कोरोनाबाट मृत्यु हुनेको संख्या ८३ पुग्यो

मन्त्रालयका अनुसार धनुषाका दुई, काभ्रेपलाञ्‍चोक र सिन्धुपाल्चोकका एक/एक जनाको मृत्यु भएको हो । धनुषा विदेह नगरपालिका ८ बस्ने ६० वर्षका पुरुषको सोमबार राति प्रादेशिक अस्पताल जनकपुरमा निधन भएको हो । ती पुरुष साउन ८ गते निमोनिया भइ अस्पतालमा आईसीयूमा उपचारमा थिए । उनमा क्षयरोगसमेत थियो ।

यस्तै मिथिला विहारी नगरपालिका ५ का ५० वर्षीय पुरुषको साउन २५ गते मृत्यु भएको मन्त्रालयले जनाएको छ । उनको मृत्युपछि स्वाब नमुना संकलन गरी परीक्षण गर्दा सोमबार कोरोना पुष्टि भएको हो । ती पुरुष झाडापखाला लागी मोटरसाइकलमा आस्पताल जाँदै गर्दा बाटोमा बेहोस भइ लडेको र अस्पताल पुर्‍याउँदा मृत घोषणा गरिएको मन्त्रालयको तथ्यांकमा उल्लेख छ ।

अर्का मृतकमा काभ्रे पाँचखाल नगरपालिका १ का ५० वर्षीया महिला छिन् । उनको किस्ट मेडिकल कलेज शिक्षण अस्पताल ललितपुरमा मंगलबार मृत्यु भएको हो । आइतबार निमोनियाको लक्षण लिई अस्पताल भर्ना भएकी ती महिलाको स्वाब संकलन गरी परीक्षण गर्दा मंगलबार नै कोरोना पुष्टि भएको हो । ती महिलामा फोक्सो तथा पित्तथैली सम्बन्धी रोग पनि थियो ।

सिन्धुपाल्चोक बाह्रबिसे नगरपालिका ४ निवासी ८४ वर्षीय पुरुषको २२ गते मनमोहन कार्डियो भास्कुलर शिक्षण अस्पताल महाराजगन्जमा निधन भएको थियो । मुटु तथा मिर्गौला सम्बन्धी समस्याका कारण २१ साउनमा अस्पताल भएका ती वृद्धामा मंगलबार कोरोना पुष्टि भएको हो ।