नाकामा एन्टिजेन पोजिटिभ देखिएकाको नमुना जीन सिक्वेन्सिङका लागि एनपीएचएलमा पठाउनुपर्ने

नेपालमा कोरोना संक्रमण घट्दो क्रममा भएपनि दक्षिण अफ्रिका तथा केही मुलुकहरुमा नयाँ भेरियन्ट 'ओमिक्रोन' देखिएकाले सजगता अपनाउन थप परीक्षण सुरु गर्न विभागले पत्राचार गरेको हो ।

सोमबार एक सूचना जारी गर्दै विभागका महानिर्देशक डा. दीपेन्द्ररमण सिंहले परीक्षण मापदण्डअनुसार एन्टिजेन परीक्षणमा पोजिटिभ आएकाहरुको थप नमुना संकलन गरेर प्रदेश जनस्वास्थ्य प्रयोगशालासँग समन्वय गरी जीन सिक्वेन्सिङका लागि राष्ट्रिय जनस्वास्थ्य प्रयोगशाला टेकुमा नमुना पठाउने व्यवस्था मिलाउन अनुरोध गरेका छन् ।

विभागले राष्ट्रिय जनस्वास्थ्य प्रयोगशालालाई भने नाकाहरुबाट संकलित नुमनाहरुको जीन सिक्वेन्सिङ परीक्षण मिलाउनुपर्ने बताएको छ ।

साथै प्रादेशिक जनस्वास्थ्य प्रयोगशालाले सबै सीमा नाकाहरुमा संकलित कोभिड-१९ एन्टिजेन पोजिटिभ नमुनालाई एनपीएचएलसम्म पुर्‍याउनका लागि समन्वय तथा सहजीकरण गर्न तथा प्रदेश स्वास्थ्य आपतकालीन केन्द्रले संकलित नमुनाहरुलाई राष्ट्रिय प्रयोगशालासम्म पुर्‍याउने व्यवस्था गर्नका लागि सूचनामार्फत आग्रह गरेको छ ।