थप ३ मृतकमा कोरोना पुष्टि, नेपालमा मृतकको संख्या ६७ पुग्यो

अस्पतालका संयोजक डा. उदयनारायण सिंहका अनुसार मुटुरोगी ती व्यवसायी मंगलबार दिउँसो निमोनिया र स्वासप्रश्वासको समस्या लिएर आएका थिए । ‘बुधबार राति १० बजेतिर स्वास्थ्य बिग्रिएपछि भेन्टिलेटरमा राखिएको थियो,’ डा. सिंहले भने, ‘बिहीबार बिहान साढे ८ बजे मृत्यु भयो ।’

यस्तै, गत साउन २० मा घरमै मृत्यु भएका वीरगन्ज महानगरपालिका–११ मुर्लीका ८० वर्षीय वृद्धमा पनि बिहीबार नारायणी अस्पतालको प्रयोगशालामा गरिएको परीक्षणमा कोरोना पुष्टि भएको हो । गत मंगलबार राति आफ्नै निवासमा मृत्यु भएका उनको बुधबार बिहान स्वाब संकलन गरिएको थियो । साउन १७ गते काठमाडौंस्थित ओम अस्पतालमा उपचारका क्रममा मृत्यु भएकी धनुषाको मिथिला नगरपालिका–१० लालगढकी ७२ वर्षीया महिलामा पनि बिहीबार कोरोना पुष्टि भएको छ । उनी दम र मधुमेहकी बिरामी थिइन् । योसँगै बिहीबार साँझसम्म कोरोनाबाट देशभर मृत्यु हुनेको संख्या ६७ पुगेको स्वास्थ्य तथा जनसंख्या मन्त्रालयले जनाएको छ ।