्र

प्रजिअ बोहराले विवरण संकलन भएपछि साँझसम्म उनीहरुलाई गन्तव्यतर्फ लगिने बताए । उनका अनुसार उनीहरुलाई गनतव्यमा पुगाउन यतायात समितिहरुको बस उपलब्ध गराइने छन् । ‘सम्बन्धित जिल्लामा बसले पुगाएपछि प्रदेश स्थानीय तहले उनीहरुलाई क्वारेन्टाइनमा राख्ने छन्,’उनले भने ।

गौरीफन्टा नाकामा तनाव

भारतका विभिन्न सहरमा काम गर्ने करिब एक हजार नेपाली सोमबार साँझदेखि मंगलबार बिहानसम्म गौरीफन्टा नाकामा आइपुगेका थिए । उनीहरुलाई स्थानीय प्रशासनले प्रवेश गर्न दिएको थिएन । सोमबार साँझ पुगेका नेपालीहरु दशगजाको खुल्ला चौरमै रात बिताउन बाध्य भएका थिए ।

मंगलबार बिहान उनीहरुले घर फर्कन पाउनुपर्ने माग राख्दै चर्काे नाराबाजी जबर्जस्ती गरेका थिए । प्रजिअ बोहराका अनुसार गृह मन्त्रालय र प्रदेश सरकार संगको समुन्वय गरेर उनिहरुलाई स्वदेश प्रवेश गर्न दिने निर्णय स्थानिय प्रशासनले गरेको हो ।