लिदी पहिरो : मृत्यु हुने ११ जनाको सनाखत, बेपत्ताको खोजी जारी
सिन्धुपाल्चोक — जुगल गाउँपालिका वडा नम्बर–२, लिदी लामागाउँको पहिरोमा बेपत्ता भएकामध्ये ११ जनाको शबवफेला परेको छ । ११ जनाको शव शुक्रबार पहिरोले पुरिएको अवस्थामा फेला परेको र सनाखत भइसकेको जिल्ला प्रहरी कार्यालय सिन्धुपाल्चोकले जनाएको छ ।
जिल्ला प्रहरी कार्यालयका प्रवक्ता डीएसपी माधवप्रसाद काफ्लेका अनुसार मृत्यु हुनेहरुमा लिदी लामागाउँकी ३६ वर्षीया टिकामाया दोङ, १४ वर्षीय छिरिङ दोङ, ८० वर्षीय जिते झाक्री, ८ वर्षीय मिलन दोङ, ८ वर्षीय सानु दोङ, ७० वर्षीय जयबहादुर दोङ, ३० वर्षीय दावाल्हामु दोङ, ५ वर्षीया प्रिती दोङ, ५ महिनाकी कान्छी दोङ, ३४ वर्षीया धनमाया दोङ र ४ महिनाका रेमिश दोङ रहेका छन्।
बौद्ध परम्पराअनुसार मृतकहरुको सामूहिक रुपमा अन्येष्टिको तयारी गरिएको छ । बर्खाले सडक बगाएपछि एक्स्काभेटर लैजान नसकिँदा आहिले सशस्त्र प्रहरी, नेपाली सेना र नेपाल प्रहरीका ५५ जनाको टोली मिलेर साबेल, कोदालोको भरमा बाँकी २७ जना बेपत्ता खोजी गरिरहेको डीएसपी काफ्लेले जानकारी दिए ।
पहिरोमा पुरिएर घाइते भएका जुगल लिदीका ९ वर्षका रुपबहादुर दोङ,४३ वर्षकी जुनमाया दोङ, ६० वर्षकी केवरीङ दोङ र २३ वर्षका पासाङ दोङको चौतारास्थित अस्पतालमा उपचार भइरहेको छ भने ४५ वर्षकी यामुलामु दोङको काठमाडौंको बानेश्वरस्थित सिभिल अस्पतालमा उपचार भइरहेको उनले जनाए । ‘सबैको अवस्था सामान्य भएको खबर आएको छ, अधिकाशंको टाउको र हातमा चोट लागेको छ,’ डीएसपी काफ्ले भने ।
हेलिकप्टरबाट राहत
पहिरोले विस्थापित लिदीका ३७ परिवारको तत्कालीन समस्यालाई टार्न पहल सुरु गरिएको छ । जिल्ला विपद् व्यवस्थापन समितिको अनुरोधमा गृह मन्त्रालयले हेलिकप्टरबाट ४० सेट त्रिपाल, भाँडाकुँडा, ब्ल्यांकेट, म्याट्रेस, डस्नालगायतका लत्ताकपडा सहयोग गरेको छ । जिल्ला विपद् व्यवस्थापन समितिबाट पीडित ३७ परिवारलाई राहत दिइएको थियो ।
पीडित र मृतक परिवारलाई तत्कालका लागि खर्च दुई लाख रुपैयाँ घटनास्थलमा पुगेका गृहमन्त्री थापाले वितरण गरेको प्रमुख जिल्ला अधिकारी उमेशकुमार ढकालले जानकारी दिए । वाग्मती प्रदेशका मुख्यमन्त्री डोरमणि पौडेलसहित पूर्व कानुनमन्त्री शेरबहादुर तामाङ, प्रदेश ३ का सामाजिक विकास मन्त्री युवराज दुलाल, पर्यटन तथा वन मन्त्री अरुण नेपाल, सांसद सरेश नेपाललगायत पनि राहत सामग्री लिएर लिदीतर्फ लागेका छन् ।
सम्बन्धित समाचार
प्रकाशित : श्रावण ३१, २०७७ १०:०६