स्वेच्छाले कोरोना परीक्षण गर्नेका लागि शुल्क तोकिएको छैन : स्वास्थ्य मन्त्रालय

मन्त्रालयले विज्ञप्ती निकाल्दै परीक्षणको दायरा बढाउनका लागि यस्तो व्यवस्था मिलाएको र यस सम्बन्धमा कति शुल्क लाग्ने, प्रयोगशाला कस्तो हुने, सुरक्षा प्रबन्ध कसरी अपनाउने लगायतका विषयमा छलफल र निर्णय हुन बाँकी नै रहेको जनाएको छ ।

स्वास्थ्य तथा जनसंख्या मन्त्रालयले मंगलबार सार्वजनिक स्वास्थ्य संस्थामा जोसुकै व्यक्तिले पैसा तिरेर कोरोना परीक्षण गर्न सक्ने बताएको थियो ।

तोकिएको मापदण्ड र सूचनाको गोपनियता तथा नियमित रिपोर्टिङ गर्ने सर्त अनिवार्य पालना गर्ने गरी लक्षण नभएकाले पनि परीक्षण गर्न पाउने मन्त्रालयले सूचना सार्वजनिक गरेको थियो ।

आरडीटी र पीसीआर परीक्षण स्वेच्छाले गर्न चाहने स्वदेशी तथा विदेशी नागरिकहरुले तोकिएका सार्वजनिक स्वास्थ्य संस्थाहरुमा गएर तोकिएका दररेटमा परीक्षण गराउन सक्ने नीतिगत निर्णय गरेको बताएको थियो ।